ទីក្រុងអាប៊ូដាប៊ីៈ ធនាគារកណ្ដាលប្រទេសអេមីរ៉ាតអារ៉ាប់រួម (CBUAE) បានឲ្យដឹងកាលពីថ្ងៃអាទិត្យថា ខ្លួនបានបង្កើនទឹកប្រាក់ទ្វេដងដល់ចំនួន ៧០ ពាន់លានដុល្លារសម្រាប់កញ្ចប់លើកទឹកចិត្ត ដើម្បីគាំទ្រសេដ្ឋកិច្ចចំពេលការរីករាលដាលវីរុសកូរ៉ូណា។
ធនាគារកណ្ដាលមួយនេះបានឲ្យដឹងថា៖ «តម្លៃសរុបនៃមូលធនទាំងអស់ និងវិធានការសន្ទនីយភាពដែលអនុម័តដោយ CBUAE កាលពីថ្ងៃ ១៤ មីនាឆ្នាំ ២០២០ បានកើនឡើងដល់ ២៥៦ ពាន់លាន dirhams($៧០ ពាន់លាន)»។
កាលពីខែមុន UAE ដែលសម្បូរប្រេងនេះបានប្រកាសការលើកទឹកចិត្តមានតម្លៃ ៣៥ ពាន់លានដុល្លារ ដែលបានដាក់បញ្ចូលជំនួយដល់ប្រព័ន្ធធនាគារដូចជាការផ្តល់កម្ចី និងការចាក់បញ្ចូលទៅផ្សារហ៊ុន។
វិធានការថ្មីៗបានផ្ដោតសំខាន់លើការបន្ធូរបន្ថយលក្ខខណ្ឌតម្រូវផ្នែកហិរញ្ញវត្ថុ និងសន្ទនីយភាពសម្រាប់ធនាគារដើម្បីបញ្ចេញសាច់ប្រាក់។
នៅក្នុងវិធានការថ្មីៗធនាគារកណ្ដាលនេះបានកាត់បន្ថយទុនបម្រុងចំនួនពាក់កណ្ដាលមកនៅត្រឹម ៧ ភាគរយដែលធនាគារជាច្រើនត្រូវតម្រូវឲ្យមានដើម្បីរក្សាសម្រាប់តម្រូវការប្រាក់បញ្ញើដែលអាចត្រូវបានដកដោយអតិថិជននៅពេលណាក៏បាន។
លោក Abdulhamid Saeed ប្រធានធនាគារបានថ្លែងថា៖ «វិធានការបន្ថែមដែលបានប្រកាសនៅថ្ងៃនេះនឹងជួយសម្រាលសម្ពាធប្រកបដោយប្រសិទ្ធភាពលើគ្រឹះស្ថានហិរញ្ញវត្ថុដែលផ្ដល់ជំនួយសង្គ្រោះដែលត្រូវការ និងបន្តលទ្ធភាពទទួលបានមូលនិធិសម្រាប់ក្រុមហ៊ុន និងគ្រួសារ»៕ LA