សិង្ហបុរីៈ តម្លៃប្រេងបានងើបឡើងវិញនៅពេលបើកផ្សារក្នុងតំបន់អាស៊ី កាលពីព្រឹកថ្ងៃអង្គារពេលមានវិធានការរបស់ធនាគារកណ្តាលអាមេរិកដើម្បីជួយជ្រោមជ្រែងសេដ្ឋកិច្ចដែលវាយប្រហារដោយវីរុសកូរ៉ូណា។
សន្ទស្សន៍តម្លៃប្រេង West Texas Intermediate ដែលទីផ្សារអាមេរិកត្រូវការបានហក់ឡើង ៤,៣ ភាគរយ មានតម្លៃ ២៤ ដុល្លារក្នុង ១ បារ៉ែល ខណៈសន្ទស្សន៍តម្លៃប្រេងឆៅ Brent ដែលពេញនិយមនៅលើទីផ្សារអន្តរជាតិបានកើនឡើង ៣,៨ ភាគរយដោយមានតម្លៃ ២៨ ដុល្លារក្នុង ១ បារ៉ែល។
តម្លៃប្រេងបានធ្លាក់ចុះខ្លាំងក្នុងប៉ុន្មានសប្តាហ៍នេះគឺពេលមានភាពជាប់គាំង និងការរឹតត្បិតការធ្វើដំណើរដើម្បីប្រយុទ្ធប្រឆាំងនឹងការរីករាលដាលវីរុសកូរ៉ូណា និងអ្នកផលិតប្រេងឈានមុខគឺ អារ៉ាប៊ី សាអ៊ូឌីត និងរុស្ស៊ីកំពុងជាប់ផុងក្នុងសង្គ្រាមតម្លៃ។
ធនាគារកណ្តាលអាមេរិកបានបញ្ចេញវិធានការដ៏ច្រើនបន្ថែមទៀត ដើម្បីគាំទ្រដល់សេដ្ឋកិច្ចកាលពីថ្ងៃចន្ទ ដោយរួមបញ្ចូលទាំងការទិញមិនកំណត់ចំនួននៃបំណុលរតនាគារអាមេរិក និងការផ្តល់ជម្រើសថ្មីដើម្បីផ្តល់កម្ចីផ្ទាល់ដល់ក្រុមហ៊ុនខ្នាតតូច និងមធ្យម។
ទោះយ៉ាងណាការកើនឡើងតម្លៃផ្សារហ៊ុន និងប្រេងឆៅត្រូវបានបិទបាំងទៅវិញពេលបក្សប្រជាធិបតេយ្យជាថ្មីម្តងទៀតបានទប់ស្កាត់នូវកញ្ចប់ថវិកាសង្គ្រោះសេដ្ឋកិច្ចដ៏ធំមហិមាសម្រាប់សេដ្ឋកិច្ចអាមេរិក។
សេចក្តីស្នើច្បាប់ដែលបានស្នើប្រាក់សម្រាប់គ្រួសារជនជាតិអាមេរិក អាជីវកម្មរាប់ម៉ឺនដែលបានបិទទ្វារ ឬទទួលរងការលំបាក និងការបំពាក់ឧបករណ៍នៅតាមមន្ទីរសុខាភិបាលរបស់ប្រទេស។
លោក Stephen Innes ប្រធានផ្នែកយុទ្ធសាស្ត្រទីផ្សារនៃក្រុមហ៊ុន AxiCorp បាននិយាយថា ភាពសុទិដ្ឋិនិយមចំពោះកញ្ចប់ថវិកានោះបានជួយធ្វើឲ្យទីផ្សារប្រេងលក់ដាច់ជាងមុន។
ទោះបីយ៉ាងណាលោកបានអះអាងដោយប្រុងប្រយ័ត្នថា៖ «បញ្ហានៅត្រង់ថា លុយទាំងអស់នៅក្នុងពិភពលោកនឹងមិនទៅដល់ដៃប្រជាជនទេ ដរាបណាវីរុសនៅតែរីករាលដាល និងការហាមប្រាមការធ្វើដំណើរនៅតែមាន»៕ RR