ពលរដ្ឋនេប៉ាល់តម្រង់ជួរ ដើម្បីទទួលបានលិខិតធ្វើការនៅបរទេស។ រូប ANN
ក្រុងកាត់ថ្មាន់ឌូៈ ប្រាក់បញ្ញើត្រឡប់មកផ្ទះរបស់ពលករនេប៉ាល់ក្នុងរយៈពេល ៧ ខែដំបូងនៃឆ្នាំសារពើពន្ធ បានកើនឡើង ២៨,៥ ភាគរយធៀបនឹងរយៈពេលដូចគ្នាកាលពីឆ្នាំមុន ដែលផ្តល់ការការពារដែលត្រូវការយ៉ាងខ្លាំងដល់ទុនបម្រុងរូបិយប័ណ្ណអន្តរជាតិដែលកំពុងធ្លាក់ចុះរបស់ប្រទេសនេះ។
យោងតាមរបាយការណ៍ស្តីពីម៉ាក្រូសេដ្ឋកិច្ចចុងក្រោយបំផុតដែលចេញផ្សាយដោយធនាគារ Nepal Rastra Ba-nk ដែលជាធនាគារកណ្តាលរបស់ប្រទេស នេប៉ាល់ បានឲ្យដឹងថា ប្រាក់ដែលត្រូវបានផ្ញើត្រឡប់មកផ្ទះដោយពលករចំណាកស្រុកនេប៉ាល់ដែលកំពុងធ្វើការក្នុងប្រទេសផ្សេងៗ សរុបមានចំនួន ៥១៥,៥៥ ពាន់លានរូបពី (ប្រហែល ៤,៦៦ ពាន់លានដុល្លារ) ក្នុងអំឡុងពីពាក់កណ្តាលខែកក្កដា ឆ្នាំ ២០១៨ ដល់ពាក់កណ្តាលខែកុម្ភៈ ឆ្នាំ ២០១៩ បើទោះជាការចាកចេញទៅធ្វើការរបស់ពលករធ្លាក់ចុះខ្លាំងក៏ដោយ។
អ្នកជំនាញផ្នែកឧស្សាហកម្មនេះឲ្យដឹងថា ការកើនឡើងប្រាក់បញ្ញើនេះគឺដោយសារការកើនឡើងការប្រើប្រាស់បណ្តាញផ្ញើប្រាក់ផ្លូវការដោយពលករសម្រាប់ការផ្ញើប្រាក់មកផ្ទះ។
លោក Suman Pokharel អគ្គនាយកក្រុមហ៊ុន IME Remit ដែលជាក្រុមហ៊ុនមួយក្នុងចំណោមក្រុមហ៊ុនផ្តល់សេវាផ្ញើប្រាក់ធំបំផុតក្នុងប្រទេស នេប៉ាល់ ថ្លែងថា៖ «ការប្រើប្រាស់បណ្តាញក្រៅផ្លូវការដើម្បីផ្ទេរប្រាក់បានធ្លាក់ចុះក្នុងរយៈពេលថ្មីៗនេះ»។
លោកមានប្រសាសន៍ថា៖ «និន្នាការនេះនឹងបន្តកើនឡើងក្នុងពេលខាងមុខ ដោយរដ្ឋាភិបាលកំពុងអនុវត្តវិធានការតឹងរ៉ឹងប្រឆាំងនឹងអ្នកផ្ញើប្រាក់ខុសច្បាប់ ហើយការណ៍នេះនឹងជួយជំរុញកំណើនប្រាក់បញ្ញើបន្ថែមទៀតក្នុងពេលអនាគត»។
ក្រុមអ្នកជំនាញបានឲ្យដឹងថា ហេតុផលមួយនៃការកើនឡើងលំហូរចូលប្រាក់បញ្ញើត្រឡប់មកផ្ទះនេះគឺដោយសារការផ្ទេរប្រាក់ទៅកាន់ប្រទេស នេប៉ាល់ ពីទិសដៅការងារថ្មីៗតាមរយៈបណ្តាញផ្លូវការ។
បច្ចុប្បន្ន ៣៥ ទៅ ៤០ ភាគរយនៃប្រាក់បញ្ញើប្រចាំឆ្នាំចូលក្នុងប្រទេស នេប៉ាល់ តាមបណ្តាញផ្លូវការ៕ ANN/KC
