ស្លាកបង្ហាញពីការលក់ទំនិញនៅផ្សារទំនើបក្នុងក្រុងសេអ៊ូល។ រូប AFP
ក្រុងសេអ៊ូលៈ ធនាគារកណ្ដាលកូរ៉េខាងត្បូងបានឲ្យដឹងកាលពីថ្ងៃពុធថា សេដ្ឋកិច្ចកូរ៉េខាងត្បូងបានកើនឡើងក្នុងល្បឿនយឺតបំផុតក្នុងរយៈពេល ១ ទសវត្សរ៍កាលពីឆ្នាំមុន ដែលរងគ្រោះដោយសារភាពតានតឹងផ្នែកពាណិជ្ជកម្មរវាងអាមេរិក និងប្រទេសចិនដែលអូសបន្លាយពេល និងទីផ្សារឧបករណ៍ពាក់កណ្ដាលចម្លងមិនល្អ។
.jpg)
សេដ្ឋកិច្ចកូរ៉េកើន ២ ភាគរយ នៅឆ្នាំ ២០១៩ ធ្លាកពីកំណើន ២,៧ ភាគរយ នៅឆ្នាំ ២០១៨ និងជាលទ្ធផលអាក្រក់បំផុតចាប់ពីឆ្នាំ ២០០៩។
កំណើនយឺតបង្ហាញឲ្យឃើញពីប្រឈមមួយសម្រាប់ប្រទេស កូរ៉េខាងត្បូង ដែលបានរីករាយនឹងការរីកចម្រើនអស់រយៈពេលជាច្រើនទសវត្សរ៍ ខណៈប្រទេសដែលយុវជនមានការអប់រំខ្ពស់ នៅពេលនេះជម្នះក្នុងការស្វែងរកការងារដែលមានប្រាក់ខែខ្ពស់ ហើយការមិនសប្បាយចិត្តកំពុងកើនឡើងជុំវិញវិសមភាព។
លោកប្រធានាធិបតី មូន ជេអ៊ីន ត្រូវបានរិះគន់ចំពោះគោលនយោបាយសេដ្ឋកិច្ចដ៏ចម្រូងចម្រាសទាក់ទងនឹងកំណើនការចំណាយសាធារណៈ និងទស្សនាទាន «កំណើនសេដ្ឋកិច្ចដែលដឹកនាំដោយប្រាក់ចំណូល» ដែលបានមើលឃើញប្រាក់ឈ្នួលអប្បបរមាកើនឡើងជាង ៣០ ភាគរយ ក្នុងរយៈពេល ៣ ឆ្នាំ។ ក្រុមប្រឆាំងឲ្យដឹងថា គោលនយោបាយនេះធ្វើឲ្យប៉ះពាល់ដល់អ្នកដែលជាទិសដៅសម្រាប់ការជួយដោយគោលនយោបាយនេះតាមរយៈការបង្កើនការចំណាយលើការងារ។
ធនាគារកណ្ដាលកូរ៉េបានឲ្យដឹងថា សេដ្ឋកិច្ចដែលពឹងផ្អែកលើពាណិជ្ជកម្មនេះ បានថមថយល្បឿន «ដោយសារកត្តាជាច្រើនដូចជា ការធ្លាក់ចុះតម្លៃឧបករណ៍ពាក់កណ្ដាលចម្លងជាដើម»។
ស្ថិតក្រោមសម្ពាធជម្លោះពាណិជ្ជកម្មរវាងចិន និងអាមេរិកការនាំចេញបានកើនឡើង ១,៥ ភាគរយ ធៀបនឹង ៣,៥ ភាគរយ កាលពី ២០១៨។ ការនាំចូលបានធ្លាក់ចុះ ០,៦ ភាគរយ៕ LA
