ក្រុងវ៉ាស៊ីនតោនៈ លោកប្រធានាធិបតី ដូណាល់ ត្រាំ កាលពីសប្តាហ៍មុនបានឲ្យដឹងថា ការចរចាអំពីសង្គ្រាមពាណិជ្ជកម្មជាមួយប្រទេស ចិន គួរតែបញ្ចប់ក្នុងរយៈពេល ៤ សប្តាហ៍ទៀត ហើយលោកបានបង្ហាញភាពសុទិដ្ឋិនិយមអំពីការសម្រេចបានកិច្ចព្រមព្រៀងមួយ ខណៈដែលក្រុមអ្នកចរចាជាន់ខ្ពស់បានរៀបចំកិច្ចពិភាក្សាតាមទូរស័ព្ទជុំថ្មីមួយ។
លោកបានប្រាប់ក្រុមអ្នកយកព័ត៌មានថា៖ «យើងកំពុងធ្វើការងារបានយ៉ាងល្អក្នុងការចរចាជាមួយប្រទេស ចិន។ យើងកំពុងទទួលនូវអ្វីដែលយើងត្រូវតែទទួលបាន»។
នាពេលក្រោយមកក្នុងពេលអបអរពិធីមួយនៅសេតវិមានជាមួយលោក Leo Varadkar នាយករដ្ឋមន្ត្រីអៀរឡង់ លោក ត្រាំ បានទស្សន៍ទាយថា នឹងមានលទ្ធភាពក្នុងពេលដ៏ខ្លីខាងមុខនេះ។
លោកបន្ថែមថា៖ «យើងអាចនឹងទទួលបានព័ត៌មានអំពីចិន។ យើងនឹងដឹងក្នុងរយៈពេល ៣ ឬ ៤ សប្តាហ៍ទៀត»។
ក្រុមអ្នកចរចាពាណិជ្ជកម្មកំពូលៗមកពីប្រទេសទាំង ២ បានជជែកគ្នាតាមទូរស័ព្ទកាលពីថ្ងៃព្រហស្បតិ៍សប្តាហ៍មុន។ នេះបើយោងតាមទីភ្នាក់ងារព័ត៌មានផ្លូវការ Xinhua របស់ប្រទេស ចិន។
ទីភ្នាក់ងារព័ត៌មាន Xinhua បានរាយការណ៍ថា៖ «ឧបនាយករដ្ឋមន្ត្រី Liu He មានការជជែកតាមទូរស័ព្ទលើកទី ៣ ជាមួយលោក Robert Lighthizer អ្នកតំណាងពាណិជ្ជកម្មអាមេរិក និងលោក Steven Mnuchin រដ្ឋមន្ត្រីក្រសួងរតនាគារអាមេរិក ដែលបង្កើតឲ្យមានវឌ្ឍនភាពប្រកបដោយនិរន្តរភាពនៃខ្លឹមសារចរចា»។
ភាគទាំង ២ បានបញ្ជូនសារចម្រុះជុំវិញវឌ្ឍនភាពនៃការពិភាក្សាគ្នានេះដែលបង្កឲ្យមានការស្ទាក់ស្ទើររវាងការវាយតម្លៃវិជ្ជមាននានា និងបាននិយាយថា មានកិច្ចការជាច្រើនទៀតដែលត្រូវធ្វើ៕ AFP/KC
