មន្ត្រី​បាន​ច្រាន​ចោល​សំណើ​របស់​វិស័យ​ឯកជន


ភ្នំពេញៈ មន្ត្រី​ជាន់​ខ្ពស់​កម្ពុជា​និយាយ​ថា ការ​ស្នើ​របស់​វិស័យ​ឯកជន​ឲ្យ​មាន​ការ​ធ្វើ​វិសោធន​កម្ម​ច្បាប់​ស្តីពី សារពើ​ពន្ធ​ទំនង​ជា​មិន​អាច​ធ្វើ​បាន​ទេ។ ការលើក​ឡើង​បែបនេះ​ត្រូវ បាន​ធ្វើ​ឡើង​កាល​ពីថ្ងៃ​ទី​១៩ នៅ​ពេល​កម្ពុជា​ចុះ​ហត្ថ​លេខា​ទទួល​​យក​ម៉ាស៊ីន​ស្កែន​កុងតឺន័រ ចំនួន​បួន​គ្រឿង​មាន​តម្លៃ​ជិត​ ១៤ លាន​ដុល្លារ​ពី​ប្រទេស​ចិន។

លោក គាត ឈន់ រដ្ឋ​មន្ត្រី​ក្រសួង​សេដ្ឋកិច្ច និង​ហិរញ្ញ​វត្ថុ​បាន​និយាយ​ថា ការ​ប្រមូល​ពន្ធ​នៅ​កម្ពុជា​នៅ​មាន​លទ្ធភាព​ច្រើន ហើយ​ការ​ប្រមូល​ពន្ធ​នា​ពេល​បច្ចុប្បន្ន​មិន​ទាន់​គ្រប់​ផែន​ការ​ដែល​រដ្ឋាភិបាល​ចង់​បាន​នៅ​ឡើយ​ទេ។

លោកបន្ត​ថា៖ «ពន្ធដារ​របស់​យើង​ប្រមូល​មិន​ទាន់​ដល់​កម្រិត​នៅ​ឡើយ​ទេ ហើយ​ប្រសិន​បើ​យើង​បន្ធូ​រដៃ​ទៅ ក៏​[យើង]​មិន​បាន​​សម្រេច​ដែរ​ ព្រោះ​ថា យើង​បច្ចុប្បន្ន​នេះ​មាន​គោល​ដៅ​មួយ​ជា​យុទ្ធ​សាស្រ្ត​តែ​ម្តង គឺ​បង្កើន​ចំណូល​ឲ្យ​បាន​លើស​ឬ​នៅ​ជុំវិញ ០,៥ ភាគរយ​នៃ ផ.ស.ស (ផលិត​ផល​ក្នុង​ស្រុក​សរុប) ជា​កំណើន​ពី​មួយ​ឆ្នាំ​ទៅ​មួយ​ឆ្នាំ»។

លោក រដ្ឋមន្ត្រី​បន្ថែម​ថា៖​«នេះ​ជា​មហិច្ឆតា​មួយ​ខ្ពស់​ណាស់។ ជា​ទស្សនៈ​របស់​ខ្ញុំ សូម​យើង​កុំ​ធ្វើ​នយោបាយ​លក់​អនាគត។ ក្នុង​ន័យ​ថា បើ​យើង​​មិន​ទាន់​ប្រឹង​ប្រែង​ធ្វើ​ការងារ​ផង យើង​ចង់​បាន​ផាសុកភាព​ទៅ​ហើយ»។

ការលើកឡើង​របស់​មន្ត្រី​ជាន់​ខ្ពស់​រូប​នេះ ប្រៀប​បាន​នឹង​ការ​បដិសេធ​ទៅ​នឹង​សំណូមពរ​របស់​វិស័យ​​ឯកជន​ដែល​បាន​លើក​ឡើង​ក្នុង​ពេល កន្លង​ក្នុង​ជួប​គ្នា​ដ៏​កម្រ​មួយ​របស់​មន្ត្រី​អគ្គនាយក​ដ្ឋាន​ពន្ធដារ និង​វិស័យ​ឯកជន​ដែល​មាន​ធុរ​ជន​ជាង​ ១០០ នាក់​នៅ​សភា​ពាណិជកម្ម​កម្ពុជា។

ក្នុងជំនួបនោះ លោក​គិត ម៉េង បាន​ហៅ​ច្បាប់​ស្តី​ពី​សារពើ​ពន្ធ​នោះថា បាន​អនុម័ត​ជាង ១០​ឆ្នាំ​កន្លង​មក​នៅ​កម្ពុជា​និង វា​មិន​ស៊ី​គ្នា​ទៅ​នឹង​ស្ថានភាព​សេដ្ឋកិច្ច​បច្ចុប្បន្ន​នេះ​ទេ ស្រប​ពេល​ដែល​កម្ពុជា​​ត្រូវ​ធ្វើ​សមាហរណ​កម្ម​ទៅ​ក្នុង​សមាគម​សេដ្ឋកិច្ច​អាស៊ាន​ដែល​នឹង​មក​ដល់​នៅ​ឆ្នាំ​២០១៥។ វិស័យ​ឯកជន​បាន​​ស្នើ​ឲ្យ​បន្ទាប​អាករ​លើ​តម្លៃ​បន្ថែម ​(VAT)​ ពី​ ១០ ភាគរយ មក​នៅ​ត្រឹម​ ៧ ​ភាគរយ​ដូច​ប្រទេស​សមាជិក​អាស៊ាន​ផ្សេង​ទៀត​មាន​ថៃ​ជាដើម។

លោក អ៊ិន ចាន់នី ប្រធាន​អគ្គនាយក​ប្រតិបត្តិ​ធនាគារ​អេស៊ីលីដា​ដែល​បាន​ចូល​រួម កិច្ច​ប្រជុំ​នោះ​ដែរ បាន​ប្រាប់​ភ្នំពេញ ប៉ុស្តិ៍​ កាល​ពី​ថ្ងៃ​ម្សិល​មិញ​ថា ប្រទេស​ជាតិ​មួយ​មាន​ភាព​រីក​ចម្រើន​ដោយសារ​ការ​ប្រមូល​ពន្ធ​បាន ច្រើន ហើយ​ ប្រជា​ពលរដ្ឋ​មាន​កាតព្វកិច្ច​បង់​ពន្ធ​ឲ្យ​បាន​ត្រឹម​ត្រូវ ដោយ​មិន​បែង​ចែក​តួនាទី​ឬ​ឋានៈ​សង្គម​នោះ​ទេ។

លោកបានបន្ត​ថា៖ «ខ្ញុំ​គិត​ថា ពន្ធ​នេះ​មិន​ច្រើន​ពេក​ទេ តែ​យើង​សូម​ជំរុញ​ឲ្យ​បង់​ពន្ធ​ឲ្យ​គ្រប់​គ្នា។ យើង​ជា​ប្រជា​ពលរដ្ឋ យើង​ត្រូវ​បំពេញ​កាតព្វកិច្ច​បង់​ពន្ធ​ឲ្យ​បាន​ត្រឹម​ត្រូវ»៕

ព័ត៌មានថ្មីៗ