ក្រុងវ៉ាស៊ីនតោនៈ លោកស្រី Kristalina Georgieva មន្ត្រីប្រតិបត្តិជាន់ខ្ពស់របស់ធនាគារពិភពលោក (WB) ឥឡូវមិនប្រឈមនឹងការប្រឆាំងណាមួយចំពោះបេក្ខភាពរបស់លោកស្រីក្នុងតំណែងជាអគ្គនាយិកាមូលនិធិរូបិយវត្ថុអន្តរជាតិ (IMF) ឡើយ។ នេះបើយោងតាមការប្រកាសរបស់ IMF កាលពីថ្ងៃចន្ទ។
លោកស្រី Georgieva បច្ចុប្បន្នគឺជាប្រធាននាយកប្រតិបត្តិ (CEO) ធនាគារពិភពលោក ជិតធានាបានតំណែងនេះដែលនឹងក្លាយជាស្ត្រីទី ២ ក្នុងការដឹកនាំមូលនិធិ IMF។
លោកស្រីនឹងជំនួសតំណែងរបស់លោកស្រី Christine Lagarde អតីតប្រធាន IMF ដែលត្រូវបានស្នើឈ្មោះទៅដឹកនាំធនាគារកណ្តាលអឺរ៉ុប។
ក្រុមប្រឹក្សារបស់ IMF បានឲ្យដឹងថា៖ «គោលដៅរបស់ក្រុមប្រឹក្សាភិបាលគឺដើម្បីបញ្ចប់ដំណើរការជ្រើសរើសឲ្យបានឆាប់តាមដែលអាចធ្វើទៅបាន ហើយនៅចុងក្រោយបំផុតគឺនៅថ្ងៃទី ៤ ខែតុលា ឆ្នាំ ២០១៩»។
ស្ថិតក្រោមវិធានដែលគ្មានការចែង ជនជាតិអឺរ៉ុបតែងតែដឹកនាំមូលនិធិ IMF គិតចាប់តាំងពីមូលនិធិនេះបង្កើតឡើងមកបន្ទាប់ពីសង្គ្រាមលោកលើកទី ២ ខណៈដែលទីក្រុងវ៉ាស៊ីនតោនតែងតែចាត់តាំងមេដឹកនាំសម្រាប់ធនាគារពិភពលោក។
រយៈពេលដាក់ស្នើឈ្មោះបានបិទបញ្ចប់កាលពីថ្ងៃសុក្រពោលគឺ ១ ថ្ងៃបន្ទាប់ពីមូលនិធិនេះបានលុបចោលជាផ្លូវការនូវលក្ខខណ្ឌតម្រូវកម្រិតអាយុ ៦៥ ឆ្នាំសម្រាប់ការក្លាយជាមេដឹកនាំរបស់មូលនិធិនេះដែលជួយត្រួសត្រាយផ្លូវសម្រាប់ស្ត្រីអាយុ ៦៦ ឆ្នាំរូបនេះចូលកាន់តំណែង។
មិនមានបេក្ខជនបេក្ខនារីផ្សេងទៀតបង្ហាញខ្លួនប្រជែងនឹងលោកស្រី Georgieva ឡើយ៕ KC