លោក ដូណាល់ ត្រាំ ដែលកាលពីសប្តាហ៍មុនបានចុះហត្ថលេខាលើបញ្ជាហាមឃាត់ការប្រើប្រាស់ឧបករណ៍របស់ Huawei។ AFP
ក្រុងសេអ៊ូលៈ រដ្ឋាភិបាលអាមេរិកកំពុងបញ្ចុះបញ្ចូលប្រទេស កូរ៉េខាងត្បូង មិនឲ្យប្រើប្រាស់ផលិតផលរបស់ក្រុមហ៊ុន Huawei ចំពេលមានការជំរុញកាន់តែទូលំទូលាយរបស់ទីក្រុងវ៉ាស៊ីនតោនទៅសម្ព័ន្ធមិត្តរបស់ខ្លួនឲ្យបដិសេធទំនិញរបស់ក្រុមហ៊ុនបច្ចេកវិទ្យារបស់ប្រទេស ចិន មួយនេះ។ នេះបើយោងតាមសេចក្តីរាយការណ៍របស់កាសែតប្រទេស កូរ៉េខាងត្បូង កាលពីថ្ងៃព្រហស្បតិ៍។
.jpg)
កាសែត Chosun Ilbo បានរាយការណ៍ថា មន្ដ្រីក្រសួងការបរទេសអាមេរិក បានឲ្យដឹងនៅក្នុងកិច្ចប្រជុំមួយនៅពេលថ្មីៗជាមួយសមភាគីប្រទេស កូរ៉េខាងត្បូងថា ក្រុមហ៊ុននៅក្នុងស្រុក telco LG Uplus ដែលប្រើប្រាស់ឧបករណ៍របស់ក្រុមហ៊ុន Huawei «មិនគួរត្រូវបានអនុញ្ញាតឲ្យបម្រើនៅក្នុងវិស័យងាយបង្កជាបញ្ហានៅក្នុងប្រទេស កូរ៉េខាងត្បូង នោះទេ»។
មន្ដ្រីនោះបន្ថែមថា ក្រុមហ៊ុន Huawei នៅទីបញ្ចប់ត្រូវបណ្ដេញចេញពីប្រទេសនេះ។
មន្ដ្រីក្រុមហ៊ុន LG Uplus បានប្រាប់ទីភ្នាក់ងារព័ត៌មានកាលពីថ្ងៃព្រហស្បតិ៍ថា៖ «LG Uplus មិនបានទទួលសេចក្ដីប្រកាស ឬសំណើណាមួយពីក្រសួងការបរទេសរបស់ប្រទេស កូរ៉េខាងត្បូង ឬអាមេរិក ទាក់ទងទៅនឹងការប្រើប្រាស់ឧបករណ៍ក្រុមហ៊ុន Huawei របស់យើងនោះទេ»។
ទីក្រុងវ៉ាស៊ីនតោន កំពុងដាក់សម្ពាធលើសម្ព័ន្ធមិត្តរបស់ខ្លួនមិនឲ្យប្រើប្រាស់ឧបករណ៍ដែលផលិតដោយក្រុមហ៊ុន Huawei ដោយសារបារម្ភថា ឧបករណ៍នេះអាចត្រូវបានប្រើប្រាស់សម្រាប់ចារកិច្ច ឬការវាយប្រហារអ៊ីនធឺណិតជាការបារម្ភដែលក្រុមហ៊ុន Huawei ចាត់ទុកថាមិនមានមូលដ្ឋាន។
យុទ្ធនាការប្រឆាំងក្រុមហ៊ុន Huawei បានកើនឡើងកាន់តែខ្លាំងកាលពីសប្ដាហ៍មុន នៅពេលលោកប្រធានាធិបតីអាមេរិក ដូណាល់ ត្រាំ បានចុះហត្ថលេខាលើបញ្ជាប្រតិបត្តិ ដែលបានហាមឃាត់ការប្រើប្រាស់ឧបករណ៍របស់ក្រុមហ៊ុន Huawei នៅក្នុងបណ្ដាញទូរគមនាគមន៍អាមេរិកដោយឈរលើមូលដ្ឋានសន្ដិសុខជាតិ។ លើសពីនេះ ក្រសួងពាណិជ្ជកម្ម បានដាក់កម្រិតលើការទិញបច្ចេកវិទ្យាអាមេរិករបស់ក្រុមហ៊ុននេះ។
កាសែត Chosun Ilbo បានរាយការណ៍ដោយលើកឡើងប្រភពទូតមិនបញ្ចេញឈ្មោះនៅទីក្រុងសេអ៊ូលថា រដ្ឋាភិបាលអាមេរិក បានបញ្ជូនសារម្ដងហើយម្ដងទៀត ទៅក្រសួងការបរទេសរបស់ប្រទេស កូរ៉េខាងត្បូង តាមរយៈបណ្ដាញទូតផ្សេងៗ ដែលថា ការប្រើប្រាស់ផលិតផលរបស់ក្រុមហ៊ុន Huawei អាចបង្កបញ្ហាសន្ដិសុខ។
ក្រសួងការបរទេសប្រទេស កូរ៉េខាងត្បូង បានឲ្យដឹងនៅក្នុងសេចក្ដីប្រកាសព័ត៌មានមួយថា៖ «អាមេរិកបានបញ្ជាក់ពីសារៈសំខាន់នៃសន្ដិសុខ សម្រាប់ឧបករណ៍ 5G ហើយយើងយល់ដឹងអំពីតួនាទីរបស់អាមេរិក»។ ក្រសួងបន្ថែមថា ទីក្រុងសេអ៊ូល និងទីក្រុងវ៉ាស៊ីនតោន បានបន្តការចរចាលើបញ្ហានេះ ប៉ុន្តែបដិសេធធ្វើអត្ថាធិប្បាយ។ ស្ថានទូតអាមេរិកនៅទីក្រុងសេអ៊ូល មិនបានឆ្លើយតបការស្នើសុំការអត្ថាធិប្បាយភា្លមៗទេ៕ LA
