ពិធីចុះ MoU រវាងភាគីទាំង ៣ ដើម្បីជំរុញការប្រើប្រាស់សេវាក្នុងស្រុក។ ហេង ជីវ័ន
ភ្នំពេញៈ ប្រៃសណីយ៍កម្ពុជា សមាគមពាណិជ្ជកម្មដឹកជញ្ជូនទំនិញ និងក្រុមហ៊ុន ស៊ូភើអេប តិចណូឡូជី ភីអិលស៊ី បានចុះអនុស្សរណៈយោគយល់គ្នា (MoU) លើកិច្ចសហការលើកកម្ពស់សេវាកម្មដឹកជញ្ជូន និងជំរុញការប្រើប្រាស់សេវាបញ្ញើក្នុងស្រុក ខណៈចំណូលរបស់ប្រៃសណីយ៍កម្ពុជា បានធ្លាក់ចុះជិតពាក់កណ្តាលក្នុងអំឡុងមានវិបត្តិសុខភាពជាសកល។
.jpg)
តាមរយៈ MoU ភាគីទាំង ៣ បានព្រមព្រៀងគ្នាដោយប្រៃសណីយ៍កម្ពុជា និងក្រុមហ៊ុន ស៊ូភើអេប តិចណូឡូជី នឹងសហការគ្នាជំរុញការប្រើប្រាស់មធ្យោបាយដឹកជញ្ជូន និងបច្ចេកវិទ្យាថ្មីៗ ជាមួយនឹងសមាគមពាណិជ្ជកម្មដឹកជញ្ជូនទំនិញ ដើម្បីធ្វើឱ្យប្រសើរឡើងនូវសេវាពាណិជ្ជកម្មតាមប្រព័ន្ធអេឡិចត្រូនិកក្នុង និងក្រៅប្រទេស។
លោក អោក បូរ៉ា អគ្គនាយកប្រៃសណីយ៍កម្ពុជាបានឱ្យដឹងថា MoU នេះគឺជាកិច្ចសហការគ្នាដ៏មានសារៈសំខាន់ក្នុងការពង្រីកសេវាដឹកជញ្ជូនទំនិញនៅកម្ពុជា។ លោកបានថ្លែងថា៖ «យើងនឹងជួយជំរុញ និងលើកស្ទួយឱ្យផលិតផលរបស់សហគ្រាសខ្នាតតូច និងមធ្យមទៅកាន់ទីផ្សារអន្តរជាតិ»។
លោក ប៉ាត់ ចំណាន ស្ថាបនិក និងជាអគ្គនាយកក្រុមហ៊ុន ស៊ូភើអេប តិចណូឡូជី បានឱ្យដឹងថា ក្រុមហ៊ុនលោកនឹងជួយនាំយកផលិតផលខ្មែរទៅទីផ្សារអន្តរជាតិតាមរយៈពាណិជ្ជកម្មអេឡិចត្រូនិករបស់ក្រុមហ៊ុន។
លោកថ្លែងថា៖ «អនុស្សរណៈនេះនឹងផ្តល់ប្រយោជន៍ឱ្យយើងទាំងអស់គ្នាដោយបញ្ញើតូចៗយើងនឹងរុញឱ្យប្រៃសណីយ៍កម្ពុជា ហើយទំនិញធំៗយើងឱ្យទៅសមាគមពាណិជ្ជកម្មដឹកជញ្ជូនទំនិញ។ ខ្ញុំដឹងថា នៅក្នុងអំឡុងពេលរីករាលដាលកូវីដ ១៩ និន្នាការប្រើប្រាស់សេវាទិញទំនិញតាមអនឡាញបានកើនឡើងគួរឱ្យកត់សម្គាល់»។
បើតាមលោក បូរ៉ា ការរាតត្បាតជំងឺកូវីដ ១៩ បានធ្វើឱ្យចំណូលរបស់ប្រៃសណីយ៍កម្ពុជាក្នុងឆ្នាំ ២០២០ មានចំនួន ៦,៥ លានដុល្លារ ធ្លាក់ចុះ ៤៦ ភាគរយធៀបឆ្នាំ ២០១៩ ដែលមានជាង ១៣ លានដុល្លារ៕LA
