រថយន្ត Volkswagen ចតនៅមុខហាងចែកចាយនៅក្រុងស៊ីដនី។ រូបថត AFP
ក្រុងស៊ីដនីៈ ក្រុមហ៊ុនផលិតរថយន្ត Volkswagen (VW) បានយល់ព្រមបង់ប្រាក់ចំនួន ១២៧ លានដុល្លារអូស្ត្រាលី (៨៧,៣ លានដុល្លារអាមេរិក) ដើម្បីដោះស្រាយបណ្តឹងរួមគ្នាដែលដាក់ដោយអ្នកបើកបរជនជាតិអូស្ត្រាលីជុំវិញរឿងអាស្រូវបោកប្រាស់ទិន្នន័យបញ្ចេញកាបូនរបស់រថយន្តម៉ាស៊ីនម៉ាស៊ូត។ នេះបើតាមមេធាវីរបស់អ្នកដាក់ពាក្យប្តឹងនៅថ្ងៃចន្ទ។
.jpg)
ក្រុមហ៊ុនផលិតរថយន្តដ៏ធំរបស់អាល្លឺម៉ង់នេះដែលកាន់កាប់ម៉ាកយីហោរថយន្តជាច្រើនរាប់ចាប់ពីរថយន្តប្រណីត Audi រហូតដល់រថយន្តតម្លៃថោក Skoda ឲ្យដឹងកាលពីឆ្នាំ ២០១៥ ថារថយន្តម៉ាស៊ីនម៉ាស៊ូតចំនួន ១១ លានគ្រឿងនៅទូទាំងពិភពលោកបានរងប៉ះពាល់ពីរឿងអាស្រូវនេះ។
ម្ចាស់រថយន្តប្រហែល ១ សែននាក់នៅអូស្ត្រាលីនឹងអាចស្វែងរកសំណងពីក្រុមហ៊ុន Volkswagen បានស្ថិតក្រោមលក្ខខណ្ឌនៃកិច្ចព្រមព្រៀងជាគោលការណ៍ដែលបានព្រមព្រៀងដោយក្រុមហ៊ុនដោយគ្មានការសារភាពថានឹងទទួលខុសត្រូវ ប៉ុន្តែនៅតែត្រូវទទួលបានការអនុម័តដោយតុលាការសហព័ន្ធ។
លោក Julian Schimmel មេធាវីរបស់ក្រុមហ៊ុន Maurice Blackburn ដែលជាក្រុមហ៊ុនស្ថិតនៅពីក្រោយបណ្តឹងមួយក្នុងចំណោមបណ្តឹងជាច្រើននោះថ្លែងថា៖ «នេះគឺជាជំហានដ៏មានសារៈសំខាន់មួយក្នុងការផ្តល់វិធានការយុត្តិធម៌ និងកែតម្រូវកំហុសចំពោះអ្នកបើកបរជនជាតិអូស្ត្រាលីរាប់ពាន់នាក់ ដែលអះអាងថាពួកគេបានរងផលប៉ះពាល់ផ្នែកហិរញ្ញវត្ថុដោយសារបញ្ហាបញ្ចេញកាបូនរបស់រថយន្តម៉ាស៊ីនម៉ាស៊ូតនេះ»៕ KC
