ការរីករាលដាលជំងឺកូវីដ១៩ បានធ្វើឲ្យអ្នកជាប់បំណុលធនាគារជួបបញ្ហាប្រឈមជាខ្លាំង។ ហុង មិនា
ភ្នំពេញ: ក្រុមសហជីពបានដាក់លិខិត ១ ច្បាប់ទៅលោកនាយករដ្ឋមន្ត្រី ហ៊ុន សែន ដើម្បីស្នើសុំឲ្យជួយអន្តរាគមន៍ទៅឲ្យគ្រឹះស្ថានធនាគារ និងមីក្រូហិរញ្ញវត្ថុទាំងអស់ធ្វើការផ្អាកជាបណ្តោះអាសន្នរាល់ការសងបំណុលទាំងប្រាក់ដើម និងការប្រាក់ដល់កម្មករនិយោជិតក្នុងអំឡុងពេលមានការរីករាលដាលនៃជំងឺកូវីដ ១៩។
.jpg)
លិខិតដែលស្នើឡើងដោយក្រុមសហជីពចំនួន ១៤ បានសរសេរថា៖ «ការរីករាលដាលជំងឺកូវីដ ១៩ បាននាំឲ្យចង្វាក់ផលិតកម្មក្នុងវិស័យរោងចក្រកាត់ដេរ សណ្ឋាគារ សេវាកម្ម ក្លឹបកម្សាន្ត ដឹកជញ្ជូន សំណង់ កសិកម្ម និងវិស័យផ្សេងទៀតនៅកម្ពុជារងផលប៉ះពាល់ជាអវិជ្ជមានដោយព្យួរកិច្ចសន្យាការងារកម្មករនិយោជិតដែលធ្វើឲ្យបាត់បង់ការងារ និងប្រាក់ចំណូលប្រចាំថ្ងៃ»។
លោក អាត់ ធន់ ប្រធានសហភាពការងារកម្ពុជាបានប្រាប់ភ្នំពេញប៉ុស្តិ៍កាលពីថ្ងៃពុធថា សហព័ន្ធសហជីពចំនួន ១៤ បានដាក់លិខិតរួមគ្នាមួយទៅទីស្តីការគណៈរដ្ឋមន្ត្រី និងខុទ្ទកាល័យនាយករដ្ឋមន្ត្រីកាលពីថ្ងៃពុធ។ លោកបន្តថា កម្មករនិយោជិតពុំមានលទ្ធភាពសងបំណុលធនាគារកំពុងមានការរីករាលដាលជំងឺកូវីដ ១៩ នេះទេ ដោយសារពួកគេត្រូវបានព្យួរការងារភាគច្រើន។
លោកបានថ្លែងថា៖ «ពួកគេនឹងប្រឈមកាន់តែខ្លាំងក្នុងការសងបំណុលគ្រឹះស្ថានធនាគារ និងមីក្រូហិរញ្ញវត្ថុចាប់ពីខែមេសានេះទៅ ហើយពួកគេកំពុងមានការត្អូញត្អែរយ៉ាងខ្លាំងពីការមិនមានលទ្ធភាពបង់ធនាគារ ទាំងអ្នកធ្វើការក្នុងរោងចក្រ និងសណ្ឋាគារជាដើម»។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដាបានប្រាប់ភ្នំពេញប៉ុស្តិ៍ថា គ្រឹះស្ថានធនាគារនៅកម្ពុជាកំពុងអនុវត្តតាមសារាចរណែនាំរបស់ធនាគារជាតិនៃកម្ពុជា (NBC) ក្នុងការដោះស្រាយការសងបំណុលដោយមធ្យោបាយទន់ភ្លន់ និងមិនបានរឹបអូសទ្រព្យធានារបស់កម្មករនិយោជិតក្នុងអំឡុងពេលមានការរីករាលដាលជំងឺកូវីដ ១៩។
លោកបន្តថា សារាចររបស់ NBC ក៏បានណែនាំគ្រឹះស្ថានធនាគារ និងមីក្រូហិរញ្ញវត្ថុឲ្យរៀបចំ «ឥណទានឡើងវិញ» ដើម្បីជួយសម្រាលបន្ទុកទៅដល់អ្នកខ្ចីប្រាក់ដែលកំពុងប្រឈមនឹងការធ្លាក់ចុះ និងបាត់បង់ប្រាក់ចំណូល។ លើសពីនេះ NBC បានចេញប្រកាសមួយកាលពីថ្មីៗនេះស្តីពីការបន្ធូរបន្ថយអនុបាទនៃទុនបម្រុងរបស់គ្រឹះស្ថានធនាគារ ដើម្បីជាធនធានគ្រប់គ្រាន់សម្រាប់គាំទ្រដល់ការលូតលាស់របស់ឥណទាន។
លោកបានថ្លែងថា៖ «វិធានការរៀបរាប់ខាងលើនេះគឺមានលក្ខណៈគ្រប់គ្រាន់រួចហើយសម្រាប់គ្រឹះស្ថានធនាគារ មីក្រូហិរញ្ញវត្ថុអនុវត្តតាម។ ខ្ញុំយល់ថា មិនចាំមានលិខិតអ្វីត្រូវផ្ញើជូនសម្តេច ហ៊ុន សែន នោះទេ ព្រោះយើងកំពុងអនុវត្តតាមសារាចរណែនាំរបស់ធនាគារជាតិយ៉ាងពេញលេញ»។
បើយោងតាមលោក អ៊ិន ចាន់នី គិតមកដល់ពេលនេះធនាគារអេស៊ីលីដាបានផ្តល់កម្ចីឲ្យកម្មករនិយោជិត និងគ្រួសារពួកគេមានចំនួន ២៩៥ ឥណទាន ដែលមានទឹកប្រាក់ជាង ១ លានដុល្លារ។
លោកថ្លែងថា៖ «អាជីវកម្មរបស់ពួកគាត់នៅដំណើរការជាធម្មតា ព្រោះអាជីវកម្មគាត់មិនមានផលប៉ះពាល់ជាមួយការរីករាលដាលជំងឺកូវីដ ១៩ នោះទេ។ កម្ចីដែលខ្ចីពីយើងសម្រាប់ប្រកបរបរដាំដំណាំកសិកម្មចម្រុះរួមមានដាំបន្លែ ធ្វើស្រែជាដើម»។
លោក ប៊ុន មុនី អគ្គនាយកគ្រឹះស្ថានមីក្រូហិរញ្ញវត្ថុវិថីបានប្រាប់ភ្នំពេញប៉ុស្តិ៍ថា គ្រឹះស្ថានមីក្រូហិរញ្ញវត្ថុក៏កំពុងចូលរួមអនុវត្តតាមវិធានការរបស់ធនាគារជាតិទាក់ទងនឹងការដោះស្រាយការសងបំណុលប្រកបដោយការអនុគ្រោះក្នុងអំឡុងពេលនេះ។
លោកបន្តថា ទោះបីយ៉ាងណាគ្រឹះស្ថានមីក្រូហិរញ្ញវត្ថុក៏មានបន្ទុកធ្ងន់ក្នុងការសងទៅឲ្យម្ចាស់បំណុលរបស់ខ្លួនវិញផងដែរ ព្រោះទុនវិនិយោគរបស់គ្រឹះហិរញ្ញវត្ថុគឺទទួលបានពីកម្ចីគេដែរ។
លោកថ្លែងថា៖ «ជាការពិតប្រាក់ដែលយើងផ្តល់កម្ចីទៅឲ្យអតិថិជនគឺយើងខ្ចីពីគេ ដូច្នេះការអនុគ្រោះយើងអាចធ្វើទៅបានតាមលទ្ធភាពជាក់ស្តែង។ រហូតមកដល់ពេលនេះពុំទាន់មានអ្នកស្នើសុំពន្យារពេលសងបំណុលនោះទេ ព្រោះអាជីវកម្មពួកគាត់មិនប៉ះពាល់នៅឡើយ កម្ចីយើងភាគច្រើនផ្តល់លើផ្នែកកសិកម្ម»។
ក្នុងឱកាសធ្វើសន្និសីទសារព័ត៌មានស្តីពីជំងឺកូវីដ ១៩ កាលពីថ្ងៃអង្គារ លោកនាយករដ្ឋមន្ត្រី ហ៊ុន សែន បានសម្រេចកែប្រែការផ្តល់ប្រាក់ឧបត្ថម្ភដល់ក្រុមកម្មករ-កម្មការិនីកាត់ដេរពីការទទួលបាន ៦០ ភាគរយ នៃប្រាក់ខែគោលក្នុងអំឡុងពេលព្យួរការងារមកទទួលបានប្រាក់ត្រឹម ៧០ ដុល្លារវិញ៕
វីដេអូ៖
