លោក សុខ សុទ្ធី អភិបាលរងខេត្តកោះកុង និងជាអ្នកនាំពាក្យ។ រូបថត រដ្ឋបាលខេត្តកោះកុង
ភ្នំពេញៈ ក្រុមហ៊ុន រ៉ូយ៉ាល់ គ្រុប ខូអិលធីឌី (Royal Group Co.,Ltd) នឹងធ្វើការវិនិយោគលើការសាងសង់តំបន់សេដ្ឋកិច្ចពិសេស (SEZ) នៅលើផ្ទៃដី ១ ម៉ឺនហិកតា ក្នុងឧទ្យានជាតិបទុមសាគរ ខេត្តកោះកុង ដើម្បីឆ្លើយតបទៅនឹងកំណើននៃលំហូរវិនិយោគនានាទៅកាន់ខេត្តនាដែនសមុទ្រជាប់ព្រំប្រទល់ប្រទេសថៃ។
.jpg)
កាលពីថ្ងៃចន្ទ ទី ២៣ ខែ វិច្ឆិកា ឆ្នាំ ២០២០ លោក អ៊ុក ភ័ក្ត្រា អភិបាលរងខេត្តកោះកុងបានចូលរួមក្នុងកិច្ចប្រជុំសិក្សាលម្អិតអំពីទីតាំងដែលក្រុមហ៊ុន រ៉ូយ៉ាល់ គ្រុប ខូអិលធីឌី បានស្នើសុំនៅក្នុងឧទ្យានជាតិបទុមសាគរនាភូមិសាស្ត្រឃុំតានូន និងឃុំថ្មស ស្រុកបទុមសាគរ ខេត្តកោះកុង។
កិច្ចប្រជុំនេះមានការចូលរួមពីតំណាងក្រសួងបរិស្ថាន រដ្ឋបាលខេត្តកោះកុង អភិបាលនៃគណៈអភិបាលស្រុកបទុមសាគរប្រធានមន្ទីរបរិស្ថាន ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដី ប្រធានការិយាល័យរៀបចំដែនដី នគរូបនីយកម្ម សំណង់ និងភូមិបាលស្រុកបទុមសាគរ មេឃុំថ្មស មេឃុំតានូន និងអ្នកពាក់ព័ន្ធមួយចំនួនទៀត។
បើយោងតាមសេចក្តីប្រកាសព័ត៌មានរបស់រដ្ឋបាលខេត្ត «ជាលទ្ធផល អង្គប្រជុំបានឯកភាព និងគាំទ្រឱ្យមានតំបន់សេដ្ឋកិច្ចពិសេសនៅក្នុងឧទ្យានជាតិបទុមសាគរ ដើម្បីធ្វើការអភិវឌ្ឍ និងលើកកម្ពស់ជីវភាពប្រជាពលរដ្ឋ ដោយឡែកក្រុមការងារស្នើសុំឱ្យបញ្ចៀសផលប៉ះពាល់ដល់ប្រជាពលរដ្ឋ និងជីវចម្រុះឱ្យនៅកម្រិតទាបបំផុត។ បន្ថែមពីលើនេះ ក្រុមការងារនឹងចុះទៅពិនិត្យទីតាំងទាំងអស់ក្នុងឧទ្យានជាតិបទុមសាគរក្នុងគោលបំណងសិក្សាលម្អិតអំពីស្ថានភាពភូមិសាស្ត្រឱ្យបានជាក់លាក់»។
លោក សុខ សុទ្ធី អភិបាលរងខេត្តកោះកុង និងជាអ្នកនាំពាក្យបានប្រាប់ ភ្នំពេញ ប៉ុស្តិ៍ កាលពីថ្ងៃអង្គារថា ក្រុមហ៊ុនបានសុំគោលការណ៍ពីរដ្ឋាភិបាលដើម្បីអភិវឌ្ឍតំបន់សេដ្ឋកិច្ចពិសេសក្នុងដីឧទ្យានជាតិចំនួន ១ ម៉ឺនហិកតា ដោយមានការសម្រេចពីរាជរដ្ឋាភិបាល និងក្រសួងបរិស្ថានរួចហើយគឺអនុញ្ញាតឱ្យគាត់ធ្វើ ប៉ុន្តែខាងក្រុមហ៊ុននៅមិនទាន់ជ្រើសរើសទីតាំងច្បាស់លាស់នៅឡើយទេ ព្រោះក្រុមហ៊ុនត្រូវការសិក្សាលម្អិតជាមួយក្រសួងបរិស្ថានក៏ដូចជាជំនាញពាក់ព័ន្ធ។
លោកថ្លែងថា៖ «ដោយសាររាជរដ្ឋាភិបាលបានសម្រេចជូនក្រុមហ៊ុនរួចហើយ ដូច្នេះក្រុមហ៊ុនត្រូវរកទីតាំងសមស្របជាមួយការវិនិយោគរបស់គាត់ ដោយធ្វើយ៉ាងណាមិនត្រូវឱ្យប៉ះពាល់ដល់ជម្រកសត្វ និងបរិស្ថាននានា»។
លោកបន្តថា៖ «សម្រាប់ជំហររបស់ខេត្ត គឺយើងតែងតែអនុវត្តទៅតាមសេចក្តីសម្រេចនានារបស់រដ្ឋាភិបាល ហើយយើងស្វាគមន៍ចំពោះការវិនិយោគនានាមកខេត្តរបស់យើង ព្រោះវាបានជួយលើកស្ទួយមិនត្រឹមតែសេដ្ឋកិច្ចជាតិប៉ុណ្ណោះទេ តែដល់សេដ្ឋកិច្ចខេត្តផងដែរ»។
លោកបន្តថា មកទល់ពេលនេះខេត្តកោះកុងមាន SEZ ចំនួន ១ ដែលផ្តល់ការងារដល់ប្រជាពលរដ្ឋរាប់ម៉ឺននាក់។
យោងតាមទិន្នន័យពីក្រសួងសេដ្ឋកិច្ច និងហិរញ្ញវត្ថុ ការនាំចេញរបស់កម្ពុជាតាមរយៈតំបន់សេដ្ឋកិច្ចពិសេសកាលពីឆ្នាំមុនបានកើនឡើង ២៧ ភាគរយធៀបនឹងឆ្នាំ ២០១៨។ តម្លៃសរុបនៃការនាំចេញរបស់កម្ពុជាបានកើនដល់ ២,៦៨ ពាន់លានដុល្លារកាលពីឆ្នាំមុន។ គិតត្រឹមចុងឆ្នាំមុនមានក្រុមហ៊ុន ៤៦៥ ប្រតិបត្តិការក្នុង SEZ ទាំង ៥៤ របស់កម្ពុជាដោយផ្ដល់ការងារជាង ១០ ម៉ឺន៕ LA
