ការប្រមូលផលអំបិលរបស់កសិករនៅខេត្តកែបក្នុងអំឡុងដើមឆ្នាំ ២០១៩។ រូបថត ហ៊ឹន ពិសី
កំពតៈ សហគមន៍ផលិតអំបិលកំពត-កែប បានសម្រេចផ្អាកប្រតិបត្តិការរបស់ខ្លួនជាបណ្តោះអាសន្នដោយគ្មានពេលកំណត់ដោយសារបញ្ហាអាកាសធាតុមិនអំណោយផលប៉ះពាល់ដល់ខ្សែចង្វាក់ផលិតកម្មអំបិលនៅដើមរដូវឆ្នាំនេះ។
.jpg)
លោក ប៊ុន បារាំង សហប្រធានសហគមន៍ផលិតអំបិលកំពត-កែប បានប្រាប់ភ្នំពេញប៉ុស្តិ៍កាលពីថ្ងៃអង្គារថា លោកបានសម្រេចចិត្តផ្អាកប្រតិបត្តិការសហគមន៍ផលិតអំបិលជាបណ្តោះអាសន្នដោយបញ្ហាអាកាសធាតុ។
លោកថ្លែងថា៖ «យើងនឹងដំណើរការវាឡើងវិញរហូតដល់អំបិលអាចផលិតបានវិញ តែខ្ញុំមិនដឹងថានៅពេលណានោះទេ វាអាចឆ្នាំក្រោយ ឬឆ្នាំបន្ទាប់ៗ»។
លោកបានពន្យល់ថា ការនាំចូលអំបិលពីប្រទេសចិន និងឥណ្ឌាមិនធ្វើឲ្យប៉ះពាល់ដល់អ្នកផលិតអំបិលគ្រួសារដែលកំពុងប្រកបរបរនេះនោះទេ។ លោកបន្តថា៖ «យើងប្រឈមបញ្ហាកង្វះកម្លាំងពលកម្ម និងបញ្ហាអាកាសធាតុមិនអំណោយផលដែលជាបញ្ហាធំប៉ះពាល់ដល់ការផលិតអំបិល»។
បើយោងតាមលោក បារាំង បច្ចុប្បន្នកសិករផលិតអំបិលរបស់សមាគមអាចផលិតបានប្រហែល ១០០០ តោននៅខែដំបូងឆ្នាំនេះ ដែលមានតម្លៃប្រមាណ ១៦ ០០០ រៀល ក្នុងមួយបាវ (ទម្ងន់ ៥០ គីឡូក្រាម) ហើយវាសម្រាប់តែលក់ឲ្យប្រជាជនក្នុងស្រុកប៉ុណ្ណោះ»។
លោក អ៊ុំ សុថា អ្នកនាំពាក្យក្រសួងឧស្សាហកម្ម និងសិប្បកម្មសុំមិនធ្វើអត្ថាធិប្បាយទេកាលពីថ្ងៃអង្គារដោយគ្រាន់តែបញ្ជាក់ថា ក្រសួងមិនទាន់ទទួលបានលិខិតផ្លូវការណាមួយពីសហគមន៍ផលិតអំបិលកំពត-កែបនេះនៅឡើយ។
កាលពីឆ្នាំមុនកម្ពុជាបាននាំចូលអំបិលពីប្រទេស ឥណ្ឌា ក្នុងបរិមាណប្រហែល ៥ ០០០ តោន ដើម្បីបំពេញតម្រូវការក្នុងស្រុក ខណៈកម្ពុជាបាននាំចូលអំបិល ២ លើករួចមកហើយពីប្រទេស ចិន កាលពីឆ្នាំ ២០០៩ ចំនួន ២០ ០០០ តោន និងឆ្នាំ ២០១៨ ចំនួន ៣០ ០០០ តោន។
បច្ចុប្បន្នក្នុងខេត្តកំពត និងកែបមានផ្ទៃដីផលិតអំបិលប្រហែល ៤ ៥០០ ហិកតា។ ប្រសិនបើអាកាសធាតុអំណោយផលក្នុង ១ ហិកតា គេអាចផលិតអំបិលបានជាង ២០ តោន ក្នុង ១ ឆ្នាំ ដែលរដូវប្រមូលផលចាប់ពីខែមករាដល់ខែឧសភា។
ទិន្នន័យពីសហគមន៍ផលិតអំបិលកំពត-កែប បានឲ្យដឹងថាក្នុងរយៈពេល ៣ ឆ្នាំចុងក្រោយនេះ ការផលិតអំបិលនៅក្នុងខេត្តកំពត និងកែបបានប្រហែល ៣០ ០០០ តោន ក្នុង ១ ឆ្នាំ ខណៈតម្រូវការប្រើប្រាស់សរុបក្នុងប្រទេសមានចន្លោះពី ៨០ ០០០ តោន ទៅ ១០០ ០០០ តោន ក្នុង ១ ឆ្នាំ៕LA
