ទីក្រុងវ៉ាស៊ីនតោនៈ ប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃចន្ទថា លោកពេញចិត្តចំពោះកម្មវិធីដែលប្រកាសដោយធនាគារកណ្តាលអាមេរិកដើម្បីជួយសម្រួលដល់កម្មវិធីផ្តល់ប្រាក់កម្ចីដ៏ច្រើនរបស់រដ្ឋាភិបាលសម្រាប់អាជីវកម្មធុនតូចដែលរងការបិទអាជីវកម្មដោយវីរុសកូរ៉ូណា។
ក្នុងសន្និសីទប្រចាំថ្ងៃ សង្ខេបព័ត៌មានស្តីពីវីរុសកូរ៉ូណាលោកប្រធានាធិបតីបាននិយាយថា៖ «ពិតជាធ្វើការល្អមែនទែន»។
លោកនិយាយថា៖ «រហូតមកទល់ថ្ងៃចន្ទ អាជីវកម្មខ្នាតតូចរាប់ម៉ឺនបានដាក់ពាក្យស្នើសុំកញ្ចប់ជំនួយច្រើនជាងចំនួន ៤០ ពាន់លានដុល្លារ» ដោយកត់សម្គាល់ថា មូលនិធិនោះនឹងសង្គ្រោះការងារជិត ២ លាន។
ប៉ុន្តែលោក ត្រាំ មិនអាចបញ្ជាក់ច្បាស់លាស់ថា តើទឹកប្រាក់ប៉ុន្មានត្រូវបានចំណាយដល់ម្ចាស់អាជីវកម្មរួចនោះទេ។
ធនាគារកណ្តាលអាមេរិកបាននិយាយថា ខ្លួននឹងទិញកម្ចីចាំបាច់ដែលធនាគារផ្តល់ដល់អាជីវកម្មខ្នាតតូចក្រោមកម្មវិធីការពារប្រាក់បៀវត្សរ៍ (PPP) ដែលបានដាក់ឲ្យដំណើរការកាលពីថ្ងៃសុក្រកន្លងទៅ។ កម្មវិធីនោះនឹងធ្វើឲ្យអ្នកផ្តល់កម្ចីជាសាច់ប្រាក់ដើម្បីផ្តល់បន្តទៅអ្នកផ្សេងទៀត។
កម្មវិធីនោះផ្តល់ទឹកប្រាក់ចំនួន ៣៥០ ពាន់លានដុល្លារ ក្នុងហិរញ្ញប្បទានធានាដោយរដ្ឋាភិបាលតាមរយៈអ្នកផ្តល់កម្ចីឯកជនដែលនឹងត្រូវបានលើកលែង ប្រសិនបើអាជីវកម្មទាំងឡាយណារាប់ចាប់តាំងពីហាងតូចៗដល់ភោជនីយដ្ឋានធំដែលប្រើប្រាស់មូលនិធិនោះ ដើម្បីបើកប្រាក់ខែដល់បុគ្គលិករបស់ពួកគេ។
កម្មវិធីនោះដែលជាផ្នែកនៃកញ្ចប់ថវិកាសង្គ្រោះចំនួន ២,២ ពាន់ពាន់លានដុល្លារ ត្រូវបានអនុម័តកាលពីខែមីនា និងត្រូវបានធ្វើការងារជាបន្ទាន់ដោយរតនាគារជាតិ និងរដ្ឋបាលអាជីវកម្មធុនតូចកាលពីសប្តាហ៍មុន។
ធនាគារបានត្អូញត្អែរថា ពួកគេមិនទទួលបានការណែនាំលម្អិតអំពីរបៀប ដើម្បីគ្រប់គ្រងដំណើរការ ខណៈអ្នកខ្ចីត្រូវបានទុកមួយឡែកនោះ។
លោក ត្រាំ ក៏បាននិយាយផងដែរថា រដ្ឋាភិបាលបានត្រៀមរួចរាល់ដើម្បីស្នើសុំប្រាក់បន្ថែមទៀត បើសិនចាំបាច់។
លោក Larry Kudlow ទីប្រឹក្សាសេដ្ឋកិច្ចសេតវិមានបាននិយាយកាលពីថ្ងៃចន្ទថា មានស្នើប្រាក់កម្ចីចំនួន ១៣០ ០០០ គណនីដែលមានទឹកប្រាក់សរុប ៣៨ ពាន់លានដុល្លារពីអ្នកផ្តល់កម្ចីចំនួន ២ ៤០០ នាក់ និងស្ថាប័នផ្សេងៗគ្នា។
ប៉ុន្តែសំណួរអំពីកម្មវិធីបានប្រមូលផ្តុំលើអ្វីៗគ្រប់យ៉ាងពីច្បាប់លាងលុយកខ្វក់ធនាគាររហូតដល់របៀបដែលប្រាក់កម្ចីនេះអាចត្រូវបានអនុម័តយ៉ាងរហ័សពីអ្នកផ្តល់កម្ចីដែលមិនមែនជាផ្នែករបស់ SBA កាលពីមុននោះ។
ចំណុចដែលសំខាន់នៃរឿងនោះជាចំណុចលម្អិតយ៉ាងល្អិតល្អន់អំពីទម្រង់ និងឯកសារ។
អាជីវកម្មខ្លះដែលដាក់ពាក្យស្នើសុំជំនួយហិរញ្ញប្បទានបាននិយាយថា ការស្នើសុំរបស់ពួកគេត្រូវដាក់ជាពំនូក ប៉ុន្តែគ្មានពាក្យឆ្លើយតបថា ពួកគេត្រូវរង់ចាំយូរប៉ុនណានោះទេ។
សមាគមធនាគារសហគមន៍ឯករាជ្យ (ICBA) កាលពីថ្ងៃចន្ទបានហៅការដាក់ឲ្យដំណើរការកម្មវិធីនោះថា «ទន់ខ្សោយ» និងបានលើកឡើង «នូវកង្វះខាតការណែនាំច្បាស់លាស់» និង «ការពន្យារពេលដ៏សែនយូរ» ក្នុងការទទួលបានដំណើរការប្រាក់កម្ចី ដោយសារការមិនចង់ដោះស្រាយនៅ SBA។
លោកស្រី Rebeca Romero Rainey ប្រធាន ICBA បានថ្លែងឲ្យដឹងថា៖ «ជិត ៤៨ ម៉ោង បន្ទាប់ពីកម្មវិធីដាក់ឲ្យដំណើរការ អ្នកផ្តល់កម្ចីរាប់រយនាក់នៅតែព្យាយាមទទួលការអនុម័ត ដើម្បីចូលទៅកាន់ប្រព័ន្ធ SBA ដូចនេះគេអាចដំណើរការប្រាក់កម្ចីបាន»។
លោកស្រីក៏បានអំពាវនាវផងដែរ ដល់ធនាគារកណ្តាលដើម្បីដំណើរការទីផ្សារទី ២ សម្រាប់កម្ចីនោះស្រដៀងទៅនឹងអ្វីដែលគេធ្វើជាមួយការបង់រំលស់ផ្ទះដែលប្រាក់កម្ចីត្រូវបានគេលក់ ដោយពួកគេមិនស្ថិតនៅក្នុងបញ្ជីរបស់អ្នកផ្តល់ប្រាក់កម្ចីនោះទេ ហើយធនាគារកណ្តាលបានប្រកាសកាលពីថ្ងៃចន្ទថា ខ្លួនធ្វើបែបនោះ។
ធនាគារកណ្តាលបានអះអាងក្នុងសេចក្តីប្រកាសថា៖ «ដើម្បីសម្រួលដល់ការផ្តល់ប្រាក់កម្ចីដល់សហគ្រាសខ្នាតតូចតាមរយៈកម្មវិធីការពារប្រាក់ខែបុគ្គលិករបស់រដ្ឋបាលអាជីវកម្មខ្នាតតូច ធនាគារកណ្តាលនឹងបង្កើតការសម្របសម្រួលដើម្បីផ្តល់ហិរញ្ញវត្ថុមានកាលកំណត់ គាំទ្រដោយកម្ចីរបស់កម្មវិធី (PPP)»។ ធនាគារកណ្តាលបន្ថែមថា៖ «សេចក្តីលម្អិតបន្ថែមនឹងត្រូវប្រកាសនៅក្នុងសប្តាហ៍នេះ»៕ RR