សិង្ហបុរីៈ តម្លៃប្រេងធ្លាក់ចុះវិញនៅថ្ងៃចន្ទបន្ទាប់ពីកិច្ចប្រជុំ ដើម្បីពិភាក្សាបន្ថយផលិតកម្មប្រេងរវាងប្រទេសជាសមាជិកអង្គការ OPEC និងសម្ព័ន្ធមិត្តរបស់ខ្លួនត្រូវបានពន្យារដែលធ្វើឲ្យស្រអាប់ចំពោះក្តីសង្ឃឹមនៃការកាត់បន្ថយផលិតកម្មដើម្បីគាំទ្រដល់ទីផ្សារប្រេងដែលធ្លាក់ចុះបណ្តាលមកពីវីរុសកូរ៉ូណា។
សន្ទស្សន៍តម្លៃប្រេងឆៅម៉ាក West Texas Intermediate (WTI) របស់អាមេរិក បានធ្លាក់ចុះវិញចំនួន ៨ ភាគរយនៅពេលបើកការជួញដូរក្នុងទីផ្សារអាស៊ី ប៉ុន្តែបានស្ទុះងើបវិញខ្លះ ហើយកំពុងជួញដូរក្នុងតម្លៃទាបជាង ៥,៧ ភាគរយនៅត្រឹម ២៦,៧២ ដុល្លារក្នុង ១ បារ៉ែល។
សន្ទស្សន៍តម្លៃប្រេងឆៅអន្តរជាតិម៉ាក Brent បានធ្លាក់ចុះ ៤,៣ ភាគរយដោយជួញដូរត្រឹមតម្លៃ ៣២,៦៤ ដុល្លារក្នុងមួយបារ៉ែល។
តម្លៃប្រេងបានធ្លាក់ចុះដល់កម្រិតទាបមិនដែលប្រទះជាច្រើនឆ្នាំ ដោយសារការរីករាលដាលវីរុសកូរ៉ូណា និង សង្គ្រាមតម្លៃរវាងមហាអំណាចប្រេងទាំង ២ គឺរុស្ស៊ី និងអារ៉ាប៊ី សាអ៊ូឌីតដែលជាតួអង្គសំខាន់នៅក្នុងអង្គការ OPEC។
ការបិទអាជីវកម្មការរឹតត្បិតការធ្វើដំណើរ និងវិធានការដទៃបានដាក់ឲ្យអនុវត្តដើម្បីទប់ស្កាត់ការរាលដាលវីរុសបានប៉ះពាល់តម្រូវការយ៉ាងអាក្រក់។
តម្លៃបានងើបឡើងវិញពីកម្រិតទាបក្នុងរយៈពេល ១៨ ឆ្នាំកាលពីសប្តាហ៍កន្លងទៅនេះ បន្ទាប់ពីប្រធានាធិបតីអាមេរិកលោក ដូណាល់ ត្រាំ បាននិយាយថា ទីក្រុងរីយ៉ាដ និងទីក្រុងម៉ូស្គូនឹងបញ្ចប់ជម្លោះរបស់ពួកគេ ហើយយល់ព្រមកាត់បន្ថយផលិតកម្មច្រើន។
ប៉ុន្តែក្រុមអ្នកវិភាគនៅតែងឿងឆ្ងល់អំពីដំណោះស្រាយភ្លាមៗ និងការសង្ស័យកាន់តែកើនឡើង ពេលដែលកិច្ចប្រជុំរវាង OPEC និង សម្ព័ន្ធមិត្តខ្លួនរួមមានប្រទេសរុស្ស៊ីត្រូវបានពន្យារពេលនោះ។
រដ្ឋាភិបាលនៃប្រទេស Azerbaijan ដែលសម្បូរធនធានប្រេងបានឲ្យដឹងកាលពីចុងសប្តាហ៍កន្លងទៅនេះថា ពួកគេបានរំពឹងចំពោះកិច្ចប្រជុំធ្វើឡើងតាមរយៈសន្និសីទវីដេអូ ដើម្បីពិភាក្សាអំពីការកាត់ផលិតកម្មប្រេងនៅថ្ងៃចន្ទ ប៉ុន្តែកិច្ចប្រជុំនោះត្រូវបានពន្យាររហូតដល់ថ្ងៃព្រហស្បតិ៍។
លោក ត្រាំ បានធ្វើឲ្យអ្នកវិនិយោគមានការភ្ញាក់ផ្អើលកាលពីសប្តាហ៍កន្លងទៅ ដោយបានសរសេរនៅលើបណ្តាញសង្គម tweeter ថា៖ «ខ្ញុំរំពឹង និងសង្ឃឹមថា ទីក្រុងរីយ៉ាដ និងទីក្រុងម៉ូស្គូនឹងកាត់បន្ថយផលិតកម្មប្រហែល ១០ លានបារ៉ែល និងប្រហែលច្រើនជាងនេះ។
កាលពីថ្ងៃសុក្រក្នុងសប្តាហ៍មុនទីក្រុងម៉ូស្គូបាននិយាយថា ខ្លួនត្រៀមពិភាក្សាដើម្បីកាត់បន្ថយចំនួនប្រហែល ១០ លានបារ៉ែលក្នុង ១ ថ្ងៃ។
ប៉ុន្តែលោក Stephen Innes ប្រធានយុទ្ធសាស្ត្រទីផ្សារសកលនៃក្រុមហ៊ុន AxiCorp ឲ្យដឹងថា អ្នកជំនួញនៅតែងឿងឆ្ងល់ខ្លាំងចំពោះកិច្ចព្រមព្រៀងដែលនឹងមានក្នុងពេលខាងមុខហើយប្រសិនបើមានមែន វានឹងគ្មានប្រសិទ្ធភាពក្នុងការទប់ស្កាត់អ្នកផ្គត់ផ្គង់ប្រេងទាំងនោះ»៕ RR