ADB​ផ្តល់​$៩៤​លាន​ដល់​កម្ពុជា


130827_11
កសិករនៅខេត្តបន្ទាយមានជ័យកំពុងហាលស្រូវដែលទើបប្រមូលផលរួច

ភ្នំពេញៈ ធនាគារ​អភិវឌ្ឍន៍​អាស៊ី (ADB)បាន​ផ្តល់​កម្ចី និង​ជំនួយ​ឥត​សំណង​សរុប​ចំនួន ៩៤ ​លាន​ដុល្លារ​អាមេរិក ក្នុង​នោះ​ជា​កម្ចី​ ៧០ លាន​ដុល្លារ​សម្រាប់​គាំទ្រ​វិស័យ​កសិកម្ម និង​កំណែ​ទម្រង់​វិស័យ​ហិរញ្ញ​វត្ថុ។

រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ លោក គាត ឈន់ និង លោក Eric Sidgwick នាយក​ប្រចាំ​ប្រទេស​នៃ​ធនាគារ​អភិវឌ្ឍន៍​អាស៊ី បាន​ចុះ​ហត្ថលេខា​លើ​កិច្ច ព្រម​ព្រៀង​ទ្វេ​ភាគី​ដែល​គ្រប​ដណ្តប់​លើ​កម្មវិធី​អភិវឌ្ឍន៍​វិស័យ ពាណិជ្ជកម្ម​ភាវូបនីយកម្ម​អង្ករ​ដែល​ធន់​នឹង​អាកាស​ធាតុ (Rice-SDP) និង​កម្មវិធី​ទីពីរ​នៃ​កំណែ​ទម្រង់​ហិរញ្ញ​វត្ថុ​ទី៣។

ក្រៅពីនោះ​ជា​ហិរញ្ញ​ប្បទា​នឥត សំណង​បាន​មក​ពី​ប្រភព​ផ្សេងៗ​មាន​ដូចជា កម្មវិធី​យុទ្ធសាស្រ្ត​សម្រាប់​ភាព​ធន់ និង​អាកាស​ធាតុ និង កម្មវិធី​កសិកម្ម និង​សនិ្តសុខ​ស្បៀង​ពិភព​លោក។

លោក គាត ឈន់ បាន​ឲ្យ​ដឹង​ទឹក​ប្រាក់​ចំនួន ៨៧ លាន​ដុល្លារ​នឹង​អនុវត្ត​លើ​គម្រោង ជំរុញ​ផលិតកម្ម​ស្រូវ និង​ការ​នាំ​ចេញ​អង្ករ ​ខណៈ​ទឹក​ប្រាក់ ១៥ លាន​ដុល្លារ​អភិវឌ្ឍ​សម្រាប់​វិស័យ​​ហិរញ្ញ​វត្ថុ ក្នុង​រយៈពេល​ ១២ខែ។

អ្នកប្រតិបត្តិ​កម្មវិធី​នេះ គឺ​ធនាគារជាតិ​នៃ​កម្ពុជា (NBC) ក្រសួង​សេដ្ឋកិច្ច និង​ហិរញ្ញ​វត្ថុ ក្រសួង​ពាណិជ្ជកម្ម និង​គណៈ​កម្មការ​មូល​បត្រ​កម្ពុជា។

លោក គាត ឈន់ បាន​បន្ត​ថា៖ «ការ​ឈាន​ដល់​ការ​ចុះ​ហត្ថ​លេខា​នេះ ​គឺជា​ការ​បង្ហាញ​ឲ្យ​ឃើញ​នូវ​កិច្ច​សហប្រតិបត្តិ​ការ​ប្រកប​ដោយ ប្រសិទ្ធ​ភាព​ខ្ពស់​រវាង​រដ្ឋាភិបាល​កម្ពុជា​និង ​ADB»។

លោក Eric Sidgwick បាន​និយាយ​ឲ្យ​ដឹង​ថា កម្មវិធី Rice-SDP ដែល​ត្រូវ​ប្រើ​ពេល ៦ ឆ្នាំ​រហូត​ដល់​ឆ្នាំ ២០១៩ នឹង​ធ្វើ​ឲ្យ​ប្រសើរ​ឡើង​នូវ​សកម្មភាព​ផលិត​កម្ម​អង្ករ​រួម​មាន​ផលិត​ភាព ​ដំណាំ​ស្រូវ​ការ​ទទួល​បាន​ឥណទាន​ពី​អ្នក​ផលិត​ស្រូវ និង​ម្ចាស់​រោង​ម៉ាស៊ីន​កិន​ស្រូវ ឬ​អ្នក​នាំ​ចេញ ការ​ចូល​ទៅ​កាន់​ទីផ្សារ​អង្ករ​ថ្នាក់​តំបន់ ​និង​អន្តរជាតិ ​ព្រម​ទាំង​លើក​កម្ពស់​សន្តិសុខ​ស្បៀង​តាម​គ្រួសារ និង​ថ្នាក់​ជាតិ។

លោក Sidgwick បាន​បន្ត​ថា៖​«កម្មវិធី​អភិវឌ្ឍន៍​វិស័យ​អង្ករ គាំទ្រ​ដល់​គោល​នយោបាយ​ជំរុញ​ផលិតកម្ម​ស្រូវ ​និង​ការ​នាំ​ចេញ​អង្ករ​របស់​រដ្ឋាភិបាល​ដែល​អំពាវនាវ​ឲ្យ​មាន​ការ​កែ​លម្អ​ពូជ ​បង្កើន​ប្រសិទ្ធ​ភាព​ប្រព័ន្ធ​ធារា​សាស្រ្ត ធ្វើ​ឲ្យ​កាន់​តែ​ប្រសើ​រឡើង​នូវ​ទម្លាប់​បង្កបង្កើន​ផល បង្កើន​សមត្ថភាព​សម្ងួត រក្សា​ទុក និង កិន​ស្រូវ និង លើក​កម្ពស់​ស្វែង​រក​ទីផ្សារ​ដែល​នឹង​ផ្លាស់​ប្តូរ​អនុ​វិស័យ​របស់ ប្រទេស​កម្ពុជា​ពី​ការ​បង្កើន​ផល​សម្រាប់​ចិញ្ចឹម​ជីវិត ឆ្ពោះ​ទៅ​រក​ការ​ធ្វើ​ពាណិជ្ជ​កម្ម»។

យោង​តាម​សេចក្តី​ប្រកាស​ព័ត៌មាន គមោង Rice-SDP នឹង​គ្រប​ដណ្តប់​លើ​ខេត្ត​ចំនួន​បីគឺ​ខេត្ត​ព្រៃវែង កំពង់ធំ និង បាត់​ដំបង។

លោក គាត ឈន់ ​បាន​​លើក​ឡើងថា តាម​ការ​ព្យាករ​​សម្រាប់​ឆ្នាំ​២០១៣ បំណុល​កម្ពុជា​ជំពាក់​បរទេស​ស្មើ​នឹង ២៣ ភាគរយ​នៃ​ផលិត​ផល​ក្នុង​ស្រុក សរុប (GDP ) ហើយ​បើ​រាប់​បញ្ចូល​ទាំង​បំណុល​មរតក​ផង​នោះ បំណុល​បរទេស​ឡើង​ដល់ ២៧ ភាគរយ​នៃ​ផលិត​ផល​ក្នុង​ស្រុក​សរុប៕

ព័ត៌មានថ្មីៗ