ភ្ញៀវទេសចរដែលទៅលេងប្រទេស ជប៉ុន នារដូវផ្កា សាគូរ៉ា រីក នាពេលកន្លងមក។ AFP
ក្រុងតូក្យូៈ ទិន្នន័យផ្លូវការបានបង្ហាញកាលពីថ្ងៃពុធថា ប្រទេស ជប៉ុន បានស្វាគមន៍ភ្ញៀវទេសចរបរទេសជាង ៣១ លាននាក់កាលពីឆ្នាំ ២០១៨ ដែលជាចំនួនខ្ពស់បំផុតមិនធ្លាប់មាន ខណៈពេលដែលប្រទេសនេះត្រៀមរៀបចំការប្រកួតកីឡាបាល់ឱបពិភពលោកនៅឆ្នាំនេះ និងកីឡាអូឡាំពិកនៅទីក្រុងតូក្យូឆ្នាំ ២០២០។
.jpg)
ប្រទេសដែលមានសេដ្ឋកិច្ចឈានមុខគេទី ៣ របស់ពិភពលោកមួយនេះ ដែលក៏ល្បីខាងប្រាសាទបុរាណ និងវប្បធម៌ពេញនិយមដ៏រស់រវើករបស់ខ្លួនផងដែរនោះ បានស្វាគមន៍ភ្ញៀវទេសចរ ៣១,២ លាននាក់កាលពីឆ្នាំ ២០១៨ កើនឡើង ៨,៧ ភាគរយធៀបនឹងឆ្នាំ ២០១៧។ នេះបើយោងតាមអង្គការទេសចរណ៍ជាតិរបស់ប្រទេស ជប៉ុន។
ប្រទេសអាស៊ីធំៗដែលបានធ្វើដំណើរទៅទស្សនាប្រទេស ជប៉ុន រួមមានភ្ញៀវទេសចរជនជាតិចិនមានជាង ៨ លាននាក់ (កើនឡើង ១៣,៩ ភាគរយ) និងជនជាតិកូរ៉េខាងត្បូង ៧,៥ លាននាក់ (កើនឡើង ៥,៦ ភាគរយ)។
បន្ទាប់មក គឺភ្ញៀវទេសចរ ជនជាតិតៃវ៉ាន់ ដែលមានចំនួន ៤,៨ លាននាក់។
ជារួមភ្ញៀវទេសចរទាំងនេះ រួមទាំងពាណិជ្ជករដែលស្នាក់នៅរយៈពេលមានកម្រិតផងដែរនោះ បានចំណាយ ៤,៥ ពាន់ពាន់លានយ៉េន (៤១,៥ ពាន់លានដុល្លារ) នៅក្នុងប្រទេស ជប៉ុន ដែលជាតួលេខខ្ពស់បំផុតមិនធ្លាប់មាន។ នេះបើយោងតាមទីភ្នាក់ងារទេសចរណ៍ជប៉ុន។ ភ្ញៀវទេសចរចិនគឺជាអ្នកចំណាយប្រាក់ច្រើនជាងគេ ដែលមានរហូតដល់ ១,៥៤ ពាន់ពាន់យ៉េន ឬជាង ១ ភាគ ៣ នៃការចំណាយសរុប។
ជប៉ុនកំពុងពឹងផ្អែកលើទេសចរណ៍អន្តរជាតិ ដើម្បីជួយជំរុញសេដ្ឋកិច្ចរបស់ខ្លួន ដោយលោកនាយករដ្ឋមន្ដ្រី ស៊ីនហ្សូ អាបេ មានបំណងទាក់ទាញភ្ញៀវទេសចរឲ្យបាន ៤០ លាននាក់ត្រឹមឆ្នាំ ២០២០ នៅពេលទីក្រុងតូក្យូរៀបចំការប្រកួតកីឡាអូឡាំពិករដូវក្ដៅ៕ AFP/LA
