ភ្នំពេញ: រដ្ឋាភិបាល និងវិស័យឯកជនកាលពីថ្ងៃទី ១៦ ខែមករា បានប្រកាសគម្រោង «លើកកម្ពស់ចំណេះដឹងផ្នែកហិរញ្ញវត្ថុសម្រាប់ស្ត្រី និងស្ត្រីសហគ្រិន» ក្នុងគោលបំណងពង្រឹង និងពង្រីកចំណេះដឹងផ្នែកហិរញ្ញវត្ថុសម្រាប់ស្ត្រីឆ្ពោះទៅរកការអភិវឌ្ឍដល់ស្ត្រីជាសហគ្រិនក្នុងការរួមចំណែកបង្កើនផលិតភាព និងប្រសិទ្ធភាពក្នុងការអភិវឌ្ឍសេដ្ឋកិច្ច និងសង្គម។
ក្រសួងកិច្ចការនារី ធនាគារជាតិនៃកម្ពុជាបានសហការជាមួយដៃគូអភិវឌ្ឍគម្រោង «ការលើកកម្ពស់ចំណេះដឹងផ្នែកហិរញ្ញវត្ថុសម្រាប់ស្ត្រី និងស្ត្រីសហគ្រិន» ដើម្បីបញ្ជ្រាបចំណេះដឹងផ្នែកហិរញ្ញវត្ថុ ការគ្រប់គ្រងហិរញ្ញវត្ថុ បច្ចេកវិទ្យាព័ត៌មាន និងសារគមនាគមន៍ (ICT) សម្រាប់អភិវឌ្ឍសហគ្រិនភាព និងការទទួលបានសេវាហិរញ្ញវត្ថុប្រកបដោយសុវត្ថិភាព។
នៅក្នុងគម្រោងនេះក្រុមហ៊ុន Visa បានជំនួយហិរញ្ញវត្ថុ ៥០ ០០០ ដុល្លារសម្រាប់ក្រសួងកិច្ចការនារី ដើម្បីលើកកម្ពស់ចំណេះដឹងហិរញ្ញវត្ថុសម្រាប់ស្ត្រី និងសហគ្រិនស្ត្រីនៅតាមតំបន់ជនបទក្នុងប្រទេសកម្ពុជា។ គម្រោងមានរយៈពេល ១២ ខែចាប់ពីខែសីហា ឆ្នាំ ២០១៩ ដល់ ខែសីហា ឆ្នាំ ២០២០ ដែលអនុវត្តនៅខេត្តចំនួន ៤ គឺខេត្តក្រចេះ ស្ទឹងត្រែង ព្រះវិហារ និងសៀមរាប។
លោកស្រី ជុំ ម៉ូនីកា នាយិកាក្រុមហ៊ុន Visa ប្រចាំប្រទេសកម្ពុជាបានថ្លែងក្នុងសិក្ខាសាលាផ្សព្វផ្សាយស្តីពីការចាប់ផ្តើមគម្រោងនេះកាលពីថ្ងៃព្រហស្បតិ៍ថា គម្រោងនេះនឹងជួយលើកកម្ពស់ការគ្រប់គ្រងហិរញ្ញវត្ថុរបស់ស្ត្រីឲ្យកាន់តែប្រសើរ ហើយវាក៏នឹងធ្វើឲ្យជីវភាពរបស់ពួកគេធូរធារជាងមុន។
លោកស្រីបន្តថា៖ «នៅពេលមនុស្សម្នាក់ៗត្រូវបានលើកកម្ពស់វានឹងធ្វើឲ្យសេដ្ឋកិច្ចកាន់តែប្រសើរ សហគមន៍ក៏មានការរីកលូតលាស់ អាជីវកម្មខ្នាតតូចនឹងមានស្ថិរភាព និងរីកចម្រើន បំណុលគ្រួសារកាន់តែអាចគ្រប់គ្រងបានយ៉ាងងាយស្រួល ហើយប្រាក់ចំណូលគ្រួសារនឹងមានការកើនឡើងផងដែរ»។
យោងតាមរបាយការណ៍របស់មូលនិធិរូបិយវត្ថុអន្តរជាតិ (IMF) សហគ្រិនស្ត្រីនៅកម្ពុជាខ្វះជំនាញ ខ្វះភាពជាអ្នកដឹកនាំក្នុងអាជីវកម្ម ខណៈ ៩០ ភាគរយនៃចំណូលនៅក្នុងវិស័យ SME បានមកពីអាជីវកម្មគ្រប់គ្រងដោយស្ត្រី។
លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារីថ្លែងថា កង្វះចំណេះដឹង ផ្នែកហិរញ្ញវត្ថុនឹងជំរុញឲ្យស្ត្រីនឹងចងការប្រាក់ពីវិស័យឯកជនក្រៅផ្លូវការដែលអត្រាការប្រាក់ខ្ពស់។ លោកស្រីបន្តថា៖ «ដើម្បីកាត់បន្ថយភាពងាយរងគ្រោះរបស់សហគ្រិនស្ត្រីដែលបណ្តាលមកពីកង្វះចំណេះដឹងផ្នែកហិរញ្ញវត្ថុនេះ គម្រោងនេះនឹងផ្តល់វគ្គបណ្តុះបណ្តាលផ្នែកហិរញ្ញវត្ថុដល់ពួកគេ»។
លោកបញ្ជាក់ថា៖ «ស្ត្រីសហគ្រិននឹងទទួលបានសមត្ថភាព ភាពជឿជាក់ ទំនុកចិត្តក្នុងការគ្រប់គ្រងហិរញ្ញវត្ថុគ្រួសារ និងចូលរួមធ្វើសេចក្តីសម្រេចផ្នែកហិរញ្ញវត្ថុក្នុងគ្រួសារផងដែរ»។
នៅកម្ពុជាមានសហគ្រាសសរុប ៥១៣ ៧៥៩ ក្នុងនោះជាង ៩៧ ភាគរយជាសហគ្រាសខ្នាតតូច និង ២,២ ភាគរយជាសហគ្រាសខ្នាតមធ្យម ហើយស្ត្រីគ្រប់គ្រង SME ២៦ ភាគរយ និងសហគ្រាសលក្ខណៈគ្រួសារ ៦២ ភាគរយ។ នេះបើតាមរបាយការណ៍ក្រសួងឧស្សាហកម្ម និងសិប្បកម្ម។
លោកស្រី នាវ ច័ន្ទថាណា ទេសាភិបាលរងធនាគារជាតិនៃកម្ពុជាបានថ្លែងថា ការទទួលបានចំណេះដឹងផ្នែកហិរញ្ញវត្ថុគឺជាមូលដ្ឋានគ្រឹះក្នុងការលើកកម្ពស់បរិយាប័ន្នហិរញ្ញវត្ថុនៅកម្ពុជា។ លោកស្រីបន្តថា៖ «ចំពោះប្រជាជននឹងជួយសម្រួលជីវភាពរស់នៅការផ្តល់លទ្ធភាពឲ្យមានការសន្សំហិរញ្ញវត្ថុ ការបង្កើនគុណភាពធុរកិច្ច ហើយសហគ្រាសធុនតូច និងមធ្យមនឹងទទួលបានការបង្កើនលទ្ធភាពវិនិយោគ ការទទួលបានសេវាប្រឹក្សាជាដើម»។
លោកស្រីបានឲ្យដឹងទៀតថា កម្រិតបរិយាប័ន្នហិរញ្ញវត្ថុសម្រាប់ប្រជាជនទាំង ២ ភេទដោយស្ត្រីខ្ពស់ជាងបុរសបន្តិចគឺ ៧៣ ភាគរយ ហើយបុរស ៦៩ ភាគរយ ដូច្នេះការលើកកម្ពស់បរិយាប័ន្នហិរញ្ញវត្ថុនៅកម្ពុជានៅមានបញ្ហាប្រឈមមួយចំនួនរួមមាន ឧបសគ្គក្នុងការទទួលបានសេវាហិរញ្ញវត្ថុដោយសារកង្វះមធ្យោបាយរូបវន្ត ប្រាក់ចំណូលនៅមានកម្រិតទាប និងកង្វះលទ្ធភាពក្នុងការបំពេញតាមលក្ខខណ្ឌនានា និងការប្រើប្រាស់សេវាហិរញ្ញវត្ថុដោយសារគ្រឹះស្ថានហិរញ្ញវត្ថុមិនអាចផ្តល់ផលិតផលស្របតាមតម្រូវការអតិថិជន និងការយល់ដឹងចំពោះផ្នែកហិរញ្ញវត្ថុនៅមានកម្រិត។
លោកបញ្ជាក់ថា ដើម្បីដោះស្រាយបញ្ហាប្រឈមខាងលើរដ្ឋាភិបាលកម្ពុជាបានអនុម័តយុទ្ធសាស្ត្រជាតិស្តីពីបរិយាបន្នហិរញ្ញវត្ថុឆ្នាំ ២០១៩-២០២៥ ដែលយុទ្ធសាស្ត្រជាតិបានផ្តល់នូវក្របខណ្ឌក្នុងការកំណត់បានចែកកម្រិតអាទិភាព សម្របសម្រួល វាស់វែង និងតាមដានក្នុងការអនុវត្ត។
លោកស្រីបន្តថា យុទ្ធសាស្ត្រនេះបានចង្អុលបង្ហាញគោលដៅក្នុងការបង្កើតលទ្ធភាពក្នុងការទទួលបានសេវាហិរញ្ញវត្ថុផ្លូវការដែលមានគុណភាព កាត់បន្ថយអត្រាស្ត្រីដែលមិនទាន់ទទួលបានសេវាហិរញ្ញវត្ថុឲ្យបានពាក់កណ្តាលពី ២៧ ភាគរយមកត្រឹម ១៣ ភាគរយ និងពង្រីកការប្រើប្រាស់សេវាហិរញ្ញវត្ថុផ្លូវការពី ៥៩ ភាគរយ ដល់ ៧០ ភាគរយ ត្រឹមឆ្នាំ ២០២៥។
លោកបន្ថែមថា៖ «ដើម្បីសម្រេចបានគោលដៅកំណត់ខាងលើ ការលើកកម្ពស់សិទ្ធិ បង្កើនកិច្ចការពារអតិថិជន និងបង្កើនតម្លាភាពក្នុងវិស័យហិរញ្ញវត្ថុត្រូវបានកំណត់ជាកិច្ចការអាទិភាពរបស់រដ្ឋាភិបាល»។
បើតាមលោកស្រី ប្រជាជនពេញវ័យនៅកម្ពុជាប្រមាណ ៥៩ ភាគរយ ទទួលបានសេវាហិរញ្ញវត្ថុផ្លូវការក្នុងនោះ ១៧ ភាគរយ ពីគ្រឹះស្ថានធនាគារ ៤២ ភាគរយ ពីគ្រឹះស្ថានហិរញ្ញវត្ថុផ្សេងទៀត ១២ ភាគរយទទួលបានហិរញ្ញវត្ថុក្រៅផ្លូវការ និង ២៩ ភាគរយដែលបានប្រើប្រាស់សេវាហិរញ្ញវត្ថុទាំងផ្លូវការ និងក្រៅផ្លូវការ៕LA