អាជីវកម្ម​នៅ​សហគមន៍​អ៊ិស្លាម​បាន​ប្រយោជន៍​ពី​បុណ្យ រ៉ាម៉ាដន


ភ្នំពេញៈ អាជីវកម្ម​លក់​រាយ​ក្នុង​ផ្សារ​សហគមន៍​មាន​ខ្មែរ-អ៊ិស្លាម ទទួល​បាន​ប្រយោជន៍​ជា​ច្រើន​ពី​ការ​លក់​ខណៈ​បុណ្យ​របស់​សាសនិក​អ៊ិស្លាម​ឬ «បុណ្យ រ៉ាម៉ាដន» ចាប់​ផ្តើម​នៅ​ថ្ងៃ​នេះ។

អាជីវករ​លក់​រាយ​ជាច្រើន​នៅ​ផ្សារ ច្រាំងចំរេះ ក្នុង​ខណ្ឌ ឫស្សីកែវ​អះអាង​ថា អាជីវកម្ម​របស់​ខ្លួន​ហាក់​ដូច​ជា​កាក់​កប​ខ្លាំង​ក្នុង​រយៈ​ពេល​ពីរ​ថ្ងៃ។

អាជីវករ ឈ្មោះ លី ទាង បាន​ឲ្យ​ដឹង​ថា ទំនិញ​សម្រាប់​ធ្វើ​ម្ហូប​លក់​ដាច់​ខ្លាំង ក្នុង​រយៈ​ពេល​ពីរ​ថ្ងៃ​ចុង​ក្រោយ​មុន​ពិធី​បុណ្យ រ៉ាម៉ាដន ចូល​មក​ដល់​។ អាជីវករ​រូប​នេះ​បាន​អះអាង​ថា ខ្លួន​លក់​ម្សៅ​មី​អស់​ប្រមាណ ២៥០ គីឡូក្រាម​លើស​ថ្ងៃ​ធម្មតា​ដែល​លក់​បាន​ត្រឹម ៥០ គីឡូក្រាម​ប៉ុណ្ណោះ ចំណែក​ឯ​ពង​ទា​វិញ​លក់​បាន​ជាង ២០០០ គ្រាប់ ខណៈ​ថ្ងៃ​ធម្មតា​លក់​បាន​ត្រឹម ៤០០ ទៅ ៥០០ ពង​ប៉ុណ្ណោះ​។

អ្នក​ស្រី​បន្ត​ថា៖ «យើង​លក់​ដាច់​ច្រើន​ជាង​គេ គឺ​ម្សៅ​មី និង​ពង​ទា​សម្រាប់​ធ្វើ​នំ​។ គេ​ទិញ​យក​ទៅ​ធ្វើ​នំ និង​ធ្វើ​ម្ហូប»។

អាជីវករ​ម្នាក់​ទៀត​ឈ្មោះ ណូ ទីម៉ាស អាយុ ៣១ ឆ្នាំ លក់​សាច់​គោ​នៅ​ផ្សារ​នេះ​ដែរ​និយាយ​ថា អ្នក​ស្រី​លក់​សាច់​គោ​អស់​ជិត ១០០ គីឡូ ដែល​ថ្ងៃ​ធម្មតា​មាន​តែ ៥០ គីឡូ​ប៉ុណ្ណោះ។ អ្នក​ស្រី​បន្ត​ថា តម្លៃ​សាច់​គោ​លក់​ក្នុង​តម្លៃ​ចាប់​ពី ២៥ ០០០ រៀល ទៅ ៣៣ ០០០ រៀល​ក្នុង​មួយ​គីឡូក្រាម​ទៅ​តាម​ប្រភេទ​សាច់។

លោក ឧស្មាន់ ហាសាន់ ប្រធាន​សមាគម​ខ្មែរ​អ៊ិស្លាម​នៅ​កម្ពុជា​ឲ្យ​ដឹង​ថា ប្រជាជន​ខ្មែរ-អ៊ិស្លាម​មាន​ប្រមាណ ៦០ ម៉ឺន​នាក់​ទូទាំង​ប្រទេស ហើយ​ពួក​គេ​តែង​តែ​ត្រៀម​ខ្លួន​ចំណាយ​ច្រើន​ខុស​ពី​ថ្ងៃ​ធម្មតា​នៅ ថ្ងៃ​ចុង​ក្រោយ​បុណ្យ រ៉ាម៉ាដន៕

ព័ត៌មានថ្មីៗ