ភ្នំពេញៈ លោកស្រី ជា សិរី អគ្គនាយិកាធនាគារជាតិនៃកម្ពុជា (NBC) បានឱ្យដឹងថា ហានិភ័យឥណទាននៅក្នុងវិស័យមីក្រូហិរញ្ញវត្ថុនៅតែទាប ដោយផ្អែកលើកម្ចីមិនដំណើរការ (Non-Performing Loan) មានចំនួនប្រហែល ២,៣ ភាគរយ គិតត្រឹមថ្ងៃទី ៣១ ខែសីហា ឆ្នាំ ២០២០។
លោកស្រីបានបង្ហាញថា៖ «អត្រានេះនៅមានកម្រិតទាបបើប្រៀបធៀបនឹងបណ្ដាប្រទេសនៅអាស៊ីអាគ្នេយ៍ និងទូទាំងពិភពលោក»។
លោកស្រីបានប្រាប់ភ្នំពេញ-ប៉ុស្ដិ៍ថា លើសពីនេះទៅទៀត ឥណទានដែលបានបញ្ចេញឱ្យគ្រួសារមានប្រាក់ចំណូលទាប មិនមានចំនួន ១០០ ភាគរយនៃផលបត្រកម្ចីរបស់វិស័យនេះទេ។
អគ្គនាយិកា NBC រូបនេះបានថ្លែងថា៖ «ការផ្ដោតការយកចិត្តទុកដាក់របស់គ្រឹះស្ថានមីក្រូហិរញ្ញវត្ថុ (MFIs) គឺផ្អែកលើទីផ្សារផ្សេងៗចាប់ពីមីក្រូដល់សហគ្រាសធុនតូច និងមធ្យម»។
ការលើកឡើងទាំងនេះរបស់លោកស្រី ជា សិរី បានធ្វើឡើងបន្ទាប់ពីមានការសុំឱ្យធ្វើអត្ថាធិប្បាយស្ដីពីស្ថិរភាពរបស់វិស័យហិរញ្ញវត្ថុ ខណៈដែលតម្លៃសរុបនៃកម្ចី MFI បានកើនឡើងដល់ជាង ១០ ពាន់លានដុល្លារគិតត្រឹមដំណាច់ឆ្នាំ ២០១៩។
ឯកសារសង្ខេបដោយមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) សម្ព័ន្ធខ្មែរជំរឿន និងការពារសិទ្ធិមនុស្សលីកាដូ (Licadho) និងសម្ព័ន្ធសហជីពកម្ពុជា (CATU) បានបញ្ជាក់ថា កម្ចីដែលបានយកដោយប្រជាជនប្រហែល ២,៦ លាននាក់ជាមធ្យមក្នុង ១ កម្ចីប្រហែល ៣ ៨០៤ ដុល្លារកាលពីឆ្នាំមុន។
ថ្មីៗនេះការិយាល័យឥណទានកម្ពុជា (CBC) បានរាយការណ៍សមតុល្យរបស់ MFI មានចំនួន ៦,៣ ពាន់លានដុល្លារ ដែលការិយាល័យបានឱ្យដឹងថា វាស្របនឹងកំណើនសេដ្ឋកិច្ចរបស់ប្រទេសកម្ពុជា។
ទោះបីយ៉ាងណាកម្ចីដែលកើនឡើងមានភាពមិនល្អក្នុងរយៈពេលជាច្រើនឆ្នាំ ខណៈដែលក្រុមជាច្រើនចោទប្រកាន់រដ្ឋាភិបាល និង NBC ពីបទ «បញ្ឈប់ស្ថានភាព» នេះ និងក្នុងកម្រិតជាក់លាក់មួយ «ដែលការពារ» អ្នកខ្ចីប្រាក់មានប្រាក់ចំណូលកាន់តែទាប។
របាយការណ៍ព័ត៌មានបង្ហាញថា ករណីអ្នកខ្ចីប្រាក់ដែលបាត់បង់បណ្ណកម្មសិទ្ធិកាន់កាប់ដីធ្លីរបស់ពួកគេ ដោយសារបង្កើនប្រាក់កម្ចីហើយកម្ចីកើនឡើងកាន់តែច្រើន ដើម្បីបំពេញតម្រូវការដោយសារតែសេដ្ឋកិច្ចគ្រួសារធ្លាក់ចុះ។
ដោយសារតែជំងឺកូវីដ ១៩ ប៉ះពាល់លើវិស័យសេដ្ឋកិច្ចបន្តកើតឡើងនៅក្នុងប្រទេសកម្ពុជា អ្នកសង្កេតបានឱ្យដឹងថា ស្ថានការណ៍សង្គមសេដ្ឋកិច្ចមិនទំនងជានឹងភាពល្អប្រសើរក្នុងពេលឆាប់ៗនេះទេដែលអាចជំរុញឱ្យធ្លាក់ខ្លួនក្នុងបំណុល។
កាលពីដើមខែតុលា អង្គការសង្គមស៊ីវិលនានារួមមាន អង្គការ CENTRAL អង្គការ CATU អង្គការ Licadho និងអង្គការសមាគមធាងត្នោតបានអំពាវនាវឱ្យមានការអនុគ្រោះពេញលេញនៃបំណុល MFI ដែលបានយកដោយគ្រួសារក្រីក្រ។
ប៉ុន្តែវាហាក់ដូចជាមិនទំនងជា NBC នឹងលើកឡើងពីតម្រូវការនោះទេ។
ផ្ទុយទៅវិញ NBC នឹងបន្តរក្សាការណែនាំរបស់ខ្លួនដល់ធនាគារ និងគ្រឹះស្ថានហិរញ្ញវត្ថុក្នុងការរៀបចំឥណទានឡើងវិញរបស់អតិថិជនដែលរងប៉ះពាល់ដោយសារតែជំងឺកូវីដ ១៩។
លោកស្រី ជា សិរី បានឱ្យដឹងថា ឥណទានអតិថិជនប្រហែល ២៧០ ០០០ នាក់ ត្រូវបានរៀបចំឥណទានឡើងវិញគិតត្រឹមថ្ងៃទី ៣១ ខែ សីហា ឆ្នាំ ២០២០ ដែលមានចំនួនសរុបប្រហែល ៣,៦ ពាន់លានដុល្លារ។
យន្តការនានាក្នុងការរក្សាស្ថិរភាពវិស័យ MFI ខណៈដែលការពារអតិថិជន លោកស្រីឱ្យដឹងថា NBC មានប្រកាសមួយចំនួនដែលមិនគ្រាន់តែកម្រិតចំណាត់ថ្នាក់ហានិភ័យឥណទានភាពទន់ខ្សោយក្នុងការផ្ដល់នោះទេ។
លោកស្រីលើកឡើងថា៖ «យើងមានតម្លាភាពក្នុងការផ្ដល់ការជួយសម្រួលឥណទានរបស់គ្រឹះស្ថានហិរញ្ញវត្ថុ និងការដោះស្រាយបណ្ដឹងរបស់អតិថិជន។ ហើយក៏មានខ្សែទូរស័ព្ទបន្ទាន់ដោយផ្ទាល់ទៅ NBC សម្រាប់បណ្ដឹងជាសាធារណៈ»។
លោកស្រីបន្ថែមថា វាជាតួនាទីដ៏សំខាន់របស់ NBC ក្នុងការផ្ដល់ភាពជឿទុកចិត្តពេញលេញ និងការវាយតម្លៃហានិភ័យឥណទានសម្រាប់វិស័យនេះ។
លោកស្រី ជា សិរី បានឱ្យដឹងថា MFIs ក៏មានការការពារផ្ទាល់ខ្លួនរបស់ពួកគេផងដែរ ដូចជាគោលការណ៍ផ្ដល់កម្ចីដែលបានបង្កើតឡើងដោយសមាគម មីក្រូហិរញ្ញវត្ថុកម្ពុជា។
ធនាគារកណ្ដាលក៏បានលុបចោលការផ្ដល់កម្ចីក្រៅផ្លូវការដែលបានធ្លាក់ចុះមកនៅត្រឹម ៦ ភាគរយ កាលពីឆ្នាំ ២០១៦ ធៀបនឹង ៣២ ភាគរយ កាលពីឆ្នាំ ២០០៤។ នេះបើយោងតាមរបាយការណ៍របស់ NBC ស្ដីពីស្ថិរភាពហិរញ្ញវត្ថុកាលពីឆ្នាំមុន។
ធនាគារនេះបានឱ្យដឹងថា ការបង្កើនលទ្ធភាពទទួលបានហិរញ្ញវត្ថុដោយ MFIs និងគ្រឹះស្ថានទទួលប្រាក់បញ្ញើមីក្រូហិរញ្ញវត្ថុបានកាត់បន្ថយការពឹងផ្អែករបស់ប្រជាជនលើការខ្ចីប្រាក់ពីប្រភពក្រៅផ្លូវការ។
ទោះបីជាលោកស្រី ជា សិរី បានឱ្យដឹងថា NBC មិនមានទិន្នន័យដែលអាចរកបានស្ដីពីវិស័យនេះនៅពេលថ្មីៗនេះក៏ដោយ ក៏ NBC បន្តផ្ដោតការយកចិត្តទុកដាក់លើការលើកកម្ពស់លទ្ធភាពទទួលបានហិរញ្ញវត្ថុគ្រប់គ្នា និងការយល់ដឹងផងដែរ។
លោកស្រីបានពន្យល់ថា៖ «ការយកចិត្តទុកដាក់នេះមិនគ្រាន់តែដើម្បីនាំយកប្រជាជនកាន់តែច្រើនចូលទៅក្នុងវិស័យផ្លូវការប៉ុណ្ណោះទេ ប៉ុន្តែក៏ថែមទាំងផ្ដល់ដល់ពួកគេនូវចំណេះដឹងជាមូលដ្ឋានស្ដីពីការគ្រប់គ្រងប្រាក់ផងដែរ»។
លោកស្រីបញ្ជាក់ថា តាមមធ្យោយបាយនោះ NBC នឹងបន្តការត្រួតពិនិត្យការអភិវឌ្ឍរបស់វិស័យធនាគារ «យ៉ាងជិតដិតបំផុត»។
លោកស្រីបន្ថែមថា៖ «យើងនឹងបន្ថែម ឬលើកកម្ពស់ក្របខ័ណ្ឌបទប្បញ្ញត្តិរបស់យើង នៅពេលចាំបាច់ស្របជាមួយនឹងការអភិវឌ្ឍរបស់វិស័យនេះ ព្រមទាំងការអភិវឌ្ឍម៉ាក្រូសេដ្ឋកិច្ចទាំងនៅក្នុងប្រទេសកម្ពុជា និងពិភពលោក»៕LA
Sangeetha Amarthaligam