រថយន្តស្ព័រ Porsche 718 ស៊េរីឆ្នាំ ២០២០ ក្នុងពិព័រណ៍រថយន្ត។ AFP
ក្រុងប៉ារីសៈ ទីផ្សាររថយន្តរបស់តំបន់អឺរ៉ុបបានកើនឡើង ១,២ ភាគរយ កាលពីឆ្នាំ ២០១៩ ដោយការជំរុញការលក់នៅខែធ្នូចុងឆ្នាំមុន បានបង្កើនចំនួនលក់សរុបដល់ ១៥,៣ លានគ្រឿង។ នេះបើយោងតាមសមាគមរថយន្ត ACEA កាលពីថ្ងៃព្រហស្បតិ៍។
សមាគមផលិតរថយន្តអឺរ៉ុប (ACEA) បានឲ្យដឹងថា ការផ្លាស់ប្តូរនិយតកម្មគឺជាហេតុផលដែលជួយឲ្យមានការកើនឡើងការលក់ខ្លាំង ២១,៧ ភាគរយ នៅខែធ្នូ ឆ្នាំ ២០១៩ ធៀបនឹងរយៈពេលដូចគ្នាកាលពីឆ្នាំ ២០១៨។
ក្នុងរយៈពេលពេញ ១ ឆ្នាំ ២០១៩ ក្រុមហ៊ុន Volkswagen បានលក់រថយន្តបានច្រើនជាងគេនៅអឺរ៉ុបដោយការលក់បានកើនឡើង ៣,១ ភាគរយ។ ក្រុមហ៊ុនសម្ព័ន្ធ Volkswagen រួមបញ្ចូលទាំងក្រុមហ៊ុន Audi ក្រុមហ៊ុន Porsche ក្រុមហ៊ុន Seat និង ក្រុមហ៊ុន Skoda។
ក្រុមហ៊ុន PSA របស់ប្រទេស បារាំង ជាប់ចំណាត់ថ្នាក់ទី ២ បើទោះជាបានរាយការណ៍ពីការលក់ធ្លាក់ចុះ ១,១ ភាគរយក្តី។ ក្រុមហ៊ុន PSA កាន់កាប់ក្រុមហ៊ុន Peugeot ក្រុមហ៊ុន Citroen ក្រុមហ៊ុន DS ក្រុមហ៊ុន Opel និងក្រុមហ៊ុន Vauxhall។
ទិន្នន័យរបស់ ACEA បានបង្ហាញទៀតថា ការលក់របស់ក្រុមហ៊ុន Renault របស់បារាំងដែលរួមបញ្ចូលទាំងរថយន្តម៉ាក Alpine, Dacia និង Lada បានជាប់ចំណាត់ថ្នាក់ទី ៣ ដោយការលក់បានកើនឡើង ១,១ ភាគរយ សម្រាប់រយៈពេលពេញ ១ ឆ្នាំ ២០១៩។
ACEA បានឲ្យដឹងក្នុងសេចក្តីថ្លែងការណ៍មួយថា ទីផ្សារអឺរ៉ុបបានចាប់ផ្តើមឆ្នាំ ២០១៩ ជាមួយនឹងការធ្លាក់ចុះ ប៉ុន្តែនៅត្រីមាសចុងក្រោយ ជាពិសេសខែធ្នូបានជំរុញការលក់ចូលក្នុងដែនវិជ្ជមាន»៕ KC
