កម្មករ លីបាវអង្ករនៅក្នុងរោងចក្រអង្កររបស់ក្រុមហ៊ុន Amru Rice នៅខណ្ឌពោធិ៍សែនជ័យ រាជធានីភ្នំពេញ។ ហេង ជីវ័ន
ភ្នំពេញៈ អង្កររបស់កម្ពុជាបានបាត់បង់សិទិ្ធទទួលការលើកលែងពន្ធពីទីផ្សារអឺរ៉ុបជាផ្លូវការហើយ ចាប់ពីថ្ងៃសុក្រនេះតទៅ បន្ទាប់ពីសហភាពអឺរ៉ុបបានសម្រេចយកពន្ធលើអង្ករនាំចូលពីប្រទេស កម្ពុជា និងមីយ៉ាន់ម៉ា ក្រោមហេតុផលដើម្បីការពារផលប្រយោជន៍កសិករផលិតអង្ករនៅអឺរ៉ុប។
.jpg)
ការសម្រេចដែលបានធ្វើឡើងកាលពីថ្ងៃម្សិលមិញ និងមានប្រសិទ្ធភាពអនុវត្តចាប់ពីថ្ងៃសុក្រ ទី ១៨ នេះទៅ តម្រូវឲ្យអង្ករនាំចូលពីប្រទេស កម្ពុជា និងមីយ៉ាន់ម៉ា ត្រូវបង់ពន្ធរយៈពេល ៣ ឆ្នាំក្នុងអត្រា ១៧៥ អឺរ៉ូ (ប្រហែល ២០០ ដុល្លារ) ក្នុង ១ តោននៅឆ្នាំដំបូង និងថយចុះបន្តិចនៅឆ្នាំទី ២ និងទី ៣។ ដោយផ្អែកលើបរិមាណនៃការនាំចេញអង្ករទៅអឺរ៉ុបកាលពីឆ្នាំ ២០១៨ ដែលមានចំនួនជិត ២៧ ម៉ឺនតោន ការសម្រេចថ្មីនេះនឹងធ្វើឲ្យវិស័យអង្ករកម្ពុជា ត្រូវចំណាយលើការបង់ពន្ធប្រមាណ ៥០ លានដុល្លារក្នុង ១ ឆ្នាំ។
គណៈកម្មការអឺរ៉ុបបានឲ្យដឹងកាលពីម្សិលមិញថា៖ «ការស៊ើបអង្កេតបានបញ្ជាក់ពីការកើនឡើងយ៉ាងខ្លាំងនៃការនាំចូលអង្ករ Indica ពីកម្ពុជា និងមីយ៉ាន់ម៉ា ទៅក្នុងសហភាពអឺរ៉ុប (EU) ដែលបានបណ្ដាលឲ្យខូចខាតសេដ្ឋកិច្ចដល់ប្រទេសផលិតអង្ករអឺរ៉ុប»។
គណៈកម្មការនេះបានបន្តថា៖ «ដូច្នេះ នៅថ្ងៃនេះ [ថ្ងៃម្សិលមិញ] គណៈកម្មការអឺរ៉ុប បានសម្រេចអនុវត្តការដកហូតពន្ធគយឡើងវិញ ដែលនឹងត្រូវបានកាត់បន្ថយជាបន្តបន្ទាប់ក្នុងអំឡុងពេល ៣ ឆ្នាំ»។
សហភាពអឺរ៉ុប គឺជាទីផ្សារនាំចេញអង្ករសំខាន់មួយរបស់ប្រទេស កម្ពុជា។ ទិន្នន័យរដ្ឋាភិបាលកម្ពុជាបានបង្ហាញថា ប្រទេស កម្ពុជា បាននាំចេញអង្ករសរុប ៦២៦ ២២៥ តោនកាលពីឆ្នាំ ២០១៨ ក្នុងចំណោមនោះសហភាពអឺរ៉ុបបានស្រូបយកប្រហែល ៤៣ ភាគរយនៃការនាំចេញសរុបដែលមានចំនួន ២៦៩ ១២៧ តោន។
ពន្ធនាំចូលនេះគឺជាលទ្ធផលនៃការស៊ើបអង្កេតរបស់សហភាពអឺរ៉ុប ដែលចាប់ផ្ដើមដំណើរការកាលពីខែមីនា ឆ្នាំ ២០១៨ បន្ទាប់ពីកសិកររបស់ប្រទេស អ៊ីតាលី បានអំពាវនាវឲ្យមាន ខ-ការពារ ដែលរឹតបន្តឹងការនាំចូលអង្ករ។
សំណើដំបូងឲ្យមានការការពារពាណិជ្ជកម្មលើការនាំចូលអង្ករ ត្រូវបានធ្វើឡើងដោយរដ្ឋាភិបាលរបស់ប្រទេស អ៊ីតាលី កាលពីខែកុម្ភៈ ឆ្នាំ ២០១៨ និងបានគាំទ្រដោយប្រទេសជាសមាជិកដាំដុះស្រូវផ្សេងទៀតរបស់សហភាពអឺរ៉ុប រួមមានប្រទេស បារាំងអេស៉្បាញ ព័រទុយហ្គាល់ ក្រិក ហុងគ្រី រូម៉ានី និងប៊ុលហ្គារី។ គណៈកម្មការនេះបានបើកការស៊ើបអង្កេតជាផ្លូវការកាលពីថ្ងៃទី ១៦ ខែមីនា ឆ្នាំ ២០១៨។
គណៈកម្មការអឺរ៉ុប បានឲ្យដឹងកាលពីថ្ងៃព្រហស្បតិ៍ម្សិលមិញថា ការស៊ើបអង្កេតរបស់ខ្លួន បានបញ្ជាក់ថា កំណើនដ៏ខ្លាំងក្នុងការនាំចូលអង្ករ Indica គ្រាប់វែងពីប្រទេស កម្ពុជា និងមីយ៉ាន់ម៉ា បានធ្វើឲ្យខូចខាតដល់ប្រទេសផលិតអង្កររបស់អឺរ៉ុប។
អ្នកលក់អង្ករកំពុងដេរការុងអង្ករនៅទីតាំងលក់អង្ករមួយកន្លែងក្នុងរាជធានីភ្នំពេញ។ ហុង មិនា
លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយ បានថ្លែងថា ការនាំចេញអង្ករផ្កាម្លិះពីកម្ពុជាទៅកាន់សហភាពអឺរ៉ុប នឹងមិនរងផលប៉ះពាល់ខ្លាំងទេពីពន្ធថ្មីនេះ ប៉ុន្តែ អង្ករសនឹងប៉ះពាល់ខ្លាំង។ លោកបានបន្ថែមថា ក្នុងករណីនេះ កសិករអាចប្តូរទៅដាំស្រូវផ្កាម្លិះ ឬដំណាំផ្សេងវិញបើអាចធ្វើបាន។
ទោះជាយ៉ាងណា លោកបានថ្លែងថា ផលប៉ះពាល់ពិតប្រាកដនឹងអាស្រ័យលើទស្សនៈរបស់អ្នកប្រើប្រាស់ចំពោះអង្ករកម្ពុជា។
លោកមានប្រសាសន៍ថា៖ «ខ្ញុំគិតថា វានឹងអាស្រ័យលើនិរន្តរភាពរបស់អង្ករកម្ពុជា នៅហាងលក់អង្ករក្នុងទីផ្សារអឺរ៉ុប។ បើពួកគេចូលចិត្តអង្ករកម្ពុជា ផ្សារទំនើប និងអ្នកប្រើប្រាស់នៅអឺរ៉ុប អាចមិនគិតពីការចំណាយខ្ពស់បន្តិចនោះទេ។ វាគួរតែមិនមែនជាចំណែកធំនៃការចំណាយលើការប្រើប្រាស់របស់ពួកគេទេ»។
លោកបន្ថែមថា៖ «រដ្ឋាភិបាលគួរពិចារណាកាត់បន្ថយតម្លៃអគ្គិសនី និងកម្រៃសេវាកំពង់ផែ ដើម្បីជួយឧស្សាហកម្មអង្កររបស់យើងឲ្យនៅតែ ឬកាន់តែមានភាពប្រកួតប្រជែង ដែលនឹងជួយ បើឧស្សាហកម្មកាត់ដេរទទួលរងគ្រោះធ្ងន់ធ្ងរដោយការព្យួរ EBA បើវាកើតឡើង»។
លោក ហ៊ុន ឡាក់ អនុប្រធានសហព័ន្ធស្រូវអង្ករកម្ពុជា បានលើកឡើងស្រដៀងលោក សុផល ដែរទាក់ទងនឹងឥទ្ធិពលនៃអ្នកប្រើប្រាស់នៅអឺរ៉ុបទៅលើគុណភាពអង្ករកម្ពុជា និងផលប៉ះពាល់ពីការដាក់ពន្ធនេះ។
ទោះបីយ៉ាងណា លោកបញ្ជាក់ថា ការសម្រេចរបស់អឺរ៉ុប នឹងផ្តល់ផលប៉ះពាល់អវិជ្ជមានមួយចំនួនដល់ឧស្សាហកម្មអង្ករកម្ពុជា តែលោកមិនទាន់អាចបញ្ជាក់ពីទំហំនៃផលប៉ះពាល់ឡើយ។
លោកអះអាងថា៖ «កម្ពុជានៅតែចាត់ទុកថា អឺរ៉ុបគឺជាទីផ្សារសំខាន់របស់ខ្លួន គ្រាន់តែក្នុងករណីដែលគេកំណត់ឲ្យយើងបង់ពន្ធ គឺយើងត្រូវតែរកវិធីដោះស្រាយ»។ លោកបន្តថា៖ «យើងក៏ត្រូវពិនិត្យមើលទៅលើថ្លៃដើម ដើម្បីឲ្យមានតុល្យភាពនឹងការកំណត់ឲ្យបង់ពន្ធ ដែលមានដូចជាការបញ្ចុះថ្លៃដើម ដើម្បីនៅតែអាចបន្តនាំចេញទៅទីផ្សារអឺរ៉ុបបាន»។
យោងតាមលោក ហ៊ុន ឡាក់ ទិសដៅទីផ្សាររបស់កម្ពុជាអាចជាការពង្រីកការនាំចេញទៅកាន់ប្រទេស ចិន បន្ថែមទៀតដោយលោកបញ្ជាក់ថា ប្រទេស ចិន បានផ្តល់កូតានាំចូលអង្ករពីកម្ពុជា ៣០ ម៉ឺនតោន ក្នុង ១ ឆ្នាំកាលពីឆ្នាំ ២០១៨ តែកម្ពុជាបាននាំចេញបានត្រឹមតែ ១៧ ម៉ឺនតោនប៉ុណ្ណោះ។
លោកបន្តថា៖ «នៅពេលខាងមុខ យើងអាចនឹងមានការចរចាបន្ថែមទៀតជាមួយប្រទេស ចិន ទាក់ទងនឹងការនាំចេញអង្គរនេះ»។
លោក សុង សារ៉ន អគ្គនាយកក្រុមហ៊ុន AMRU Rice Cambodia បានឲ្យដឹងកាលពីម្សិលមិញថា ទីផ្សារសហភាពអឺរ៉ុប នឹងតែងតែសំខាន់សម្រាប់អង្ករកម្ពុជា ដូច្នេះក្រុមហ៊ុននាំចេញនឹងចាំបាច់ត្រូវស្វែងរកដំណោះស្រាយដើម្បីរក្សាលទ្ធភាពនាំចេញទៅកាន់ទីផ្សារនេះ។
លោកបន្ថែមថា ក្នុងពេលជាមួយគ្នានេះ កម្ពុជានឹងចាំបាច់ត្រូវលើកកម្ពស់លទ្ធភាពប្រកួតប្រជែង និងរិះរកទីផ្សារថ្មីៗ ដើម្បីបន្ថយការពឹងផ្អែកលើទីផ្សារតែមួយ។ លោកថ្លែងថា៖ «យើងត្រូវការទីផ្សារអឺរ៉ុប ហើយយើងមិនអាចបាត់បង់ទីផ្សារនេះទេ។ ដូច្នេះ យើងនឹងស្វែងរកវិធីសាស្រ្ត ដើម្បីបន្ទាបការចំណាយប្រតិបត្តិការ ដើម្បីលើកកម្ពស់ភាពប្រកួតប្រជែង»៕ LA
