ក្រុមសហគ្រិនទទួលស្លាកតំណាងថវិកាពីលោក វង្សី វ៉ិស្សុត។ សហការី
ភ្នំពេញ: ធុរកិច្ចបង្កើតថ្មី និងសហគ្រាសធុនតូច និងមធ្យម (SME) ចំនួន ២៧ បានទទួលកញ្ចប់ជំនួយហិរញ្ញវត្ថុឥតសំណងពីសហគ្រិនខ្មែរ (KE) ដែលជាស្ថាប័នចំណុះឲ្យក្រសួងសេដ្ឋកិច្ច និងហិរញ្ញវត្ថុដើម្បីជួយជំរុញអាជីវកម្មរបស់ពួកគេឱ្យកាន់តែប្រសើរ និងក្លាយជាអាជីវកម្មគំរូ។
.jpg)
តាមរយៈកម្មវិធីកញ្ចប់ជំនួយទាំង ២ ជុំនេះសហគ្រិនខ្មែរបានទទួលពាក្យស្នើសុំពីធុរកិច្ចបង្កើតថ្មីក៏ដូចជា សហគ្រាសធុនតូច និងមធ្យមសរុបចំនួន ២៧៨ មកពីវិស័យកសិកម្ម កសិកម្មកែច្នៃ សិប្បកម្មកែច្នៃ សេវាកម្ម និងបច្ចេកវិទ្យាព័ត៌មានវិទ្យា។
លោក ឈៀ វណ្ណមុនិណ្ឌ នាយកប្រតិបត្តិសហគ្រិនខ្មែរ (KE) ថ្លែងក្នុងកម្មវិធីចុះហត្ថលេខាលើកិច្ចព្រមព្រៀងផ្តល់ហិរញ្ញប្បទាននៅថ្ងៃទី ២៤ វិច្ឆិកាថា កម្មវិធីកញ្ចប់ជំនួយសហគ្រិនខ្មែរនេះគឺជាដំណោះស្រាយយុទ្ធសាស្ត្រដ៏មុតស្រួចមួយ ដើម្បីបន្តឆ្លើយតបទៅនឹងបញ្ហាប្រឈមបង្កឡើងដោយវិបតិ្ដជំងឺកូវីដ១៩ បណ្តាលឲ្យធុរកិច្ចបង្កើតថ្មី និងសហគ្រាសធុនតូច និងមធ្យមនៅកម្ពុជាប្រឈមបញ្ហាទាំងប្រតិបត្តិការ និងហិរញ្ញវត្ថុ។
លោកថ្លែងថា៖ «សហគ្រិនខ្មែរជឿជាក់ថា កញ្ចប់ហិរញ្ញប្បទាននេះនឹងអាចជាដំណោះស្រាយដ៏មានប្រសិទ្ធភាពមួយសម្រាប់គាំទ្រធុរកិច្ចបង្កើតថ្មី និង SMEs ដែលមានសក្តានុពលក្នុងការលើកកម្ពស់ប្រព័ន្ធអេកូឡូស៊ី-សហគ្រិនភាពនៅកម្ពុជា»។
លោក វណ្ណមុនិណ្ឌ បានឱ្យដឹងថា កម្មវិធីកញ្ចប់ជំនួយរបស់សហគ្រិនខ្មែរមានចំនួន ២ លើកដែលបានប្រើប្រាស់ថវិកាសរុបចំនួន ៤០ ម៉ឺនដុល្លារដែលបានផ្តល់ជូនធុរកិច្ចបង្កើតថ្មី និង SMEs។ កញ្ចប់ជំនួយត្រូវផ្តល់ដល់ពួកគេចន្លោះពី ៥ ពាន់ដុល្លារទៅ ២ ម៉ឺនដុល្លារជាមួយនឹងលក្ខខណ្ឌប្រើប្រាស់កញ្ចប់ថវិការយៈពេល ១ ឆ្នាំក្នុងការប្រតិបត្តិការអាជីវកម្ម។
លោកថ្លែងថា៖ «សហគ្រិនខ្មែរសង្ឃឹមថា វិនិយោគិននឹងបន្តតាមដាន និងវិនិយោគលើធុរកិច្ចបង្កើតថ្មី និងសហគ្រាសធុនតូច និងមធ្យមដែលអាចទាក់ទាញវិនិយោគិនដទៃទៀតនៅពេលខាងមុខ»។
សហគ្រិនខ្មែរបានគាំទ្រទៅលើវិស័យអាទិភាពមួយចំនួនដែលរួមមានធុរកិច្ចបង្កើតថ្មីបែបបច្ចេកវិទ្យា សេវាកម្ម ការកែច្នៃកសិចំណីអាហារកសិកម្មសម្រាប់ការនាំចេញ និងផលិតកម្មសម្រាប់ជំនួសដល់ការនាំចូល ដើម្បីគាំទ្រដល់ការធ្វើពិពិធកម្មសេដ្ឋកិច្ច នវានុវត្តន៍ ការបង្កើនផលិតភាព និងការបង្កើតការងារ។
អ្នកស្រី ចេន សុភាព ស្ថាបនិក និងជានាយិកាគ្រប់គ្រងសហគ្រាសកីតម្បាញខ្មែរ (KTK) ដែលទទួលបានកញ្ចប់ជំនួយនេះបានឱ្យដឹងថា ហិរញ្ញប្បទាននេះនឹងជួយឱ្យអាជីវកម្មឱ្យកាន់តែរីកចម្រើន ហើយកញ្ចប់ជំនួយនេះនឹងជួយបង្កើតការងារឱ្យសមាជិកនៃសមាគមកីតម្បាញខ្មែរជាង ៣០០ នាក់ ដែលកំពុងមានកង្វះខាតទីផ្សារយ៉ាងខ្លាំងនៅក្នុងសម័យជំងឺកូវីដ១៩នេះ។
អ្នកស្រីថ្លែងថា៖ «ខ្ញុំសង្ឃឹមថាកញ្ចប់ថវិកានេះនឹងជួយដល់អាជីវកម្មខ្ញុំបានច្រើនដែលប្រើប្រាស់ថវិកាទៅលើផ្នែកទីផ្សារបច្ចេកវិទ្យា និងផ្សព្វផ្សាយផលិតផលរបស់ខ្ញុំជាមួយអតិជនគោលដៅរបស់យើងថែមទៀត»។
កញ្ញា ថូង ធីតា នាយិកាគ្រប់គ្រងក្រុមហ៊ុន ថូងត្រេឌីង ឯ.ក ដែលជាក្រុមហ៊ុនកែច្នៃអំបិលកំពត-កែប បានប្រាប់អ្នកសារព័ត៌មានក្នុងកម្មវិធីនេះថា ជំនួយនេះនឹងជួយគាំទ្រដល់ការបង្កើនចង្វាក់ផលិតកម្មកែច្នៃសម្រាប់ផ្គត់ផ្គង់ទីផ្សារ។
ធីតា បញ្ជាក់៖ «ខ្ញុំសង្ឃឹមថា កញ្ចប់ថវិកានេះនឹងជួយដល់ការអភិវឌ្ឍរបស់ក្រុមហ៊ុនបានច្រើនក្នុងការជំរុញការផ្សាយពាណិជ្ជកម្មផលិតផលរបស់យើង»។
លោក វង្សី វិស្សុត រដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុដែលជាសាក្សីក្នុងពិធីចុះកិច្ចព្រមព្រៀងនេះបានថ្លែងថា សហគ្រិនខ្មែរដែលជាអង្គភាពចំណុះឱ្យមូលនិធិអភិវឌ្ឍន៍សហគ្រិនភាពនៃក្រសួងសេដ្ឋកិច្ច និងហិរញ្ញវត្ថុនឹងដើរតួជាឃ្នាស់ថ្មីក្នុងការជួយផ្សារភ្ជាប់សហគ្រិនឱ្យក្លាយជាភ្នាក់ងារជំរុញកំណើនសេដ្ឋកិច្ចជាតិ។
លោកថ្លែងថា៖ «តាមរយៈកម្មវិធីរបស់សហគ្រិនខ្មែរនឹងជួយបង្កើតតម្លៃបន្ថែមក្នុងសេដ្ឋកិច្ចដែលជាគន្លឹះដ៏សំខាន់ក្នុងការដោះស្រាយបញ្ហាក្នុងអាជីវកម្ម និងខ្សែចង្វាក់តម្លៃព្រមទាំងបង្កើតជាគំរូអាជីវកម្មថ្មីក្នុងប្រទេស។
បើតាមលោក ឈៀ វណ្ណមុនិណ្ឌ សហគ្រិនខ្មែរនឹងបន្ដដាក់ចេញកម្មវិធីនេះសម្រាប់ជុំទី ៣ បន្តទៀតនៅឆ្នាំខាងមុខ៕ LA
