អ្នក​ផ្គត់ផ្គង់​កូនបង្កង​កំពុង​ប្រឈម​បញ្ហា


130805_11
អាជីវករកំពុងអង្គុយលក់គ្រឿងសមុទ្ររួមមានបង្កងនៅផ្សារមួយនៅខេត្តព្រះសីហនុ ម៉ៃ វីរៈ

ភ្នំពេញៈ កង្វះ​បច្ចេកទេស​និង​ដើមទុន​បាន​ធ្វើឲ្យ​ម្ចាស់​កសិដ្ឋាន​ចិញ្ចឹម​បង្កង​មួយ​ចំនួន​បោះបង់​ការ​ចិញ្ចឹម​។

ម្ចាស់​កសិដ្ឋាន​ផ្គត់ផ្គង់​កូន​បង្កង​សម្រាប់​កសិករ​យក​ទៅ​ចិញ្ចឹម​បន្ត​ជាច្រើន​បោះបង់​ការ​ភ្ញាស់​កូនបង្កង​ដោយ​អះអាង​ថា​គ្មាន​ការ​បញ្ជា​ទិញ​ពី​កសិករ​ទេ​នៅ​ឆ្នាំ​នេះ​។

លោក ម៉ម សារ៉ាន់​ ឈ្មួញ​ភ្ញាស់​កូនបង្កង​និង​កូនត្រី​នៅ​ស្រុក​ឈូក​ខេត្ដ​កំពត​និយាយ​ថា ​លោក​បាន​ចាប់​ផ្តើម​ភ្ញាស់​កូនបង្កង​និង​ត្រី​លក់​ចាប់​តាំងពី​ឆ្នាំ ២០០៩ ​មក ​តែ​ឆ្នាំ​នេះ​ លោក​បាន​បោះបង់​ការ​ភ្ញាស់​កូន​បង្កង​ទំាង​ស្រុង​ដោយ​បន្ត​ការ​ភ្ញាស់​តែ​កូនត្រី​ប៉ុណ្ណោះ​។

លោក​សង្កេត​ឃើញ​ថា កសិករ​ភាគច្រើន​ដែល​ធ្លាប់​បញ្ជា​ទិញ​កូន​បង្កង​បាន​បោះបង់​ការ​ចិញ្ចឹម​បង្កង​ព្រោះ​គេ​បាន​សាកល្បង​ក្នុង​ឆ្នាំ​កន្លង​មក​តែ​ពុំ​ទទួល​បាន​ផល​។

លោក​បន្ត​ថា​៖​«​យើង​មិន​អាច​ធ្វើ​ត​ទៅ​ទៀត​បាន​ទេ​ព្រោះ​កសិករ​អត់​មាន​កុម៉្មង់​ទៀត​ទេ​»​។​ លោក​បាន​ពន្យល់​ថា ​កសិករ​ដែល​ធ្លាប់​ទិញ​កូន​បង្កង​យក​ទៅ​ចិញ្ចឹម​នោះ​មិន​ទទួល​បាន​ផល​ពី​របរ​នេះ​ទេ ព្រោះ​គាត់​ខ្វះ​បច្ចេកទេស​ច្រើន​ក្នុង​ការ​ចិញ្ចឹម​។

លោក​និយាយ​ថា​តម្រូវការ​កូនបង្កង​បាន​កើតឡើង​ប្រមាណ​ពីរ-បី​ឆ្នាំ​ប៉ុណ្ណោះ​ប៉ុន្តែ​បន្ទាប់​ពី​ការ​បរាជ័យ​របស់​កសិករ​។​ទោះ​ជា​យ៉ាង​ណា​លោក​នៅ​បន្ត​ភ្ញាស់​កូនត្រី​សម្រាប់​លក់​ចន្លោះ​ពី​១,៥​លាន​ក្បាល​ទៅ​២​លាន​ក្បាល​ក្នុង​ឆ្នាំ​នេះ​ព្រោះ​ការ​ភ្ញាស់​ត្រី​ត្រូវ​ចំណាយ​តិច​ជាង​។

យោង​តាម​របាយការណ៍​របស់​ក្រសួង​កសិកម្ម​ដែល​ចេញ​ក្នុង​ទិវា​មច្ឆាជាតិ​ក្នុង​ខែ​កក្កដា​ប្រទេស​កម្ពុជា​មាន​កន្លែង​ភ្ញាស់​ត្រី​ជា​លក្ខណៈ​គ្រួសារ​ចំនួន​ ២៨០ ​កន្លែង ​ស្ថិត​ក្រោម​ការ​ផ្តល់​និង​បណ្តុះបណ្តាល​ផ្នែក​បច្ចេកទេស​ពី​រដ្ឋបាល​ជលផល​លើ​ការ​ចិញ្ចឹម​និង​ភ្ញាស់​ដល់​កសិករ​។

របាយការណ៍​ដដែល​បញ្ជាក់​ថា​គ្រូ​បង្គោល​ចំនួន​៣៥០​នាក់​ក្នុង​នោះ​កសិករ​ជា​គ្រូ​បង្គោល​មាន​ ១៥៤ ​នាក់​ និង​មាន​កសិករ​ចំនួន ​៦១ ​០០០ ​គ្រួសារ​បាន​ចូលរួម​ការ​បណ្តុះបណ្តាល​។

នៅ​ឆ្នាំ ​២០១២ ​កម្ពុជា​ប្រមូល​ផល​ត្រី​សរុប​បាន ​៦៨២ ​០០០ ​តោន ​ដោយ​ត្រី​ផលិត​ចេញ​ពី​វារីវប្បកម្ម​មាន​ ៧៤​ ០០០​ តោន​។

កាលពី​ដើម​ឆ្នាំ ​២០១២ ​រដ្ឋបាល​ជលផល​នៃ​ក្រសួង​កសិកម្ម​បាន​បញ្ចេញ​ផែនការ​មួយ​ដោយ​កំណត់​ថា នៅ​ត្រឹម​ឆ្នាំ​២០១៩​កម្ពុជា​អាច​នាំ​ចេញ​ផល​នេសាទ​ ៥០ ​ម៉ឺន ​តោន​ទៅ​កាន់​ទីផ្សារ​ក្រៅ​ប្រទេស​ដែល​មាន​តម្លៃ​រហូត​ដល់​ ១​ ពាន់​លាន​ដុល្លារ​។

លោក​ព្រំ វ៉ាត​កសិករ​ចិញ្ចឹម​និង​ភ្ញាស់​កូន​បង្កង​លក់​នៅ​ស្រុក​អង្គរ​បុរី​ខេត្ដ​តាកែវ​បាន​ឲ្យ​ដឹង​ថា​កាលពី​ឆ្នាំ ​២០១១ លោក​បាន​លក់​កូនបង្កង​អស់​៧០​ម៉ឺន​កូន​តែ​ចំនួន​នេះ​បាន​ធ្លាក់​ចុះ​មក​នៅ​ប្រមាណ ​៤០ ​ម៉ឺន​កូន​នៅ ​២០១២ ​ក្រោម​ផែនការ​ផលិត​ជាង​ពាក់​កណ្តាល​។

លោក​និយាយ​ថា​ កសិករ​នៅ​មិន​ទាន់​ប្រាកដប្រជា​ ខ្លួនឯង​ថា ​ចាប់​កិច្ចការ​អ្វី​ធ្វើ​ឲ្យ​ជាប់លាប់​នោះ​ទេ​ដោយ​កន្លង​មក​ធ្វើ​គ្រាន់​តែ​ផ្អើល​តាម​គ្នា​ថា​គេ​ចិញ្ចឹម​បាន​ខ្លួន​ក៏​ចាប់​ផ្តើម​សាកល្បង​តែ​ពេល​ខ្លួន​ចិញ្ចឹម​មិន​បាន​ក្នុង​ឆ្នាំ​ដំបូង​ក៏​ត្រូវ​បោះបង់​ចោល​។

លោក​បន្ត​ថា​៖ ​«​អ្នក​ចិញ្ចឹម​មិន​ប្រាកដ​ថា​គាត់​ចិញ្ចឹម​បាន​ទទួល​ជោគជ័យ​ទាំងអស់​គ្នា​ទេ​។ ​អ្នក​ខ្លះ​ចិញ្ចឹម​គ្រាន់​ជា​ការ​សាកល្បង​ប៉ុណ្ណោះ​»​។

លោក ​អ៊ុក ​ហាក់​ នាយករង​ផ្នែក​នៃ​ខណ្ឌ​រដ្ឋបាល​ជលផល ​ខេត្ត​តាកែវ ​បាន​និយាយ​ថា ​ការ​ថយ​ចុះ​នៃ​ការ​ផលិត​និង​កសិករ​ចិញ្ចឹម​ ក្នុង​ឆ្នាំ​នេះ ​កើត​ចេញ​ពី​ទឹក​ភ្លៀង​ធ្លាក់​តិចតួច​ដែល​មិន​អាច​មាន​ប្រភព​ទឹក​សម្រាប់​កសិករ​ទិញ​កូនត្រី​ឬ​បង្កង​យក​ទៅ​ចិញ្ចឹម​នោះ​ទេ​។

លោក​បន្ត​ថា​ ចំពោះ​ការ​ផលិត​កូនបង្កង​វិញ ​ក៏​មាន​ឧបសគ្គ​ច្រើន​ព្រោះ​របរ​នេះ​ត្រូវ​ការ​ចំណាយ​ខ្ពស់​និង​បច្ចេកទេស​ខ្ពស់​ក្នុង​ការ​ចិញ្ចឹម​តែ​សម្រាប់​ការ​ផលិត​កូនត្រី​មិន​បាន​ធ្លាក់​ថយ​នោះ​ទេ​គឺ​មាន​ប្រមាណ ​២៥ ​លាន​កូន​នៅក្នុង​ខេត្ត​តាកែវ៕

ព័ត៌មានថ្មីៗ