សានហ្វ្រានស៊ីស្កូៈ ក្រុមហ៊ុនផលិតបន្ទះឈីបទូរស័ព្ទស្មាតហ្វូនឈានមុខគេ Qualcomm របស់សហរដ្ឋអាមេរិក បានឲ្យដឹងកាលពីថ្ងៃសុក្រថា ខ្លួនបានឈ្នះសាលក្រមដែលមានទឹកប្រាក់សំណងចំនួន ៣១ លានដុល្លារក្នុងសង្គ្រាមប៉ាតង់ជាមួយក្រុមហ៊ុន Apple ជុំវិញបច្ចេកវិទ្យាប៉ាតង់ដែលប្រើប្រាស់ក្នុងទូរស័ព្ទ iPhones។
ចៅក្រម ១ រូបនៅតុលាការសហព័ន្ធក្នុងរដ្ឋ Southern California បានចេញបញ្ជាថា ក្រុមហ៊ុន Apple ត្រូវបង់ប្រាក់ឲ្យក្រុមហ៊ុន Qualcomm ពីបទការរំលោភលើប៉ាតង់សម្រាប់បន្ទះឈីបដែលប្រើប្រាស់ក្នុងទូរស័ព្ទ iPhone 7 ទូរស័ព្ទ iPhone 8 និងទូរស័ព្ទ iPhone X។
ការខូចខាតនេះបានកើតឡើងចាប់ពីថ្ងៃទី ៦ ខែកក្កដា ឆ្នាំ ២០១៧ រហូតដល់ការបញ្ចប់ការជំនុំជម្រះនេះ។ នេះបើយោងតាមសេចក្ដីប្រកាសព័ត៌មានរបស់ក្រុមហ៊ុន Qualcomm។
លោក Don Rosenberg អ្នកប្រឹក្សាយោបល់ទូទៅប្រចាំក្រុមហ៊ុន Qualcomm បានឲ្យដឹងនៅក្នុងសេចក្ដីប្រកាសព័ត៌មានដែលប្រកាសពីសាលក្រមនេះថា៖ «សាលក្រមតុលាការជាឯកច្ឆន្ទនៅថ្ងៃនេះ គឺជាជោគជ័យចុងក្រោយបំផុតក្នុងវិវាទប៉ាតង់ទូទាំងពិភពលោករបស់យើង ដែលបង្ខំឲ្យក្រុមហ៊ុន Apple ទទួលខុសត្រូវលើការប្រើប្រាស់បច្ចេកវិទ្យាដ៏មានតម្លៃរបស់យើងដោយមិនបានចំណាយសម្រាប់បច្ចេកវិទ្យាទាំងនោះ»។
តម្លៃភាគហ៊ុនរបស់ក្រុមហ៊ុន Qualcomm ដែលបានបិទនៅពេលជួញដូរពេលថ្ងៃជាផ្លូវការកាលពីថ្ងៃសុក្រ កើនឡើង ២,២ ភាគរយដល់ ៥៦,៦០ ដុល្លារក្នុង ១ ហ៊ុន។
ប៉ាតង់ដ៏សំខាន់ក្នុងករណីជម្លោះនេះបានជាប់ពាក់ព័ន្ធនឹង «បច្ចេកវិទ្យា flashless booting» ដែលអាចឲ្យទូរស័ព្ទតភ្ជាប់យ៉ាងរហ័សទៅនឹងអ៊ីនធឺណិត បន្ទាប់ពីត្រូវបានបើកដំណើរការ និងពាក់ព័ន្ធនឹងបច្ចេកវិទ្យាដែលអនុញ្ញាតឲ្យកម្មវិធីរបស់ទូរស័ព្ទស្មាតហ្វូន ងាកទៅរកទិន្នន័យអនឡាញប្រកបដោយប្រសិទ្ធភាព។
ប៉ាតង់ទី ៣ ក្នុងជម្លោះនេះ មានការជាប់ទាក់ទងនឹងការលើកកម្ពស់ក្រាហ្វិកហ្គេមដ៏សម្បូរបែប ខណៈដែលការពាររយៈពេលប្រើប្រាស់ថ្ម។ នេះបើយោងតាមក្រុមហ៊ុន Qualcomm ។
សមរភូមិផ្សេងមួយទៀតនៅក្នុងសង្គ្រាមផ្លូវច្បាប់ដ៏ស្មុគស្មាញរវាងក្រុមហ៊ុនទាំង ២ របស់អាមេរិកនេះ ចៅក្រមសហព័ន្ធរដ្ឋ Southern California កាលពីថ្ងៃព្រហស្បតិ៍បានចេញសេចក្ដីសម្រេចបឋមមួយថា ក្រុមហ៊ុន Qualcomm ជំពាក់ក្រុមហ៊ុន Apple ជិត ១ ពាន់លានដុល្លារ នៅក្នុងការទូទាត់ប្រាក់សំណងសួយសារប៉ាតង់ ដែលក្រុមហ៊ុនផលិតបន្ទះឈីបមួយនេះកំពុងកត់ទុក។ នេះបើយោងតាមសេចក្ដីរាយការណ៍របស់ប្រព័ន្ធព័ត៌មានអាមេរិក។
ក្រុមហ៊ុន Apple បានប្ដឹងក្រុមហ៊ុន Qualcomm ២ ឆ្នាំកន្លងមកហើយពីបទការទូទាត់នេះ ដែលជាផ្នែកមួយនៃកិច្ចសន្យាមួយ។ សេចក្ដីសម្រេចរបស់ចៅក្រមនេះ នឹងត្រូវផ្អាករហូតដល់ក្រោយពីមានការកាត់ក្ដីនៅក្នុងករណីនេះ។
ក្រុមហ៊ុន Apple មិនបានឆ្លើយតបភ្លាមៗចំពោះការស្នើសុំការអត្ថាធិប្បាយនោះទេ។
ក្រុមហ៊ុន Qualcomm កាលពីចុងឆ្នាំមុន បានធ្វើឲ្យសង្គ្រាមផ្លូវច្បាប់មួយកាន់តែខ្លាំងឡើងជាមួយក្រុមហ៊ុន Apple ដោយចោទប្រកាន់ក្រុមហ៊ុនផលិតទូរស័ព្ទ iPhone មួយនេះពីបទលួចព័ត៌មានសម្ងាត់ និងការចែកចាយព័ត៌មានទាំងនេះជាមួយនឹងក្រុមហ៊ុន Intel ដែលជាក្រុមហ៊ុនដៃគូប្រជែងផលិតបន្ទះឈីបទូរស័ព្ទចល័ត។ នេះបើយោងតាមឯកសាររបស់តុលាការ៕ AFP/LA