យន្តហោះតាក់ស៊ីអគ្គិសនីរបស់ក្រុមហ៊ុន Joby Aviation។ រូបថត Joby Aviation
ក្រុងតូក្យូៈ ក្រុមហ៊ុនផលិតរថយន្ត Toyota របស់ប្រទេសជប៉ុនបានឲ្យដឹងកាលពីថ្ងៃព្រហស្បតិ៍ថា ខ្លួននឹងវិនិយោគទឹកប្រាក់ជិត ៤០០ លានដុល្លារ លើក្រុមហ៊ុនមួយដែលធ្វើការងារលើរថយន្តអគ្គិសនីហោះពាណិជ្ជកម្មសម្រាប់ «សេវាដឹកជញ្ជូនតាមផ្លូវអាកាសរហ័ស ស្ងាត់ និងតម្លៃទាប»។
.jpg)
ការវិនិយោគលើក្រុមហ៊ុន Joby Aviation ធ្វើឡើង ខណៈក្រុមហ៊ុនផលិតរថយន្តរបស់ជប៉ុនមួយនេះស្វែងរកការពង្រីកទៅក្នុងវិស័យថ្មីៗ ដោយសារតែឧស្សាហកម្មរថយន្តផ្លាស់ប្តូរយ៉ាងរហ័សដោយលោក Akio Toyoda ប្រធានក្រុមហ៊ុន Toyota បានសន្យាថា នឹងផ្លាស់ប្តូរក្រុមហ៊ុននេះ «ពីក្រុមហ៊ុនផលិតរថយន្តទៅជាក្រុមហ៊ុនចល័តមួយ»។
លោក Toyoda បានឲ្យដឹងនៅក្នុងសេចក្ដីប្រកាសព័ត៌មានមួយដែលប្រកាសអំពីការវិនិយោគនេះថា៖ «ការដឹកជញ្ជូនតាមផ្លូវអាកាសគឺជាទិសដៅរយៈពេលវែងសម្រាប់ក្រុមហ៊ុន Toyota ហើយ ខណៈដែលយើងបន្តការងាររបស់យើងនៅក្នុងអាជីវកម្មរថយន្ត កិច្ចព្រមព្រៀងនេះជួយសម្រេចចក្ខុវិស័យរបស់យើង»។
លោកបន្តថា៖ «តាមរយៈការខិតខំប្រឹងប្រែងថ្មី និងគួរឲ្យភ្ញាក់ផ្អើលនេះ យើងសង្ឃឹមថានឹងផ្ដល់សេរីភាពនៃការធ្វើដំណើរ និងភាពរីករាយដល់អតិថិជនគ្រប់ៗគ្នានៅលើដី ហើយនៅពេលនេះនៅលើអាកាស»។
ដោយបានបង្កើតឡើងកាលពីឆ្នាំ ២០០៩ ក្រុមហ៊ុន Joby Aviation កំពុងអភិវឌ្ឍយន្តហោះអគ្គិសនីដឹកអ្នកដំណើរ ៤ នាក់ដែលហោះហើរ និងចុះចតដោយត្រង់ដូចជាឧទ្ធម្ភាគចក្រ ទោះជាវាមានកង្ហារច្រើនក្តី។
ក្រុមហ៊ុននេះចាត់ទុកយន្តហោះនេះជាទម្រង់នៃការដឹកជញ្ជូនពាណិជ្ជកម្ម មិនមែនសម្រាប់លក់ឲ្យបុគ្គលនោះទេ។
ក្រុមហ៊ុន Toyota បានឲ្យដឹងថា ក្រុមហ៊ុនរបស់ខ្លួនក៏នឹងផ្ដល់ «ជំនាញខាងការផលិត គុណភាព និងការគ្រប់គ្រងចំណាយសម្រាប់ការអភិវឌ្ឍ និងការផលិត» យន្តហោះរបស់ក្រុមហ៊ុន Joby ផងដែរ។
ក្រុមហ៊ុន Toyota បានឲ្យដឹងថា លោក Shigeki To-moyama ដែលជាអនុប្រធានម្នាក់ក្នុងចំណោមអនុប្រធានប្រតិបត្តិជាច្រើនរបស់ខ្លួននឹងចូលរួមក្នុងក្រុមប្រឹក្សាភិបាលរបស់ក្រុមហ៊ុន Joby ដែលក្រុមប្រឹក្សាភិបាលនេះ «ដើរតួនាទីដ៏សំខាន់ក្នុងការកំណត់ទិសដៅយុទ្ធសាស្ដ្រ»។
ក្រុមហ៊ុន Joby បានធ្វើជាដៃគូរួចហើយជាមួយក្រុមហ៊ុន Uber ដែលជាក្រុមហ៊ុនហៅតាក់ស៊ីជិះ ដើម្បីអភិវឌ្ឍ «សេវាតាក់ស៊ីអាកាសនៅទីក្រុង»។
ក្រុមហ៊ុន Toyota បានវិនិយោគក្នុងវិស័យយានយន្តហោះហើរកន្លែងផ្សេងទៀត ដោយវិនិយោគលើគម្រោង SkyDrive របស់ប្រទេសជប៉ុន ដើម្បីអភិវឌ្ឍអ្វីដែលជាគោលបំណងក្នុងការក្លាយជារថយន្តហោះហើរខ្នាតតូចបំផុតរបស់ពិភពលោក។
ក្រុមហ៊ុន Toyota ក៏បានពង្រីកក្នុងវិស័យផ្សេងទៀតផងដែរ ដោយបានប្រកាសនៅក្នុងពិព័រណ៌គ្រឿងអេឡិចត្រូនិកប្រើប្រាស់នៅទីក្រុង Las Vegas នៅខែនេះពីផែនការរបស់ខ្លួនសម្រាប់ «ទីក្រុងតម្បាញ» មួយនៅជើងភ្នំហ្វ៊ូជី ដែលនឹងត្រូវបានដំណើរការដោយថាមពលឥន្ធនៈអ្រ៊ីដូសែន និងរួមទាំងផ្លូវថ្នល់សម្រាប់រថយន្តស្វ័យបើកបរព្រមទាំងលំនៅឋានវៃឆ្លាត៕ LA
