ការហាលត្រីងៀតរបស់អាជីវករក្នុងខណ្ឌឫស្សីកែវ។ ហេង ជីវ័ន
ភ្នំពេញៈ គ្រឹះស្ថានមីក្រូហិរញ្ញវត្ថុហត្ថាកសិករ (HKL) ដែលជាក្រុមហ៊ុនបុត្រសម្ព័ន្ធរបស់ធនាគារ Bank of Ayudhya Public Limited Company(Krungsri) បានទទួលកម្ចីចំនួន ៥០ លានដុល្លារ ពីទីភ្នាក់ងារសហប្រតិបត្តិការអន្តរជាតិជប៉ុន (JICA) ដើម្បីពង្រីកអាជីវកម្មរបស់ខ្លួនក្នុងការគាំទ្រដល់សហគ្រាសមីក្រូធុនតូច និងមធ្យម (MSME) នៅក្នុងតំបន់ជនបទ។
.jpg)
ស្ថាប័នទាំង ២ បានឈានដល់កិច្ចព្រមព្រៀងកម្ចីកាលពីថ្ងៃទី ២៧ ខែមីនា ដើម្បីផ្ដល់មូលនិធិដល់សហគ្រាសមីក្រូធុនតូច និងមធ្យម (MSME) នៅតាមទីជនបទតាមរយៈគម្រោងវិនិយោគ និងហិរញ្ញវត្ថុវិស័យឯកជនដែលពឹងផ្អែកលើការជួយសម្រួលសម្រាប់ការបង្កើនល្បឿនការទទួលបានសេវាហិរញ្ញវត្ថុគ្រប់ៗគ្នានៅអាស៊ី (FAIA)។ នេះបើយោងតាមសេចក្ដីប្រកាសព័ត៌មានរបស់ JICA។
សេចក្ដីប្រកាសព័ត៌មាននេះឲ្យដឹងថា ៩០ ភាគរយ នៃចំនួនប្រជាជនស្ថិតក្រោមបន្ទាត់ក្រីក្រនៅតាមទីជនបទប្រទេសកម្ពុជា ដូច្នេះកម្ចីនេះដើរតួនាទីសំខាន់ក្នុងការគាំទ្រដល់ពួកគេក្នុងការដាំដុះ និងបង្កើតការងារកាន់តែច្រើនដើម្បីកាត់បន្ថយភាពក្រីក្រទោះបីគម្លាតហិរញ្ញវត្ថុដ៏ធំនៅតែមានក៏ដោយ។
សេចក្ដីប្រកាសព័ត៌មាននេះបន្តថា៖ «ការពិតទៅវិស័យ MSME គឺលទ្ធភាពទទួលបានសេវាហិរញ្ញវត្ថុនៅមានកម្រិតបានរារាំងកំណើនរបស់វិស័យនេះ។ MSME ជាច្រើនកំពុងដំណើរការដោយស្ដ្រី (ស្ដ្រីកំពុងគ្រប់គ្រង ៦២ ភាគរយនៃសហគ្រាសមីក្រូ និង ២៦ ភាគរយ សហគ្រាសធុនតូច និងមធ្យម)។ ដើម្បីធានាកំណើនរបស់ MSME គឺជាផ្នែកដ៏សំខាន់មួយនៃការផ្ដល់អំណាចដល់ស្ដ្រី»។
លោក ហួត អៀងតុង ប្រធាននាយកប្រតិបត្តិ HKL មិនអាចទាក់ទងសុំការអត្ថាធិប្បាយបានទេកាលពីថ្ងៃចន្ទ។
បើយោងតាមសេចក្តីប្រកាសព័ត៌មានរបស់ HKL កម្ចីនេះនឹងដើរតួនាទីយ៉ាងសំខាន់ក្នុងការចូលរួមចំណែកមួយកម្រិតបន្ថែមទៀតដល់ខ្លួនក្នុងការបញ្ចេញទុនដល់សហគ្រាសខ្នាតតូចបំផុត ខ្នាតតូច និងមធ្យមនៅតាមទីជនបទ។
JICA បានចុះផ្សាយថា កម្ចីនេះត្រូវបានបង្កើតឡើងដើម្បីគាំទ្រដល់សហគ្រាសខ្នាតតូចបំផុត ខ្នាតតូច និងមធ្យមឲ្យកាន់តែរីកចម្រើន ដោយបង្កើតឱកាសការងារធ្វើឲ្យប្រសើរឡើងនូវបរិយាប័ន្នហិរញ្ញវត្ថុពួកគេនៅតាមទីតំបន់ជនបទ ព្រមទាំងកាត់បន្ថយភាពក្រីក្រ និងភាពខុសគ្នានៃកម្រិតជីវភាពពីតំបន់មួយទៅតំបន់មួយទៀត។
JICA បន្តថាអ្វីដែលសំខាន់នោះគឺការរីកចម្រើនរបស់ MSME ដែលជាផ្នែកមួយដ៏សំខាន់ក្នុងការលើកកម្ពស់ស្ត្រី។ ដូច្នេះប្រាក់កម្ចីនេះនឹងជួយលើកកម្ពស់កំណើនសេដ្ឋកិច្ចប្រកបដោយចីរភាពស្របតាមគោលដៅអភិវឌ្ឍន៍។
បច្ចុប្បន្ននេះ ៨២ ភាគរយ នៃអតិថិជនរបស់ហត្ថាកសិករ លីមីតធីត គឺមកពីតំបន់ជនបទ និង ៦១ ភាគរយ នៃឥណទានត្រូវបានផ្តល់ជូនទៅឲ្យអតិថិជនជាស្ត្រី។ ដូចនេះហើយដើម្បីឆ្លើយតបទៅនឹងតម្រូវការរបស់អតិថិជនលើសេវាហិរញ្ញវត្ថុ ហត្ថាកសិករ មានការិយាល័យសាខាចំនួន ១៧៧ នៅទូទាំងប្រទេស ដើម្បីផ្តល់ជូននូវភាពល្អប្រសើរនៃបរិយាប័ន្នហិរញ្ញវត្ថុ និងសេវាហិរញ្ញវត្ថុដ៏សម្បូរបែបរួមមានសេវាឥណទាន សេវាប្រាក់បញ្ញើសន្សំ សេវាផ្ទេរប្រាក់ក្នុងស្រុក សេវាបើកប្រាក់បៀវត្សរ៍ សេវា ATM និង សេវាធនាគារចល័តដល់សហគ្រាសខ្នាតតូចបំផុត ខ្នាតតូច និងមធ្យម និងអតិថិជនផ្សេងៗទៀតនៅទូទាំង ២៥ ខេត្ត/ក្រុង ក្នុងប្រទេសកម្ពុជា។
កាលពីថ្ងៃទី ៣ ខែមេសា រដ្ឋាភិបាលបានចាប់ផ្ដើមដំណើរការជាផ្លូវការធនាគារសហគ្រាសធុនតូច និងមធ្យមជាមួយនឹងទុនវិនិយោគដំបូង ១០០ លានដុល្លារ ដើម្បីផ្ដល់ហិរញ្ញប្បទានសម្រាប់សហគ្រាសធុនតូច និងមធ្យម ( SME)។
របាយការណ៍របស់សហប្រតិបត្តិការហិរញ្ញវត្ថុអន្តរជាតិដែលបានចេញផ្សាយកាលពីខែសីហាបានប៉ាន់ប្រមាណថា តម្រូវការដែលមិនបានឆ្លើយតបសម្រាប់ឥណទានពីសហគ្រិនស្ដ្រីមានចំនួន ៤,២ ពាន់លានដុល្លារ ស្មើនឹងជិត ៦៣ ភាគរយ នៃថវិកាជាតិ ៦,៧ ពាន់លានដុល្លារ របស់ប្រទេស កម្ពុជា សម្រាប់ឆ្នាំ ២០១៩។
ធនាគារអភិវឌ្ឍន៍ជនបទ និងកសិកម្ម (ARDB) ដែលគ្រប់គ្រងដោយរដ្ឋ កាលពីខែមុនក៏បានចាប់ផ្ដើមដំណើរការមូលនិធិ ៥០ លានដុល្លារ ដើម្បីបង្កើនលទ្ធភាពទទួលបានឥណទានសម្រាប់សហគ្រាសធុនតូច និងមធ្យម (SME) ក្នុងវិស័យកសិកម្មក្នុងស្រុក៕LA
