ភ្នំពេញ: យ៉ាងហោចណាស់ក្រុមហ៊ុន ៩ ថ្មីទៀតត្រូវបានគណៈកម្មការមូលបត្រកម្ពុជា (SECC) បានសម្រេចអនុម័តជាគោលការណ៍លើការស្នើសុំអាជ្ញាប័ណ្ណដល់ក្រុមហ៊ុនសមភាគីកណ្តាលជើងសាឧបករណ៍និស្សន្ទ គ្រប់គ្រងមូលនិធិ ថែរក្សាទ្រព្យសម្បត្តិជំនួស និងក្រុមហ៊ុនទីប្រឹក្សាហិរញ្ញវត្ថុ ដើម្បីពិនិត្យ និងសម្រេចចុះបញ្ជីជាផ្លូវការរបស់ក្រុមហ៊ុនទាំងនេះនៅពេលខាងមុខ។
សេចក្តីប្រកាសព័ត៌មានរបស់ SECC ផ្សព្វផ្សាយកាលពីថ្ងៃពុធឲ្យដឹងថា SECC បានសម្រេចអនុម័តជាគោលការណ៍លើការស្នើសុំអាជ្ញាប័ណ្ណដល់ក្រុមហ៊ុនសមភាគីកណ្តាល ១ បន្ថែមទៀតគឺក្រុមហ៊ុន Golden Fortune Derivatives Exchange។
ក្រុមហ៊ុនឈ្មួញជើងសាឧបករណ៍និស្សន្ទ ៣ រួមមាន ក្រុមហ៊ុន M M Foreign Exchange ក្រុមហ៊ុន NYFX និងក្រុមហ៊ុន Y.A.I Trading។
ក្រុមហ៊ុនគ្រប់គ្រងមូលនិធិ ៣ បន្ថែមទៀតដូចជា ក្រុមហ៊ុន Rai Capital (Cambodia) ក្រុមហ៊ុន JB Phnom Penh Asset Management Plc. និងក្រុមហ៊ុន Royal Group Funds ព្រមទាំងអនុម័តជាគោលការណ៍លើការស្នើសុំអាជ្ញាប័ណ្ណក្រុមហ៊ុនឱ្យក្រុមហ៊ុនថែរក្សាទ្រព្យសម្បត្តិជំនួស ១ គឺក្រុមហ៊ុន Royal Group Trustee។
ជាមួយគ្នានេះ SECC ក៏បានអនុម័តជាគោលការណ៍លើការស្នើសុំអាជ្ញាប័ណ្ណបន្ថែមអាជីវកម្ម និងការអនុញ្ញាតបន្ថែមអាជីវកម្មរបស់ក្រុមហ៊ុន Cambodian Investors Capital Partners Plc. និងផ្តល់ការអនុញ្ញាតជាគោលការណ៍លើការស្នើសុំការអនុញ្ញាតបន្ថែមអាជីវកម្មរបស់ក្រុមហ៊ុន A.U Reits Co.។
SECC ក៏អនុម័តជាគោលការណ៍លើការស្នើសុំអាជ្ញាប័ណ្ណក្រុមហ៊ុនទីប្រឹក្សាហិរញ្ញវត្ថុរបស់ក្រុមហ៊ុន SF Capital Co. ព្រមទាំងអនុម័តជាគោលការណ៍លើសំណើសុំការអនុញ្ញាតបន្ថែមផលិតផលឧបករណ៍និស្សន្ទដែលត្រូវធ្វើការជួញដូររបស់ក្រុមហ៊ុន Cambodian Derivatives Exchange Co.។
លោក ស៊ូ សុជាតិ អគ្គនាយកគណៈកម្មការមូលបត្រកម្ពុជាបានថ្លែងក្នុងសិក្ខាសាលាផ្សព្វផ្សាយអំពីសក្តានុពលទីផ្សារមូលបត្រសម្រាប់និរន្តរភាពអាជីវកម្មនៅកម្ពុជាកាលពីដើមសប្តាហ៍នេះថា SECC កំពុងខិតខំប្រឹងប្រែងបង្កើនការផ្សព្វផ្សាយការយល់ដឹងពីវិស័យមូលបត្រកម្ពុជាទៅដល់សហគ្រាសពាណិជ្ជកម្មសក្តានុពល ដើម្បីទាក់ទាញពួកគេឲ្យចូលរួម។
ទិន្នន័យបានពី CSX រហូតមកដល់ពេលនេះ ផ្សារមូលបត្រកម្ពុជាមានក្រុមហ៊ុនចុះបញ្ជីចំនួន ១៣ ក្នុងនោះក្រុមហ៊ុន ៧ ចុះបញ្ជីមូលបត្រកម្មសិទ្ធិ និងក្រុមហ៊ុន ៦ ផ្សេងទៀតចុះបញ្ជីសញ្ញាបណ្ណសាជីវកម្ម។ ក្រុមហ៊ុន ១៣ នេះបានប្រមូលមូលនិធិរួមគ្នាបានប្រហែល ២៥៣ លានដុល្លារ៕ LA