ទិដ្ឋភាពនៅក្នុងផ្សារលក់បន្លែមួយក្នុងរាជធានីភ្នំពេញកាលពីថ្ងៃម្សិលមិញ។ រូបថត ហ៊ាន រង្សី
ភ្នំពេញៈ ក្រុមអាជីវករខ្នាតតូចមួយចំនួនក្នុងក្រុងភ្នំពេញបានអះអាងថា ប្រាក់ចំណូលប្រចាំថ្ងៃរបស់ពួកគេបានថយចុះជាងឆ្នាំមុន ដោយសារប្រជាពលរដ្ឋរឹតត្បិតការចំណាយនៅមុនពិធីបុណ្យឆ្នាំថ្មីប្រពៃណីខ្មែរ ព្រោះតែការបារម្ភពីការរីករាលដាលរបស់ជំងឺកូវីដ ១៩ អូសបន្លាយរយៈពេលយូរ។
បើទោះបីជារដ្ឋាភិបាលបានប្រកាសលុបចោលការរៀបចំពិធីបុណ្យឆ្នាំថ្មីប្រពៃណីខ្មែរដើម្បីទប់ស្កាត់ការរីករាលដាលនៃវីរុសកូរ៉ូណា ក៏ប៉ុន្តែពិធីសែនព្រេនដូនតាដែលបានចែកឋានទៅហើយនឹងនៅតែអនុវត្តទៅតាមទម្លាប់របស់ប្រជាពលរដ្ឋជាធម្មតា។ ការណ៍នេះនាំឲ្យប្រជាពលរដ្ឋត្រូវចំណាយប្រាក់ច្រើន ដើម្បីទិញគ្រឿងសំណែន និងបន្លែត្រីសាច់ទុកធ្វើម្ហូបអាហារសម្រាប់សែនដូនតានៅក្នុងឱកាសពិធីបុណ្យចូលឆ្នាំខ្មែរដែលនឹងប្រព្រឹត្តទៅពីថ្ងៃទី ១៣ ដល់ ១៦ ខែមេសា ខាងមុខ។
អាជីវករលក់បន្លែ និងអីវ៉ាន់ចាប់ហួយនៅភ្នំពេញ អ្នកស្រី ហាក់ ឡាយហៀក បានឲ្យដឹងថាជាទូទៅមុនពិធីបុណ្យចូលឆ្នាំប្រពៃណីខ្មែរចូលមកដល់សកម្មភាពលក់ដូររបស់គាត់មានភាពមមាញឹកខ្លាំង ប៉ុន្តែឆ្នាំនេះមិនដូចឆ្នាំមុនទេ ដោយសារប្រជាពលរដ្ឋមានការត្បិតត្បៀតក្នុងការចាយវាយចំពេលការរីករាលដាលកូវីដ ១៩។
អ្នកស្រីថ្លែងថា៖ «នៅពេលនេះខ្ញុំលក់ដាច់មួយៗ បើមើលទៅលក់មិនសូវដាច់ដូចឆ្នាំមុនទេ ហើយចំណូលក៏ធ្លាក់តាមហ្នឹងដែរ។ ខ្ញុំឃើញថា ទំនិញសម្រាប់សែនដូនតានៅក្នុងពិធីបុណ្យចូលឆ្នាំខែ្មរ ដូចភេសជ្ជៈ និងទៀនធូបហាក់លក់មិនសូវដាច់ទេ»។
កំពុងហាន់សាច់ជ្រូកចៀនបណ្តើរនិយាយត្អូញត្អែរបណ្តើរ អ្នកស្រី ម៉ី រ៉ាណែត អាជីវករលក់បាយនៅក្បែរផ្សារសារឿនស្ថិតនៅក្នុងខណ្ឌដង្កោ រាជធានីភ្នំពេញបានរៀបរាប់ថា ការលក់ដូរមិនកាក់កបនោះទេនៅប៉ុនា្មនខែមកនេះ ដោយសារបញ្ហាជំងឺកូវីដ ១៩។
អ្នកស្រីជឿថាការបាត់បង់ការងាររបស់កម្មកររោងចក្ររាប់ម៉ឺននាក់ ដោយសារការរាតត្បាតជំងឺកូវីដ ១៩ បានជះឥទ្ធិពលអវិជ្ជមានដល់ការរកស៊ីទទួលទានរបស់គាត់។
អ្នកស្រីថ្លែងថា៖ «ខ្ញុំធ្លាប់តែលក់បាយដាច់ខ្លាំងនៅពេលជិតចូលឆ្នាំខែ្មរម្តងៗ ដោយពីមុន ១ ថ្ងៃអង្ករ ៣០ កំប៉ុងសម្រាប់ដាំបាយ និងសាច់ជាង ១០ គីឡូក្រាមលក់គ្មានសល់ តែសព្វថ្ងៃនេះវិញ ១ ថ្ងៃអង្ករ ១០ កំប៉ុង លក់មិនចង់អស់ផង បើលក់មិនដាច់ដូច្នេះខ្ញុំមិនដឹងបានលុយមកពីណាបង់កម្ចីឲ្យធនាគារទេ»។
អ្នកស្រី គីម សុង ម្ចាស់ហាងកាហ្វេឈ្មោះ IDOL ដែលមាន ៤ សាខានៅភ្នំពេញបានប្រាប់ថា ការលក់ដូររបស់ហាងអ្នកស្រីនៅឆ្នាំនេះហាក់ថមថយបន្តិចដោយសារតែសាខាមួយរបស់អ្នកស្រីនៅក្នុងផ្សារច្បារអំពៅត្រូវបានបិទជាបណ្តោះអាសន្ន បន្ទាប់ពីរកឃើញប្រជាពលរដ្ឋមានផ្ទុកវីរុសកូរ៉ូណា ១ ករណីនៅតំបន់នោះ។
អ្នកស្រីថ្លែងថា៖ «សាខានោះធ្លាប់តែលក់ដាច់ខ្លាំង តែតាំងពីរកឃើញមានកូវីដនៅតំបន់នោះ ខ្ញុំលក់មិនដាច់សោះ។ សព្វថ្ងៃជាមធ្យមលក់បានចន្លោះពី ៦០-៨០ កែវប៉ុណ្ណោះដែលកាលពីមុនលក់បានច្រើនជាងនេះ ជាពិសេសជិតចូលឆ្នាំខ្មែរម្តងៗ»។
ចំណែកម្ចាស់ហាងលក់អីវ៉ាន់ចាប់ហួយមួយរូបទៀតសុំមិនបញ្ចេញឈ្មោះ បានឲ្យដឹងថាស្របពេលលក់មិនសូវដាច់ បែរជាទំនិញមួយចំនួនត្រូវបានអាជីវករលក់ទំនិញបោះដុំឆ្លៀតឡើងថ្លៃថែមទៀត។
លោកបញ្ជាក់ថា៖ «ទំនិញភាគច្រើននាំចូលពីប្រទេសថៃ និងវៀតណាម ត្រូវបានដំឡើងថ្លៃដូចត្រីខកំប៉ុង និងមីជាដើម សព្វថ្ងៃត្រីខកំប៉ុងឡើងថ្លៃរហូតដល់ជាង ៣០ ០០០ រៀល ក្នុង ១ ឡូ ប៉ុន្តែទំនិញដែលផលិតក្នុងស្រុកអត់ឡើងថ្លៃទេដូចជាភេសជ្ជៈ ទឹកសុទ្ធ ជាដើម»។
កាលពីថ្មីៗនេះ រដ្ឋាភិបាលបានចេញវិធានការមិនឲ្យមាននាំចេញស្រូវ អង្ករស ត្រី ទៅក្រៅប្រទេសដើម្បីរក្សាស្ថិរភាពស្បៀងអាហារ និងទប់កុំឲ្យតម្លៃទំនិញលើទីផ្សារឡើងថ្លៃខ្ពស់ចំពេលមានការរាតត្បាតជំងឺកូវីដ ១៩៕
