ក្រុងប៉ារីសៈ គណៈកម្មការពិភពលោកខាងផ្នែកបម្រែបម្រួលអាកាសធាតុបានព្រមានកាលពីថ្ងៃអង្គារថា បណ្ដាប្រទេសអ្នកមាន និងប្រទេសក្រីក្រ ត្រូវតែវិនិយោគនៅពេលនេះដើម្បីទប់ស្កាត់ផលប៉ះពាល់ការប្រែប្រួលអាកាសធាតុ បើមិនអ៊ីចឹងទេនឹងទទួលលទ្ធផលកាន់តែធ្ងន់ធ្ងរជាងនេះនៅពេលក្រោយ។
របាយការណ៍បានពីគណៈកម្មការបន្សុំាបរិយាកាសពិភពលោកបានលើកឡើងថា ការចំណាយ ១,៨ ពាន់ពាន់លានដុល្លារក្នុងវិស័យសំខាន់ៗចំនួន ៥ ក្នុងពេលមួយទសវត្សរ៍ក្រោយនឹងមិនគ្រាន់តែជួយទប់ស្កាត់ផលប៉ះពាល់អាក្រក់បំផុត ដោយសារការកើនឡើងកម្ដៅលើពិភពលោកប៉ុណ្ណោះទេ ប៉ុន្តែថែមទាំងអាចរកប្រាក់ចំណេញសុទ្ធជាង ៧ ពាន់ពាន់លានដុល្លារថែមទៀតផង។
លោក បាន គីមូន អតីតអគ្គលេខាធិការអង្គការសហប្រជាជាតិដែលដឹកនាំ គណៈកម្មការនេះបានឲ្យដឹងនៅក្នុងកម្មវិធីចេញផ្សាយរបាយការណ៍នេះនៅក្រុងប៉េកាំង ប្រទេសចិនថា៖ «យើងគឺជាមនុស្សជំនាន់ចុងក្រោយដែលអាចផ្លាស់ប្តូរដំណើរនៃការប្រែប្រួលអាកាសធាតុ ហើយយើងគឺជាមនុស្សជំនាន់ដំបូងគេផងដែរ ដែលបន្ទាប់មកត្រូវតែរស់នៅជាមួយនឹងផលវិបាក»។
របាយការណ៍នេះបានឲ្យដឹងថា ការវិនិយោគនៅពេលនេះលើប្រព័ន្ធប្រកាសអាសន្នដំបូង ហេដ្ឋារចនាសម្ព័ន្ធដែលធន់នឹងអាកាសធាតុ ការការពារព្រៃកោងកាង កសិកម្មកាន់តែប្រសើរ និងកែលម្អប្រភពទឹកសាបនឹងចំណាយសម្រាប់ខ្លួនឯង។
ឧទាហរណ៍ ព្រៃកោងកាងដែលជាព្រៃទឹកនាចត្រូពិកការពារប្រឆាំងនឹងការកើនឡើងនៃព្យុះ និងដើរតួនាទីជាកន្លែងសម្រាប់ជលផលពាណិជ្ជកម្ម ប៉ុន្តែយ៉ាងហោចណាស់ ១ ភាគ ៣ នៃព្រៃទាំងនោះនៅទូទាំងពិភពលោកត្រូវបានគេបំផ្លាញសម្រាប់វិស័យទេសចរណ៍ ឬវារីវប្បកម្ម។
របាយការណ៍នេះបានលើកឡើងថា៖ «ការចាត់សកម្មភាពពិភពលោកដើម្បីបន្ថយល្បឿនការប្រែប្រួលអាកាសធាតុមានសក្តានុពលខ្លាំង ប៉ុន្តែមិនមានការធ្វើឲ្យគ្រប់គ្រាន់នោះទេ»។
របាយការណ៍ដដែលបានបន្តឲ្យដឹងថា៖ «យើងត្រូវតែវិនិយោគលើកិច្ចខិតខំប្រឹងប្រែងដ៏ធំមួយក្នុងការបន្សុំាខ្លួនទៅនឹងលក្ខខណ្ឌនានា ដែលពេលនេះមិនអាចចៀសរួច»។
បើគ្មានការចាត់សកម្មភាពនៅត្រឹមឆ្នាំ ២០៣០ នោះទេ ការប្រែប្រួលអាកាសធាតុអាចជំរុញប្រជាជនជាង ១០០ លាននាក់នៅក្នុងប្រទេសកំពុងអភិវឌ្ឍន៍ឲ្យធ្លាក់មកនៅក្រោមបន្ទាត់ក្រីក្រ។ នេះបើយោងតាមរបាយការណ៍ដដែលនេះ៕ LA