ក្រុងតេអេរ៉ង់ៈ ក្រុមហ៊ុនប្រេងអ៊ីរ៉ង់ចំនួន ២ កាលពីថ្ងៃសៅរ៍បានចុះហត្ថលេខាលើកិច្ចព្រមព្រៀងមួយដែលមានតម្លៃ ៤៤០ លានដុល្លារ ដើម្បីអភិវឌ្ឍវាលឧស្ម័នមួយនៅឈូងសមុទ្រដែលមានភាពរសើបរបស់ប្រទេសនេះដោយក្រសួងប្រេងបានឲ្យដឹងថា កិច្ចព្រមព្រៀងនេះបង្ហាញថា អាមេរិកមិនអាចបញ្ឈប់ប្រទេសអ៊ីរ៉ង់ជាមួយនឹងការដាក់ទណ្ឌកម្មបានទេ។
លោក Bijan Namdar Zanganeh រដ្ឋមន្ត្រីក្រសួងប្រេងរបស់ប្រទេសអ៊ីរ៉ង់បានថ្លែងថា កិច្ចព្រមព្រៀងនេះដែលត្រូវបានធ្វើឡើងរវាងក្រុមហ៊ុនរដ្ឋចំនួន ២ គឺក្រុមហ៊ុន Pars Oil and Gas Company និងក្រុមហ៊ុន PetroPars ដើម្បីអភិវឌ្ឍអណ្តូងឧស្ម័ន Balal នឹងជាកិច្ចព្រមព្រៀងមួយក្នុងចំណោមកិច្ចព្រមព្រៀងជាច្រើនដែលនឹងត្រូវធ្វើឡើង។
ភាពតានតឹងបានកើនឡើងក្នុងឈូងសមុទ្រនេះចាប់តាំងពីឆ្នាំមុនមកជាពេលដែលអាមេរិកបានចាប់ផ្តើមដាក់ទណ្ឌកម្មឡើងវិញទៅលើប្រទេសអ៊ីរ៉ង់ បន្ទាប់ពីបានដកខ្លួនដោយឯកតោភាគីពីកិច្ចព្រមព្រៀងសម្រេចបានឆ្នាំ ២០១៥ ដែលបានដាក់កម្រិតលើកម្មវិធីនុយក្លេអ៊ែរបស់ប្រទេសនេះ។
លោក Zanganeh ត្រូវបានដកស្រង់សម្ដីដោយគេហទំព័រ Shana របស់ក្រសួងប្រេងអ៊ីរ៉ង់ ខណៈលោកថ្លែងថា៖ «ការចុះហត្ថលេខាលើកិច្ចសន្យានេះគឺជាការចាប់ផ្តើមនៃដំណើរការមួយ»។
លោករដ្ឋមន្ត្រីរូបនេះបានមានប្រសាសន៍ថា៖ «នេះគឺជាសញ្ញាមួយដែលបង្ហាញថា យើងនៅតែកំពុងដំណើរការមុខងារដដែលបើទោះជាការដាក់ទណ្ឌកម្មឡើងដល់កម្រិតកំពូលក្តី។ យើងនៅរស់ យើងនៅតែសកម្ម និងធ្វើការងារសម្រាប់ឧស្សាហកម្មប្រេងរបស់ប្រទេសអ៊ីរ៉ង់»។
លោកបន្តថា ទណ្ឌកម្ម «មិនអាចបញ្ឈប់វឌ្ឍនភាពរបស់ឧស្សាហកម្មប្រេងអ៊ីរ៉ង់ និងការអភិវឌ្ឍរបស់ឧស្សាហកម្មនេះបានឡើយ»៕ KC