ទីក្រុងឡុងដ៍ៈ អង្គការ OPEC និងសម្ព័ន្ធមិត្តរបស់ខ្លួននឹងជួបប្រជុំគ្នាដើម្បីពិភាក្សាអំពីការកាត់បន្ថយផលិតកម្មប្រេងនៅសប្តាហ៍នេះ បន្ទាប់ពីមានការអះអាងពីសំណាក់លោកប្រធានាធិបតីអាមេរិក ដូណាល់ ត្រាំ ថា ប្រទេសផលិតប្រេងឈានមុខគេ រួមមានរុស្ស៊ី និងអារ៉ាប៊ី សាអ៊ូឌីតនឹងបន្ថយផលិតកម្មដើម្បីបង្កើនតម្លៃឡើងវិញ។
រដ្ឋាភិបាលនៃប្រទេសសម្បូរប្រេង Azerbaijan បាននិយាយកាលពីថ្ងៃសៅរ៍ថា កិច្ចប្រជុំនេះត្រូវបានគេរំពឹងតាំងពីដំបូង ដោយរៀបចំតាមរយៈកិច្ចប្រជុំតាមរយៈវីដេអូនៅថ្ងៃចន្ទនេះ ប៉ុន្តែត្រូវលើកពេលដល់ថ្ងៃព្រហស្បតិ៍។
លោក Zamina Aliyeva មន្ត្រីនាំពាក្យក្រសួងថាមពលនៃប្រទេសនេះបានប្រាប់ថា៖ «អង្គការ OPEC បានប្រាប់យើងអំពីការពន្យារពេលនោះ។ យើងមិនដឹងពីមូលហេតុនោះទេ»។
មិនមានការអត្ថាធិប្បាយភ្លាមៗពីអង្គការ OPEC ប៉ុន្តែប្រភពស្និទ្ធនឹងក្រុមនេះ បាននិយាយកាលពីមុននេះថា កិច្ចប្រជុំប្រហែលកើតមាននៅជិតចុងសប្តាហ៍នេះវិញ។
កាលពីថ្ងៃព្រហស្បតិ៍មុនប្រទេសអារ៉ាប់ប៊ី សាអ៊ូឌីត ដែលជាតួអង្គសំខាន់មួយនៃអង្គការ OPEC បានអំពាវនាវឲ្យមានកិច្ចប្រជុំបន្ទាន់មួយនៃសម្ព័ន្ធអង្គការនេះ និងប្រទេសផលិតប្រេងដទៃទៀត ដើម្បីធ្វើឲ្យតម្លៃប្រេងនៅទីផ្សារមានស្ថិរភាព ក្រោយពីការសន្ទនាតាមទូរស័ព្ទរវាងព្រះអង្គម្ចាស់ Mohammed bin Salman និង លោកប្រធានាធិបតី ត្រាំ។
ភា្នក់ងារសារព័ត៌មានផ្លូវការរបស់សាអូឌីតបានរាយការណ៍ពីការជជែកត្រូវបានរៀបចំឡើងតាមសំណើររបស់លោក ត្រាំ។
តម្លៃប្រេងបានធ្លាក់ចុះខ្លាំងដល់កម្រិតទាបក្នុងរយៈពេលច្រើនទសវត្សរ៍ចាប់តាំងពីដើមឆ្នាំដែលការធ្លាក់ចុះនេះបណ្តាលមកពីការរាលដាលវីរុសកូរ៉ូណា ដែលបង្កើនសម្ពាធយ៉ាងខ្លាំងដល់វិស័យសេដ្ឋកិច្ច និងប៉ះពាល់ដល់តម្រូវការ ហើយ និងសង្គ្រាមតម្លៃរវាងប្រទេស អារ៉ាប់ប៊ី សាអ៊ូឌីត និងប្រទេសរុស្ស៊ី ដែលជាតួអង្គសំខាន់ក្នុង OPEC+។
ប្រទេសទាំង ២ បរាជ័យក្នុងការយល់ព្រមគ្នាលើការកាត់បន្ថយទិន្នផលផលិតបន្ថែមនៅឯកិច្ចប្រជុំនៃអង្គការ OPEC ដែលមានមូលដ្ឋានក្នុងទីក្រុង Vienna កាលពីខែមុននេះ ដែលធ្វើឲ្យទីក្រុងរីយ៉ាដបើកការផលិតដើម្បីពន្លិចទីផ្សារប្រេងតែម្តង។
ក្រសួងថាមពលនៃប្រទេស Azerbaijan ដែលជាសមាជិក OPEC+ បាននិយាយក្នុងសេចក្តីថ្លែងការណ៍ថា កិច្ចប្រជុំនៅសប្តាហ៍នេះនឹងផ្តោតការជជែកគ្នាលើ «ការអនុម័តលើការប្រកាសថ្មីនៃកិច្ចសហប្រតិបត្តិការ» ប្រធានាធិបតីរុស្ស៊ី លោក Vladimir Putin បាននិយាយកាលពីថ្ងៃសុក្រថា ទីក្រុងម៉ូស្គូត្រូវបានរៀបចំដើម្បីពិភាក្សាការកាត់បន្ថយប្រហែល ១ លានបារ៉ែលក្នុង ១ ថ្ងៃ «មិនតិចពេក ហើយប្រហែលជាមិនច្រើនពេកដែរ»។
លោក Putin និយាយថា «ខ្ញុំជឿថា វាសំខាន់ណាស់ក្នុងការប្រមូលផ្តុំកិច្ចខិតខំប្រឹងប្រែងធ្វើឲ្យមានតុល្យភាពទីផ្សារ និងកាត់បន្ថយផលិតកម្ម»។
យោងរបាយការណ៍ប្រចាំខែកាលពីខែមុនរបស់អង្គការ OPEC បរិមាណ ១០ លានបារ៉ែលគឺស្ទើរតែសមាមាត្រគ្នាទៅនឹងអ្វីដែល អារ៉ាប់ប៊ី សាអ៊ូឌីតដែលផលិតប្រមាណ ៩,៨ លានបារ៉ែលក្នុង ១ ថ្ងៃ និង រុស្ស៊ីដែលផលិត ១០,៧ លានបារ៉ែលក្នុង ១ ថ្ងៃដែលបានផលិតកាលពីខែកុម្ភៈ។
យោងទៅនឹងប្រភពស្និទ្ធនឹងរុស្ស៊ីដែលត្រូវបានស្រង់សម្តីដោយទីភ្នាក់ងារព័ត៌មាន TASS កាលពីថ្ងៃសុក្រឲ្យដឹងថា មន្ត្រីអាមេរិកត្រូវបានអញ្ជើញចូលរួមក្នុងកិច្ចប្រជុំនោះដែរ។
លោក ត្រាំ បានធ្វើឲ្យភ្ញាក់ផ្អើលដល់អ្នកវិនិយោគកាលពីថ្ងៃព្រហស្បតិ៍កន្លងទៅដោយសរសេរនៅលើបណ្តាញសង្គម Tweeter ថា៖ «ខ្ញុំរំពឹង និងសង្ឃឹមថាទីក្រុងរីយ៉ាដ និងម៉ូស្គូនឹងកាត់បន្ថយប្រហែល ១០ លានបារ៉ែល និងប្រហែលកាន់តែមានស្ថិរភាព»។
លោកបន្ថែមថា៖ «[ការកាត់បន្ថយ] អាចខ្ពស់ដល់ ១៥ លានបារ៉ែល»។
តម្លៃប្រេងដែលធ្លាក់ដល់កម្រិតទាបបំផុតក្នុងរយៈពេល ១៨ ឆ្នាំកាលពីដើមសប្តាហ៍មុនបានឡើងខ្ពស់មកវិញបន្ទាប់ពីសេចក្តីថ្លែងការណ៍របស់លោក ត្រាំ ដែលធ្វើឲ្យកើនឡើងខ្ពស់ក្នុងកំណត់ត្រាក្នុងថ្ងៃជួញដូរកាលពីថ្ងៃព្រហស្បតិ៍សប្តាហ៍មុន។
កាលពីថ្ងៃសុក្រកន្លងទៅតម្លៃប្រេងអន្តរជាតិ Brent មានតម្លៃ ៣៤,១១ ដុល្លារក្នុង ១ បារ៉ែលដោយមានកំណើន ១៤ ភាគរយ ខណៈតម្លៃប្រេងម៉ាក WTI មានតម្លៃ ២៨,៣៤ លានដុល្លារដោយមានកំណើន ១២ ភាគរយ៕ RR