ក្រុងវ៉ាស៊ីនតោនៈ ក្រុមហ៊ុន S&P ដែលជាទីភ្នាក់ងារវាយតម្លៃចំណាត់ថ្នាក់ឥណទានពិភពលោក កាលពីចុងសប្តាហ៍មុនបានដំឡើងចំណាត់ថ្នាក់បំណុលរបស់ប្រទេស ព័រទុយហ្គាល់ ដោយលើកឡើងពីការធ្លាក់ចុះកម្រិតបំណុលរបស់ប្រទេសនេះ និងការរំពឹងទុកថានឹងមានកំណើនសេដ្ឋកិច្ចប្រកបដោយតុល្យភាព។
សេចក្តីសម្រេចនេះបានធ្វើឡើងបន្ទាប់ពីមានការដំឡើងចក្ខុវិស័យរបស់ប្រទេសនេះកាលពីខែកញ្ញា ខណៈដែលប្រទេសនេះដែលបានបង្កក្តីបារម្ភដល់សេដ្ឋកិច្ចអឺរ៉ុបនាពេលកន្លងមកនោះ បន្តភាពស្ទុះងើបឡើងវិញនៃសេដ្ឋកិច្ចរបស់ខ្លួន។
ក្នុងឆ្នាំ ២០១៤ ព័រទុយហ្កាល់ បានចាកចេញពីកម្មវិធីថវិកាសង្គ្រោះអន្តរជាតិ ដែលបានចាប់ផ្តើមនៅពេលដែលវិបត្តិបំណុលក្នុងសហភាពអឺរ៉ុបកំពុងស្ថិតក្នុងកម្រិតខ្លាំង។
ទីភ្នាក់ងារ S&P បានដំឡើងចំណាត់ថ្នាក់បំណុលរបស់ខ្លួនដល់កម្រិត «BBB» ដែលជាកម្រិតមធ្យមកម្រិតទាប ដោយមានចក្ខុវិស័យស្ថិរភាព ពីចំណាត់ថ្នាក់ «BBB-»។
ទីភ្នាក់ងារនេះបានឲ្យដឹងថា ប្រទេស ព័រទុយហ្គាល់ គួរបន្តរក្សាឲ្យមានអតិរេកថវិកា កាត់បន្ថយជាលំដាប់នូវអនុបាតបំណុលធៀបនឹងផលិតផលក្នុងស្រុកសរុប (ផ.ស.ស) ខណៈដែលព្យាយាមសម្រេចឲ្យបានកំណើនសេដ្ឋកិច្ចនៅចន្លោះពី ១,៥ ទៅ ១,៧ ភាគរយរហូតដល់ឆ្នាំ ២០២១។
ទីភ្នាក់ងារ S&P បានឲ្យដឹងក្នុងសេចក្តីថ្លែងការណ៍មួយថា អតិរេកថវិកាបឋមកាលពីឆ្នាំដែលមានជិត ៣ ភាគរយនៃ ផ.ស.ស គឺជា «កម្រិតខ្ពស់មួយក្នុងចំណោមកម្រិតខ្ពស់បំផុតក្នុងតំបន់អឺរ៉ូ»។
S&P បានឲ្យដឹងទៀតថា ផែនការរបស់ក្រុងលីសបោន ដើម្បីប្រតិបត្តិការអតិរេករួមនៅឆ្នាំក្រោយ អាចជឿទុកចិត្តបាន៕ AFP/KC