អ្នកដំណើរឆ្លងកាត់ព្រលានយន្តហោះក្រុងហុងកុង ខណៈបាតុករធ្វើបាតុកម្មនាពេលកន្លងមក។ AFP
ក្រុងហុងកុងៈ ទាំងអ្នកដំណើរ និងបរិមាណទំនិញឆ្លងកាត់ព្រលានយន្តហោះអន្តរជាតិក្រុងហុងកុង (HKIA) បានធ្លាក់ចុះខ្លាំងនៅខែសីហា ដោយសារការបាតុកម្មខុសច្បាប់ និងអំពើហិង្សាបានរារាំងយ៉ាងខ្លាំងដល់ប្រតិបត្តិការរបស់ព្រលាននេះ។ នេះបើយោងតាមទិន្នន័យកាលពីថ្ងៃអាទិត្យដែលរាយការណ៍ដោយទីភ្នាក់ងារព័ត៌មានស៊ីនហួររបស់ប្រទេសចិន។
.jpg)
អាជ្ញាធរព្រលានយន្តហោះ (AA) បានឲ្យដឹងក្នុងសេចក្តីថ្លែងការណ៍មួយថា ព្រលាន HKIA ទទួលបានអ្នកដំណើរចំនួន ៦ លាននាក់ កាលពីខែមុន ធ្លាក់ចុះ ១២,៤ ភាគរយ ធៀបនឹងរយៈពេលដូចគ្នាកាលពីខែមុន។ ចលនាចរាចរណ៍ផ្លូវអាកាសមានចំនួន ៣៥ ៦៥៥ ជើង ដែលធ្លាក់ចុះ ៣,៥ ភាគរយ ក្នុងខែសីហា ធៀបនឹងពេលដូចគ្នាកាលពីខែមុន។
ការធ្លាក់ចុះទាំងនេះកើតមានដោយសារការធ្លាក់ចុះចរាចរណ៍អ្នកដំណើរ ដោយសារអ្នកធ្វើដំណើរមកពី និងទៅប្រទេសចិន អាស៊ីអាគ្នេយ៍ និងកោះតៃវ៉ាន់បានជួបប្រទះការធ្លាក់ចុះខ្លាំងធៀបនឹងរយៈពេលដូចគ្នាកាលពីឆ្នាំមុន។
យោងតាមសេចក្តីថ្លែងការណ៍ដដែលនេះ ប្រតិបត្តិការរបស់ព្រលាន និងការហោះហើរត្រូវបានរារាំងដោយសារបាតុកម្មនៅព្រលាន។
លោក C K Ng នាយកប្រតិបត្តិផ្នែកប្រតិបត្តិការព្រលានយន្តហោះរបស់អាជ្ញាធរ AA បានថ្លែងថា៖ «ក្នុងរយៈពេល ២-៣ ខែចុងក្រោយនេះមានបញ្ហាប្រឈមយ៉ាងខ្លាំងចំពោះប្រតិបត្តិការរបស់ព្រលាន»។
បរិមាណទំនិញបានបន្តធ្លាក់ចុះនៅខែសីហាដោយការផ្ទេរទំនិញ និងការនាំចូលធ្លាក់ចុះ ១៩ ភាគរយ និង ១៥ ភាគរយរៀងគ្នា។ តួលេខសម្រាប់អាស៊ីអាគ្នេយ៍ និងចិនដីគោកបានធ្លាក់ចុះខ្លាំងបំផុតក្នុងចំណោមតំបន់ពាណិជ្ជកម្មសំខាន់របស់ទីក្រុងហុងកុង។
ក្នុងរយៈពេល ៨ ខែក្នុងឆ្នាំនេះព្រលាន HKIA បានទទួលអ្នកដំណើរ ៥០,៦ លាននាក់ កើន ០,៣ ភាគរយ ធៀបនឹងឆ្នាំមុន៕ People''s Daily/KC
