ក្រុងវ៉ាស៊ីនតោនៈ អ្នកនាំពាក្យរបស់មូលនិធិរូបិយវត្ថុអន្តរជាតិ (IMF) បានឲ្យដឹងកាលពីថ្ងៃពុធថា មូលនិធិ IMF នឹងមិនមានការទាក់ទងណាមួយជាមួយប្រទេស វ៉េណេស៊ុយអេឡា ហើយក៏មិនអនុញ្ញាតឲ្យប្រទេសនេះទទួលបានទុនបម្រុងរបស់ខ្លួនដែលត្រូវបានរក្សាទុក IMF ផងដែរ រហូតទាល់តែសហគមន៍អន្តរជាតិទទួលស្គាល់រដ្ឋាភិបាលមួយនៅទីក្រុងការ៉ាកាស។
ភាពជាអ្នកដឹកនាំរបស់ប្រទេសនេះមានបញ្ហាចាប់តាំងពីចុងខែមករាមក នៅពេលលោក Juan Guaido មេដឹកនាំសភាជាតិ ប្រកួតប្រជែងធ្វើជាមេដឹកនាំប្រទេសជាមួយលោកប្រធានាធិបតី Nicolas Maduro ដែលមានបញ្ហាច្រើន ខណៈដែលវិបត្តិសេដ្ឋកិច្ចដ៏ធ្ងន់ធ្ងររបស់ប្រទេសនេះកាន់តែអាក្រក់ខ្លាំងឡើងៗ។
អ្នកនាំពាក្យរបស់មូលនិធិ IMF បានប្រាប់ទីភ្នាក់ងារព័ត៌មាន AFP ថា៖ «ការចូលរួមពាក់ព័ន្ធណាមួយរបស់មូលនិធិ IMF ជាមួយប្រទេស វ៉េណេស៊ុយអេឡា ដែលរួមទាំងការឆ្លើយតបនឹងការស្នើសុំប្រតិបត្តិការផ្នែកហិរញ្ញវត្ថុដែលអាចកើតឡើង មានមូលដ្ឋានលើបញ្ហានៃការទទួលស្គាល់រដ្ឋាភិបាល ដែលត្រូវមានការបញ្ជាក់»។
អ្នកនាំពាក្យរូបនេះឲ្យដឹងថា៖ «យើងធ្វើការងារជាមួយសមាជិករបស់យើងលើបញ្ហានេះ ហើយនៅក្នុងចំណុចនេះ ការបេ្ដជ្ញាចិត្តនេះ [ពីសមាជិក] មិនត្រូវបានធ្វើឡើងទេ»។
អាមេរិកស្ថិតក្នុងចំណោមប្រទេសប្រហែល ៥០ ដែលទទួលស្គាល់លោក Guaido ដែលជាមេដឹកនាំប្រឆាំង ដែលបានប្រកាសខ្លួនឯងជាប្រធានាធិបតីស្ដីទី កាលពីចុងខែមករា ក្នុងគោលបំណង ដើម្បីជំនួសលោក Maduro។
លោក Guaido បានហៅការគ្រប់គ្រងរបស់លោក Maduro ថាខុសច្បាប់ ដោយសារតែអ្វីដែលលោក Guaido ហៅការបោះឆ្នោតកាលពីឆ្នាំមុនជាការក្លែងបន្លំ ដែលលោក Maduro បានឈ្នះមួយអាណត្តិទៀតដើម្បីដឹកនាំប្រទេស។
លោក Maduro ដែលត្រូវបានគាំទ្រដោយប្រទេស រុស្ស៊ី និងចិន កំពុងស្ថិតក្រោមសម្ពាធកាន់តែខ្លាំងឡើងៗ ដោយសារតែការធ្លាក់ចុះសេដ្ឋកិច្ច និងការចំណាកស្រុកជាបន្តរបស់ប្រជាជនវ៉េណេស៊ុយអេឡា ចំពេលដែលមានវិបត្តិសិទ្ធិមនុស្ស កាន់តែអាក្រក់ខ្លាំងឡើងៗ។
មូលនិធិ IMF បានឲ្យដឹងកាលពីមុនថា ខ្លួនកំពុងរង់ចាំការសម្រេចចិត្តមួយពីសមាជិករបស់ខ្លួនស្ដីពីការទទួលស្គាល់រដ្ឋាភិបាលមួយនៅទីក្រុងការ៉ាកាស ដែលនឹងត្រូវការសំឡេងឆ្នោតភាគច្រើននៅក្រុមប្រឹក្សាប្រតិបត្តិរបស់មូលនិធិនេះ។
សមាជិកទាំងអស់ ១៨៩ ប្រទេសនៃមូលនិធិនេះ ត្រូវបានតម្រូវឲ្យរក្សាទុកកម្រិតអប្បបរមានៃទុនបម្រុងរូបិយប័ណ្ណបរទេសរបស់ខ្លួននៅមូលនិធិ IMF ប៉ុន្តែដោយសារតែភាពមិនច្បាស់លាស់អំពីមេដឹកនាំនៅទីក្រុងការ៉ាកាសនោះ ទាំងលោក Maduro និងលោក Guaido អាចមានលទ្ធភាពក្នុងការទទួលបានមូលនិធិទាំងនេះ។
មិនមានមេដឹកនាំណាមួយអាចចូលចរចាជាមួយមូលនិធិ IMF សម្រាប់កម្មវិធីជំនួយបាននោះទេ។
អាមេរិកបានដាក់ទណ្ឌកម្មលើមន្ដ្រីរដ្ឋបាលរបស់លោក Maduro ជាច្រើននាក់ មន្ដ្រីយោធា និងស្ថាប័នជាច្រើន ដោយរារាំងពួកគេមិនឲ្យទទួលបានប្រព័ន្ធហិរញ្ញវត្ថុ និងការបង្កកទ្រព្យសម្បត្តិដែលបានដាក់ក្នុងធនាគាររបស់អាមេរិក ដែលរួមទាំងអ្នកដែលក្នុងក្រុមហ៊ុន Citgo ដែលគ្រប់គ្រងដោយប្រទេស វ៉េណេស៊ុយអេឡា ផងដែរ៕ AFP/LA