ក្រុងប៊ែរឡាំងៈ ធនាគារធំចំនួន ២ គឺធនាគារ Deutsche Bank និងធនាគារ Commerzbank របស់ប្រទេស អាល្លឺម៉ង់ មានផែនការចាប់ផ្តើមពិភាក្សាជាផ្លូវការឆ្ពោះទៅរកលទ្ធភាពនៃការច្របាច់បញ្ចូលគ្នា បន្ទាប់ពីមានការចរចាបឋមអស់រយៈពេលជាច្រើនខែ។ នេះបើយោងតាមសេចក្តីរាយការណ៍របស់ប្រព័ន្ធផ្សព្វផ្សាយអាល្លឺម៉ង់។
រដ្ឋាភិបាលអាល្លឺម៉ង់បាននិងកំពុងលើកទឹកចិត្តឲ្យធនាគារធំទាំង ២ នេះ ព្យាយាមស្វែងរកការចរចាអំពីការច្របាច់បញ្ចូលគ្នា និងបង្កើតជាក្រុមហ៊ុនជាតិដ៏ធំមួយក្នុងសេវាហិរញ្ញវត្ថុ ដើម្បីប្រកួតប្រជែងកាន់តែប្រសើរនៅលើឆាកអន្តរជាតិ។
កាលពីសប្តាហ៍មុន លោក Olaf Scholz រដ្ឋមន្ត្រីក្រសួងហិរញ្ញវត្ថុរបស់អាល្លឺម៉ង់ បានបញ្ជាក់ថា «មានការពិភាក្សាអំពីស្ថានភាពនេះ» រវាងធនាគារទាំង ២ ដោយរដ្ឋាភិបាលធ្វើជា «ដៃគូស្មើភាព» មួយ ចំពោះការចរចានេះ។
កាលពីថ្ងៃអាទិត្យ កាសែត Die Welt បានរាយការណ៍ថា ធនាគារទាំង ២ ត្រូវបានរំពឹងថា នឹងចេញផ្សាយកំណត់សម្គាល់បណ្តោះអាសន្នមួយ ដោយប្រកាសអំពីដំណាក់កាលបន្ទាប់នៃការចរចានេះ។
កាសែត Die Welt បានរាយការណ៍ថា៖ «ក្រុមប្រឹក្សាភិបាលរបស់ធនាគារទាំង ២ បាននិងកំពុងស្វែងរកការចរចាអស់រយៈពេលជាយូរមកហើយថា តើធនាគារទាំង ២ នឹងស័ក្តិសមច្របាច់បញ្ចូលគ្នាឬយ៉ាងណា?»។ កាសែតនេះបានឲ្យដឹងទៀតថា៖ «ដោយត្រូវបានជំរុញដោយអ្នកនយោបាយក្នុងទីក្រុងប៊ែរឡាំង ការពិភាក្សានានាកំពុងដើរឆ្ពោះទៅរកជុំបន្ទាប់»។
ទីភ្នាក់ងារព័ត៌មាន DPA ក៏រាយការណ៍ផងដែរថា ធនាគារទាំង ២ រំពឹងថានឹងបង្កើនល្បឿននៃការចរចា៕ AFP/KC