អ្នកដំណើរកំពុងជិះកង់កាត់មុខមជ្ឈមណ្ឌលរបស់ក្រុមហ៊ុន Google នៅរដ្ឋកាលីហ្វ័រនីញ៉ា ។ រូបថត AFP
វ៉ាស៊ីនតោនៈ រដ្ឋមន្ត្រីក្រសួងរតនាគារអាមេរិកលោក Steven Mnuchin នឹងជំរុញឲ្យប្រទេសជាច្រើនដូចជាបារាំងពន្យារការយកពន្ធលើក្រុមហ៊ុនបច្ចេកវិទ្យាធំៗរបស់អាមេរិក ដូចជា Google និង Amazon ជាដើមដោយរង់ចាំការចរចាកិច្ចព្រមព្រៀងស្តីពីពន្ធអន្តរជាតិជាមុនសិន។ នេះបើយោងតាមលិខិតដែលចេញផ្សាយកាលពីថ្ងៃពុធ។
.jpg)
ខណៈដែលអាមេរិកគ្រោងនឹងយកពន្ធនាំចូលលើទំនិញរបស់ប្រទេសបារាំងរហូតដល់ ១០០ ភាគរយ ដែលមានតម្លៃ ២,៤ ពាន់លានដុល្លារ ទៅលើសេវាពន្ធឌីជីថលរបស់ប្រទេសនេះលោក Mnuchin និយាយថាចរចានៅក្នុងអង្គការអភិវឌ្ឍន៍ និងកិច្ចសហប្រតិបត្តិការសេដ្ឋកិច្ច (OECD) គឺជាកូនសោដ៏សំខាន់ក្នុងការដោះស្រាយបញ្ហាពន្ធដ៏ចម្រូងចម្រាសនេះ។
លោកថ្លែងក្នុងលិខិតទៅកាន់លោក Jose Angel Gurria ប្រធាន OECD ថា៖ «យើងជឿថា វាមានសារៈសំខាន់ដែលការជជែកទាំងនេះនឹងឈានទៅរកកិច្ចព្រមព្រៀងមួយដើម្បីការពារ ការសម្រេចជាឯកតោភាគី ដូចជាពន្ធលើសេវាឌីជីថល ដែលគំរាមកំហែងដល់កិច្ចព្រមព្រៀងពន្ធអន្តរជាតិ»។
លោកបានបន្តថា៖ «យើងជំរុញឲ្យប្រទេសទាំងអស់ពន្យារគំនិតផ្តួចផ្តើមការយកពន្ធលើសេវាឌីជីថល ដើម្បីទុកពេលឲ្យ OECD ឈានទៅរកកិច្ចព្រមព្រៀងជាឯកតោភាគី»។
លោក Robert Lighthizer តំណាងពាណិជ្ជកម្មអាមេរិកបានបញ្ចេញរបាយការណ៍កាលពីថ្ងៃចន្ទដោយរិះគន់វិធានការពន្ធរបស់បារាំងថាជា ការរើសអើងនឹងធ្វើឡើងដើម្បីសំដៅដល់ក្រុមហ៊ុនបច្ចេកវិទ្យាធំៗរបស់អាមេរិក ដូចជា ក្រុមហ៊ុន Google ក្រុមហ៊ុន Apple ក្រុមហ៊ុន Facebook និង ក្រុមហ៊ុន Amazon។
លោកបន្តថា ទីក្រុងវ៉ាស៊ីនតោននឹងចាត់ចែងឲ្យបានលឿនជាមួយនឹងផែនការយកពន្ធលើទំនិញបារាំង រួមមាន ស្រាសាំប៉ាញ គ្រឿងសម្អាង ទឹកដោះគោជូរ និងឈីស។
ការសម្រេចចិត្តនេះបានផ្ញើសារយ៉ាងច្បាស់ដែលថាអាមេរិកនឹងចាត់វិធានការប្រឆាំងនឹងរបបពន្ធលើសេវាឌីជីថលដែលរើសអើង ដែលដាក់បន្ទុកលើក្រុមហ៊ុនអាមេរិក។ នេះបើយោងតាមលោក Lighthizer។
ការយកពន្ធរបស់បារាំងគឺ ៣ ភាគរយលើប្រាក់ចំណូលរបស់ក្រុមហ៊ុនបច្ចេកវិទ្យានៅក្នុងប្រទេសបារាំងដែលបានមកពីការផ្សព្វផ្សាយពាណិជ្ជកម្ម អនឡាញ និងសេវាឌីជីថលផ្សេងទៀត។
វិធាននេះសំដៅដល់ប្រាក់ចំណូលជាជាងប្រាក់ចំណេញដែលតែងតែត្រូវបានរាយការណ៍ដោយក្រុមហ៊ុនបច្ចេកវិទ្យានៅក្នុងប្រទេសដែលមានពន្ធទាបដូចជា អៀរឡង់ និងលុចសំបួ។
ការិយាល័យរបស់លោក Lighthizer បានឲ្យដឹងថា ខ្លួនកំពុងពិចារណា ពង្រីកការស៊ើបអង្កេតករណីស្រដៀងគ្នានេះនៅក្នុងប្រទេសអូស្ត្រាលី អ៊ីតាលី និងតួកគីផងដែរ។
លោក Mnuchin បាននិយាយថា៖ «មានការគាំទ្រដ៏ទូលំទូលាយដែលផ្តល់នូវពន្ធជាក់លាក់ដ៏អស្ចារ្យមួយ»។ លោកបន្តថា៖ «យើងរង់ចាំធ្វើការជាមួយ OECD លើបញ្ហានេះដែលបានធ្វើរួចហើយនោះ»។
មន្ត្រីជាន់ខ្ពស់របស់សហភាពអឺរ៉ុបបានបង្ហាញពីក្តីបារម្ភនៅសប្តាហ៍នេះ ថារដ្ឋាភិបាលលោក ត្រាំ កំពុងរៀបចាំផែនការដកចេញពីការចរចាជាឯកតោភាគី។
លោក Cedric O រដ្ឋមន្ត្រីសេដ្ឋកិច្ចបារាំងសម្រាប់សេដ្ឋកិច្ចឌីជីថលបានប្រាប់AFP នៅក្នុងទីក្រុងវ៉ាស៊ីនតោនកាលពីថ្ងៃអង្គារ បារាំងមានជំនឿថានឹងនៅតែមានពេលគ្រប់គ្រាន់ដើម្បីកាត់បន្ថយការគំរាមកំហែងពន្ធនេះ។
លោកថ្លែងថា៖ «នេះជាលើកទី ១ ហើយកម្មបទដ៏សំខាន់ដែលយើងត្រូវតែជម្នះកិច្ចព្រមព្រៀងនៅអង្គការ OECD។ ជម្លោះបច្ចុប្បន្ននេះមិនមែនជាចុងបញ្ចប់នៃរឿងទេ»៕ LA
