ទីក្រុងសេអ៊ូលៈ តួលេខប្រាក់ចំណេញប្រតិបត្តិការរបស់ក្រុមហ៊ុន Samsung Electronics ដែលជាក្រុមហ៊ុនផលិតទូរស័ព្ទស្មាតហ្វូន និងបន្ទះឈីបមេម៉ូរីធំជាងគេរបស់ពិភពលោកដែលបានប៉ាន់ប្រមាណឃើញកើនឡើង ២,៧ ភាគរយនៅត្រីមាសទី ១។
ក្រុមហ៊ុន Samsung បានឲ្យដឹងនៅក្នុងការប៉ាន់ប្រមាណប្រាក់ចំណេញថា ប្រាក់ចំណេញប្រតិបត្តិការក្នុងត្រីមាសទី ១ ត្រូវបានរំពឹងថានឹងមានប្រហែល ៦,៤ ពាន់ពាន់លានវ៉ុន ($៥,២ ពាន់លាន) កើនឡើង ២,៧ ភាគរយធៀបនឹងឆ្នាំមុន។
ការលក់មានចំនួន ៥៥ ពាន់-ពាន់លានវ៉ុនបានកើនឡើង ៥ ភាគរយធៀបនឹងរយៈពេលដូចគ្នាកាលពីឆ្នាំមុន។
ប៉ុន្តែផ្លូវដ៏ពិបាកត្រូវបានរំពឹងថានឹងមាននាពេលខាងមុខសម្រាប់ក្រុមហ៊ុនប្រទេសកូរ៉េខាងត្បូងមួយនេះជាមួយនឹងការព្យាករសេដ្ឋកិច្ចពិភពលោកថា នឹងធ្លាក់ចុះ ដោយសារការរីករាលដាលវីរុសកូរ៉ូណាជំរុញឲ្យមានការកាត់បន្ថយបុគ្គលិក និងរារាំងដល់តម្រូវការអតិថិជន។
យោងក្រុមហ៊ុនស្រាវជ្រាវទីផ្សារមានមូលដ្ឋាននៅហុងកុង Counterpoint ការលក់ទូរស័ព្ទស្មាតហ្វូនលើពិភពលោកបានធ្លាក់ចុះ ១៤ ភាគរយកាលពីខែកុម្ភៈធៀបនឹងរយៈពេលដូចគ្នាកាលពីឆ្នាំមុនជាមួយប្រទេសចិន ដែលមើលឃើញការធ្លាក់ចុះជិត ៤០ ភាគរយ។
នៅពេលប្រៀបធៀបនឹងអំឡុងពេលពីខែតុលាដល់ខែធ្នូកាលពីឆ្នាំមុន ប្រាក់ចំណេញប្រតិបត្តិការរបស់ក្រុមហ៊ុន Samsung បានធ្លាក់ចុះ ១០,៦ ភាគរយដែលបង្ហាញវីរុសកូរ៉ូណាថ្មីបានរងផលប៉ះពាល់ក្នុងកម្រិតណាមួយដល់ក្រុមហ៊ុនរបស់ខ្លួនជុំវិញពិភពលោក។
តម្លៃភាគហ៊ុនរបស់ក្រុមហ៊ុននេះបានកើនឡើងខ្ពស់បំផុតកាលពីខែមករា ប៉ុន្តែបានធ្លាក់ចុះជិត ២០ ភាគរយចំពេលការបារម្ភដោយសារតែការរីករាលដាលវីរុសកូរ៉ូណា និងផលវិបាកសេដ្ឋកិច្ចរបស់ខ្លួន។
តម្លៃភាគហ៊ុន Samsung កើនឡើងកាន់តែខ្ពស់ ២,៥ ភាគរយកាលពីថ្ងៃអង្គារ។
ក្រុមហ៊ុន Samsung Electronics មានតួនាទីសំខាន់ចំពោះសុខភាពសេដ្ឋកិច្ចរបស់ប្រទេសកូរ៉េខាងត្បូង។
វាជាក្រុមហ៊ុនបុត្រសម្ព័ន្ធដ៏សំខាន់របស់ក្រុមហ៊ុនឈានមុខគេ Samsung Group ដែលជាក្រុមហ៊ុនឈានមុខគេនៃក្រុមហ៊ុនពហុផលិតផលដែលគ្រប់គ្រងបែបលក្ខណៈគ្រួសារដែលគ្របដណ្ដប់អាជីវកម្មលើសេដ្ឋកិច្ចឈានមុខគេទី ១២ របស់ពិភពលោកមួយនេះ៕LA