ក្រុងវ៉ាស៊ីនតោនៈ មូលនិធិរូបិយវត្ថុអន្តរជាតិ (IMF) កាលពីថ្ងៃពុធបានអនុម័តជាផ្លូវការនូវកញ្ចប់ជំនួយ ៥០ ពាន់លានដុល្លារដែលមានបំណងជួយប្រទេសអាហ្សង់ទីន ដើម្បីទប់ទល់ទៅនឹងអតិផរណា ឱនភាពថវិកា និងការធ្លាក់ចុះតម្លៃរូបិយប័ណ្ណ។
.jpg)
ក្រុមប្រឹក្សាភិបាលរបស់មូលនិធិនេះបានអនុម័តកិច្ចព្រមព្រៀងនេះដែលប្រទេសអាហ្សង់ទីនបានសម្រេចជាមួយបុគ្គលិករបស់មូលនិធិ IMF កាលពីដើមខែនេះ។
យោងតាមមូលនិធិ IMF ប្រទេសអាហ្សង់ទីនគ្រោងនឹងប្រើប្រាស់ទឹកប្រាក់ចំនួន ១៥ ពាន់លានដុលា្លរដំបូងនៃកម្មវិធីជំនួយនេះដែលក្នុងចំណោមនោះ ពាក់កណ្ដាលនឹងត្រូវបានប្រើប្រាស់សម្រាប់ការគាំទ្រថវិកា ខណៈប្រាក់នៅសល់ចំនួន ៣៥ ពាន់លានដុល្លារទៀតសម្រាប់ទុកជា «ការត្រៀមបង្ការ»។
លោកស្រី Christine Lagarde នាយកគ្រប់គ្រងរបស់មូលនិធិ IMF បានសរសើរយ៉ាងខ្លាំងដល់ផែនការសម្រាប់កំណែទម្រង់សេដ្ឋកិច្ចរបស់ប្រទេសអាហ្សង់ទីន ប៉ុន្តែបានទទូចឲ្យការសម្រេចចិត្តនេះត្រូវធ្វើនៅទីក្រុងប៊ុយណូស៊ែ និងមិនត្រូវប្រកាសជាផ្លូវការចេញពីមូលនិធិដែលមានមូលដ្ឋាននៅទីក្រុងវ៉ាស៊ីនតោនមួយនេះទេ។
លោកស្រីបានប្រាប់ក្រុមអ្នកយកព័ត៌មានកាលពីថ្ងៃពុធថា៖ «ការអនុម័តនៅថ្ងៃនេះគឺជាភ័ស្ដុតាងដ៏ច្បាស់លាស់នៃទំនុកចិត្តរបស់សហគមន៍អន្តរជាតិមួយនេះលើការជំរុញកំណែទម្រង់របស់ប្រទេសអាហ្សង់ទីន និងគាំទ្រផែនការសេដ្ឋកិច្ចរបស់រដ្ឋាភិបាលដែលបានគាំទ្រដោយមូលនិធិ IMF»។
លោកស្រីបន្ថែមថា៖ «នេះគឺជាផែនការមួយដែលត្រូវបានបង្កើតឡើង ហើយត្រូវបានគ្រប់គ្រងដោយអាជ្ញាធរអាហ្សង់ទីន។ អាជ្ញាធរអាហ្សង់ទីនពិចារណាលើស្ថានការណ៍ក្នុងស្រុករបស់ពួកគេ។ វាត្រូវបង្កើនល្បឿនឆ្ពោះទៅរកការពង្រឹងសេដ្ឋកិច្ច ដើម្បីអត្ថប្រយោជន៍របស់ប្រជាជនអាហ្សង់ទីនទាំងអស់»។
ការតវ៉ាប្រឆាំងតាមដងផ្លូវ និងការគំរាមកំហែងធ្វើបាតុកម្មដោយកម្មករបានស្វាគមន៍ការសម្រេចចិត្តរបស់លោកប្រធានាធិបតីអាហ្សង់ទីន Mauricio Macri ក្នុងការស្វែងរកការផ្ដល់ហិរញ្ញប្បទានរបស់មូលនិធិ IMF។
អាហ្សង់ទីនមានប្រវត្តិសាស្ដ្រដ៏ជូរចត់ជាមួយមូលនិធិដែលផ្តល់កម្ចីដោះស្រាយវិបត្តិពិភពលោកមួយនេះដែលប្រជាជនអាហ្សង់ទីនជាច្រើនមើលឃើញថាបានដាក់លក្ខខណ្ឌដ៏តឹងរ៉ឹងដែលបានធ្វើឲ្យប៉ះពាល់កាន់តែខ្លាំងដល់សេដ្ឋកិច្ចកាលពី ១៧ ឆ្នាំមុន។
លោកស្រី Lagarde បានឲ្យដឹងកាលពីថ្ងៃពុធថាមូលនិធិ IMF សម្រេចបានកិច្ចព្រមព្រៀងមួយជាមួយទីក្រុងប៊ុយណូស៊ែជាមួយនឹង «ការគោរពយ៉ាងខ្លាំង និងការយកចិត្តទុកដាក់យ៉ាងខ្លាំងទៅនឹងស្ថានការណ៍ក្នុងស្រុករបស់ប្រជាជនអាហ្សង់ទីនទាំងអស់»៕ LA
