តម្លៃជ្រូករស់ចាប់ផ្តើមឡើងថ្លៃពេលការនាំចូលត្រូវបន្ថយ
ភ្នំពេញៈ តម្លៃជ្រូករស់ក្នុងស្រុកបានចាប់ផ្តើមកើនឡើង ចាប់តាំងពីដើមខែសីហា ដោយសារការនាំចូលពីវៀតណាមត្រូវបានកាត់បន្ថយ។ បើទោះបីយ៉ាងណាក៏ដោយ ម្ចាស់កសិដ្ឋានធំៗបានឲ្យដឹងថា តម្លៃនេះអាចនឹងធ្លាក់ចុះនៅថ្ងៃណាមួយ ដោយសារទីផ្សារកម្ពុជា ពឹងផ្អែកលើប្រទេសជិតខាង។
លោក លី ឡាវីល នាយកកសិដ្ឋានចិញ្ចឹមជ្រូក ក្រុមហ៊ុនម៉ុងឫទ្ធីគ្រុប បានឲ្យដឹង កាលពីថ្ងៃម្សិលមិញថា តម្លៃជ្រូករស់បានហក់ឡើងពីជាង ៨០០០ រៀល រហូតដល់ ៩៥០០ រៀល ក្នុងមួយគីឡូក្រាម។
លោក បញ្ជាក់ថា ការឡើងថ្លៃជ្រូករស់នេះ ដោយសារតម្រូវការសាច់ជ្រូក ពីប្រទេសចិនកើនឡើង ដែលជំរុញឲ្យប្រទេសវៀតណាមត្រូវបង្វែរការនាំចូលទៅចិន និងកាត់បន្ថយការនាំចូលមកកម្ពុជា។
លោកបន្តថា តម្លៃកើនឡើងនៅថៃក៏ជំរុញទីផ្សារជ្រូកឡើងថ្លៃផងដែរ។ មូលហេតុខ្លះទៀតអាចបណ្តាលមកពីការផ្គត់ផ្គង់ក្នុងស្រុកមិនឆ្លើយតបទៅនឹងតម្រូវការ ព្រោះ កសិករដែលធ្លាប់ចិញ្ចឹមទ្រង់ទ្រាយតូចបោះបង់ការចិញ្ចឹមក្នុងអំឡុងពេលជ្រូកធ្លាក់ថ្លៃហើយឈ្មួញដែលធ្លាប់នាំចូលច្រើនពីប្រទេសវៀតណាមក៏កាត់បន្ថយការនាំចូលក្រោយថ្ងៃបោះឆ្នោត។
លោកបន្តថា៖«ក្រោយការបោះឆ្នោតឈ្មួញនាំចូលមិនស្រូវនាំចូល ព្រោះ បន្ទាប់ពី ការបោះឆោ្នត ស្ថានការណ៍ហាក់មានភាពរញ៉េរញ៉ៃបន្តិចដែលធ្វើឲ្យអ្នកនាំចូលមានក្តីបារម្ភ។ ដូចនេះ ការបោះឆោ្នតរួចភ្លាមការនាំចូលបានធ្លាក់ចុះស្របពេលជ្រូកនៅវៀតណាមឡើងថ្លៃភ្លាមៗ ព្រោះមានតម្រូវការនៅចិន»។
លោកបន្ថែមថា កសិដ្ឋានលោកបន្តការលក់ជាមធ្យមចន្លោះពី ៤ ពាន់ទៅ ៥ ពាន់ក្បាលក្នុងមួយខែ។
ការពឹងផ្អែកលើទីផ្សារក្រៅប្រទេស បានធ្វើឲ្យការផ្គត់ផ្គង់ក្នុងស្រុកគ្មានស្ថិរភាព។ ពេលមានការនាំចូលច្រើនបានធ្វើឲ្យប៉ះពាល់ដល់អ្នកចិញ្ចឹមក្នុងស្រុកធ្វើឲ្យកសិករបាក់ទឹកចិត្តលែងចង់ចិញ្ចឹម ប៉ុន្តែ ពេលការនាំចូលពីខាងក្រៅត្រូវបានកាត់បន្ថយការផ្គត់ផ្គង់ក្នុងស្រុកជួបបញ្ហា។ បច្ចុប្បន្នកសិករក្នុងស្រុកភាគច្រើនបានបោះបង់ការចិញ្ចឹមជ្រូក ដោយសារតែមាននាំចូលដោយគ្មានការគ្រប់គ្រងធ្វើតម្លៃធ្លាក់ចុះ។
លោក លី ឡាវីល គិតថា តម្លៃនេះវាសមរម្យណាស់សម្រាប់អាជីវកម្មចិញ្ចឹមជ្រូកក្នុងស្រុកតែវាមិនអាចស្ថិតស្ថេរបាននោះទេ ព្រោះប្រទេសកម្ពុជាពឹងផ្អែកការនាំចូលជ្រូករស់។ ក្នុងមួយរយៈកាលចុងក្រោយនេះ កម្ពុជានាំចូលជ្រូកពីប្រទេសវៀតណាមមួយគត់ដោយសារជ្រូកវៀតណាមចុះថោក។
លោកបន្ថែមថា៖«តែពេលនេះចិនចាប់ផ្តើមស៊ីសាច់ជ្រូកពីវៀតណាមវិញ។ ប្រទេសចិន នេះសាហាវណាស់កាលវាប្រើប្រាស់របស់អ្នកណាហើយរបស់ប្រទេសនោះដឹងឡើងថ្លៃតែម្តង។ ចិនស៊ីតែមួយប្រ៉ាវទេជ្រូកនឹងអស់រលីងពីប្រទេសវៀតណាម»។
លោកបន្ថែមថា៖«តម្លៃស្រុកគេចុះថោកយើងត្រូវតែចុះថោកតែបើគេឡើងថ្លៃយើងក៏មានឱកាសឡើងតាមគេមួយចំនួនផងដែរ។ ប្រទេសវៀតណាមផលិតបានច្រើនណាស់បើចិននៅបន្តប្រើប្រាស់របស់វៀតណាមតម្លៃនៅកម្ពុជាក៏បន្តខ្ពស់បានយូរដែរ»។
លោក ស្រ៊ុន ពៅ ប្រធានសមាគមចិញ្ចឹមជ្រូកនៅកម្ពុជា និងជាម្ចាស់កសិដ្ឋានដែលចិញ្ចឹមជ្រូកលក់ចេញប្រមាណ ២០០ ក្បាលក្នុងមួយខែបានឯកភាពនឹងហេតុផលដែលបានលើកឡើងនោះ។
លោកបន្ថែមថា អ្នកចិញ្ចឹមរីករាយជាមួយតម្លៃចុងក្រោយនេះ ព្រោះគាត់អាចរកប្រាក់កម្រៃបានចំណេញខ្លះ ហើយវាក៏ជាផ្នែកមួយឲ្យកសិករអាចមានទឹកចិត្តក្នុងការចិញ្ចឹម។ លោកលើកឡើងថា កសិករ យ៉ាងហោចណាស់ ៧០ ភាគរយ បោះបង់ការចិញ្ចឹមជ្រូក។
ការអនុញ្ញាតឲ្យនាំចូលជ្រូកពីក្រៅប្រទេសមានត្រឹមតែ៨០០ក្បាលប៉ុណ្ណោះក្នុងមួយថ្ងៃ ប៉ុន្តែបរិមាណជាក់ស្តែងអាចមានច្រើនជាងពាន់ក្បាល។
លោកប៉ាន់ចាន់ថេតប្រធានសមាគមផ្គត់ផ្គង់ជ្រូករស់នៅរាជធានីភ្នំពេញឲ្យដឹងថា ទោះបីតម្លៃបានឡើងថ្លៃតែបរិមាណនៃការផ្គត់ផ្គង់នៅតែមានចំនួនមួយពាន់ក្បាលក្នុងមួយថ្ងៃៗ។លោកបន្តថា៖«បើតម្លៃទៅថ្ងៃមុខប្រែប្រួលវាក៏មិនប្រែប្រួលច្រើនដែរ»៕
