ទេសចរ​ឆ្លង​កាត់​ច្រក​ព្រំដែន​មិន​ប្រែ​ប្រួល


130801_11
ទេសចរបរទេសដែលចូលមកកម្ពុជាតាមច្រកអន្តរជាតិបោយប៉ែតនាពេលកន្លងមក ស្ថានភាពភ្ញៀវចេញចូលមិនមានការប្រែប្រួលនោះទេ ទោះបីកម្ពុជាទើបបោះឆ្នោតហើយក្តី bloomberg

ភ្នំពេញៈ បើ​ទោះ​បី​ស្ថានភាព​ក្នុង​ប្រទេស​កម្ពុជា​មាន​ភាព​អាប់អួ​ខ្លះៗ​ក្រោយ​ថ្ងៃ​បោះឆ្នោត​ជ្រើស​រើស​តំណាង​រាស្រ្ត​ទើប​បាន​បញ្ចប់​ទៅ​ក្តី ក៏​ចំនួន​ភ្ញៀវ​ទេសចរ​ដែល​ចូល​មក​កាន់​កម្ពុជា​មិន​មាន​ភាព​ប្រែ​ប្រួល​នៅ​ប៉ុន្មាន​ថ្ងៃ​ចុង​ក្រោយ​នេះ។ នេះ​បើ​យោង​តាម​ការ​អះអាង​របស់​មន្ត្រី​នៅ​តាម​ច្រក​ព្រំដែន។

មន្ត្រី​នគរបាល​នៅ​តាម​ច្រក​អន្តរជាតិ បាវិត​ក្នុង​ខេត្ត ស្វាយរៀង ដែល​ថ្លែង​ក្នុង​លក្ខខណ្ឌ​មិន​បញ្ចេញ​ឈ្មោះ បាន​ប្រាប់​ភ្នំពេញ ប៉ុស្តិ៍ កាល​ពី​ថ្ងៃ​ម្សិលមិញ​ថា កាល​ពី​ថ្ងៃ​ទី៣០ ខែ​កក្កដា ចំនួន​អ្នក​ធ្វើ​ដំណើរ​ឆ្លង​កាត់​ចូល​តាម​ច្រក​នេះ​មាន​ចំនួន ១ ៩៩០ នាក់ ហើយ​ចំនួន​អ្នក​ដំណើរ​ចាក​ចេញ​មាន​ចំនួន ១ ៨៤៦ នាក់។

លោក​បាន​បញ្ជាក់​ថា ចំនួន​នេះ​ហាក់​មិន​មាន​ភាព​ប្រែ​ប្រួល​គួរ​ឲ្យ​កត់​សម្គាល់​នោះ​ទេ។ លោក​បាន​លើក​ឡើង​ថា សា្ថនភាព​ភ្ញៀវ​ធ្វើ​ដំណើរ​ហាក់​មិន​មាន​ភាព​ប្រែប្រួល​នោះ​ទេ រួម​ទាំង​អ្នក​ដំណើរ​ជនជាតិ​វៀតណាម​ចូល​មក​កាន់​កម្ពុជា​ក្នុង​រយៈ​ពេល​នេះ បើ​ទោះ​បី​ជា​ប្រទេស​កម្ពុជា​ទើប​បញ្ចប់​ការ​បោះឆ្នោត​សកល​ដែល​មិន​ទាន់​ប្រកាស​លទ្ធផល​ឈ្នះ​ចាញ់​ជា​ផ្លូវការ​ក្តី។

បើ​យោង​តាម​តួលេខ​មធ្យម​ភាគ​នៃ​ច្រក​នេះ​ចំនួន​ភ្ញៀវ​ចូល​មក​ជា​មធ្យម​មាន​ជិត ២ ២០០​នាក់​ក្នុង​មួយ​ថ្ងៃ ដោយ​រយៈ​ពេល​មួយ​ឆមាស​នេះ មាន​ចំនួន ៣៩៤ ១៨៨ នាក់។

មន្ត្រី​ខាង​លើ​បញ្ជាក់​ថា ការ​ចែក​មធ្យម​ភាគ​ខាង​លើ​នោះ មិន​អាច​កំណត់​ជា​ការ​ចូល​ប្រចាំ​ថ្ងៃ​បាន​ទេ ព្រោះ​ពេល​ខ្លះ​ភ្ញៀវ​ចូល​ច្រើន ហើយ​ពេល​ខ្លះ​ទៀត​ភ្ញៀវ​ចូល​មក​តិច។

នៅ ព្រំដែន​ជាប់​គ្នា​ជាមួយ​ភាគី​ថៃ​វិញ ការ​ធ្វើ​ដំណើរ​ចូល​មក​កាន់​កម្ពុជា​ក៏​មិន​មាន​ការ​ប្រែប្រួល​ដែរ បន្ទាប់​ពី​ការ​បោះឆ្នោត​បាន​បញ្ចប់​ទៅ​ថ្មីៗ​នេះ។

លោក សៅ ប៊ុនរិទ្ធ ប្រធាន​នគរបាល​អន្តោប្រវេសន៍​ច្រក​ទ្វារ​អន្តរជាតិ ប៉ោយប៉ែត ជាប់​ប្រទេស​ថៃ​បាន​ប្រាប់​ភ្នំពេញ ប៉ុស្តិ៍ កាល​ពី​ថ្ងៃ​ម្សិលមិញ​ថា ស្ថានភាព​ចេញ​ចូល​របស់​ភ្ញៀវ​ទេសចរ​មិន​មាន​អ្វី​ប្រែប្រួល​ទេ ដោយ​ក្នុង​មួយ​ថ្ងៃ​មាន​ចំនួន​ភ្ញៀវ​ចន្លោះ​ពី ១ ២០០ នាក់​ទៅ ១ ៣០០ នាក់​ដែល​បាន​ឆ្លង​កាត់​ច្រក​អន្តរជាតិ ប៉ោយប៉ែត។ លោក​បាន​និយាយ​ថា៖ «ខ្ញុំ​ពិនិត្យ​ឃើញ​ថា វា​មិន​មាន​អ្វី​ប្រែ​ប្រួល​នោះ​ទេ​។ ខ្ញុំ​ជឿ​ថា គេ​មាន​ការ​យល់​ដឹង​ច្រើន​ពី​កម្ពុជា»៕

ព័ត៌មានថ្មីៗ