បន្ទាប់ពីទទួលបានភាគលាភពីការចុះបញ្ជីបោះផ្សាយជាសាធារណៈនូវសញ្ញាបណ្ណសាជីវកម្មដ៏ជោគជ័យគួបផ្សំនឹងកំណើននៃប្រាក់បញ្ញើ ធនាគារភ៊ីភ៊ីស៊ីប៊ែងកាន់តែមានភាពរឹងមាំ និងតម្រង់គោលដៅឆ្ពោះទៅមុខនៅឆ្នាំ ២០២១។
ធនាគារភ៊ីភ៊ីស៊ីប៊ែង បានចុះបញ្ជីបោះផ្សាយជាសាធារណៈនូវសញ្ញាបណ្ណសាជីវកម្មចំនួនពីរដំណាក់កាលនៅផ្សារមូលបត្រកម្ពុជា ដោយដំណាក់កាលទី១ ចាប់ផ្ដើមនៅក្នុងខែមេសា និងដំណាក់កាលពី២ នៅក្នុងខែតុលា ដែលមានសញ្ញាបណ្ណសរុបចំនួន ៨០០ ០០០ មានតម្លៃ ៨០ ពាន់លានរៀល។
សញ្ញាបណ្ណមានរយៈពេលកំណត់ ៣ ឆ្នាំ ហើយភ្ជាប់មកជាមួយអត្រាការប្រាក់ ៦,៥ ភាគរយ ក្នុងមួយឆ្នាំ។
«ការបោះផ្សាយជាសាធារណៈនូវសញ្ញាបណ្ណសាជីវកម្មដំណាក់កាលទី២ ទទួលបានការគាំទ្រយ៉ាងខ្លាំង ដែលបង្ហាញពីទំនុកចិត្តខ្ពស់ មកលើប្រតិបត្តិការរបស់ធនាគារ។ ថវិកាដែលប្រមូលបានពីការចុះបញ្ជីនេះ គឺត្រូវបន្តផ្តល់ទៅសហគ្រាសធុនតូច និងមធ្យម (SMEs) ដែលរងផលប៉ះពាល់យ៉ាងធ្ងន់ធ្ងរដោយជំងឺរាតត្បាតកូវីដ ១៩»។
អគ្គនាយកធនាគារភ៊ីភ៊ីស៊ីប៊ែង លោក Shin Chang Moo បានមានប្រសាសន៍ថា៖ «ការចុះបញ្ជីនៅផ្សារភាគហ៊ុន និងការវិនិយោគជាបន្តរបស់ធនាគារនៅក្នុង SMEs បានផ្តល់ភាគលាភសម្រាប់ធនាគារភ៊ីភ៊ីស៊ីប៊ែង នៅក្នុងឆ្នាំនេះ»។
ធនាគារបានពង្រីកវត្តមានរបស់ខ្លួននៅទូទាំងព្រះរាជាណាចក្រកម្ពុជា ដោយបានបើកសាខាបន្ថែមទៀត ខណៈបច្ចុប្បន្នឈានដល់ ២៣ សាខា។ ក្នុងនោះបានបន្ថែមបណ្ដាញសាខាថ្មី ២ ទៀតនៅភ្នំពេញក្នុងឆ្នាំ ២០២០ នេះ គឺសាខានៅមហាវិធីព្រះសីហនុ និងសាខាមួយទៀតនៅជ្រោយចង្វារ។
ធនាគារភ៊ីភ៊ីស៊ីប៊ែងផ្លាស់ប្ដូរទីតាំងទៅខណ្ឌដូនពេញ។ សាខាផ្សារថ្មីដែលស្ថិតនៅប្រសព្វមហាវិថីមុនីវង្ស និងកម្ពុជាក្រោមបានផ្លាស់ប្ដូរទៅជិតមន្ទីរពេទ្យល្បីមួយ ហើយបានដាក់ឈ្មោះសាខានោះថា ធនាគារភ៊ីភ៊ីស៊ីប៊ែងសាខាកាល់ម៉ែត។ ការប្ដូរទីតាំងនេះនឹងធ្វើឲ្យវត្តមានធនាគាររីកដុះដាលខ្លាំងឡើងៗ ដែលជាទីតាំងស្ថិតនៅកណ្ដាលទីក្រុងផ្ដល់ភាពងាយស្រួលដល់អតិថិជនក្នុងការធ្វើប្រត្តិបត្តិការធនាគារ។
ចំនួនម៉ាស៊ីន ATM ក៏បានកើនឡើងគួរឱ្យកត់សម្គាល់ផងដែរ នៅក្នុងឆ្នាំនេះ គឺកើនដល់ ៦៥ ដើម្បីសម្រួលដល់សេវាកម្មធនាគារសម្រាប់អតិថិជនរបស់ខ្លួន ជាពិសេសនៅពេលអនុវត្តគម្លាតសង្គម ជាបទដ្ឋានក្នុងពេលរីករាលជំងឺកូវីដ ១៩។
ដើម្បីជួយដល់ SMEs ធនាគារភ៊ីភ៊ីស៊ីប៊ែង បានបង្កើតមជ្ឈមណ្ឌល SMEs ចំនួន ២ កន្លែង ដែលមានទីតាំងស្ថិតនៅសាខាផ្សារហេងលី និងសាខាជ្រោយចង្វារ។ មជ្ឈមណ្ឌលទាំងនេះផ្តល់ការប្រឹក្សាជំនាញដល់ប្រតិបត្តិករ SME ដែលត្រូវការកម្ចីហិរញ្ញវត្ថុ។
លោក Shin ថ្លែងថា៖ «មជ្ឈមណ្ឌលទាំងពីរនេះស្ថិតនៅទីតាំងយុទ្ធសាស្ត្របានរួមចំណែកដល់ការកើនឡើងចំនួន ៦,៨២ ភាគរយ នៃអតិថិជន SME របស់ធនាគារភ៊ីភ៊ីស៊ីប៊ែង នៅចុងត្រីមាសទី៣»។
«ម្ចាស់អាជីវកម្មពិតជារីករាយ ជាមួយនឹងវិធីសាស្ត្ររបស់ធនាគារជាមួយបុគ្គលិកដែលផ្តល់ជូននូវសេវាកម្មពិគ្រោះយោបល់ស៊ីជម្រៅ និងផ្ដល់ជូនលក្ខខណ្ឌអំណោយផលសម្រាប់តម្រូវការប្រាក់កម្ចីនៅក្នុងទីផ្សារ។
លោក Shin ថ្លែងថា៖ «ព័ត៌មាន និងជំនួយក៏ត្រូវបានផ្តល់ផងដែរ នៅក្នុងការធ្វើពិពិធកម្មវិធីទូទាត់តាមរយៈវេទិកាឌីជីថលដោយមិនប្រើកាត។ ទាំងនេះមិនត្រឹមតែជួយ SMEs ប្រមូលការទូទាត់ប្រាក់ពីអតិថិជនរបស់ពួកគេដោយសុវត្ថិភាពប៉ុណ្ណោះទេ ប៉ុន្តែថែមទាំងជួយកាត់បន្ថយចំណាយប្រតិបត្តិការរបស់ពួកគេផងដែរ ដែលជាការផ្តោតសំខាន់របស់ម្ចាស់អាជីវកម្មភាគច្រើននៅក្នុងឆ្នាំនេះ»។
វាជាផ្នែកមួយនៃកិច្ចខិតខំប្រឹងប្រែងរបស់ខ្លួន ដើម្បីធានាសុវត្ថិភាពដល់អតិថិជនរបស់ខ្លួន ហើយពួកគេបន្តរីករាយនឹងសេវាកម្មរបស់ធនាគារដោយគ្មានការរំខាន។ ធនាគារភ៊ីភ៊ីស៊ីប៊ែង បានផ្តល់ជម្រើសងាយស្រួលជាច្រើនដល់អតិថិជនក្នុងការទូទាត់វិក័យបត្រ និងការផ្ទេរប្រាក់ទៅកាន់ធនាគារផ្សេង។
អតិថិជនអាចប្រើប្រាស់កម្មវិធីទូរស័ព្ទរបស់ធនាគារ ដើម្បីទូទាត់វិក័យបត្រ និងផ្ទេរប្រាក់ទៅធនាគារក្នុងស្រុកក៏ដូចជាទៅធនាគារអន្តរជាតិតាមរយៈលេខកូដ SWIFT។
ប័ណ្ណវីសាដោយមិនប្រើកាតបានក្លាយជាមធ្យោបាយដ៏ប្រសើរមួយ ដើម្បីជៀសវាងការប្រើប្រាស់សាច់ប្រាក់ផ្ទាល់។ ធនាគារភ៊ីភ៊ីស៊ីប៊ែង ក៏បានលើកលែងថ្លៃប្តូរបណ្ណ សម្រាប់អ្នកដែលចង់បានវិធីសាស្ត្រទូទាត់ដោយគ្មានទំនាក់ទំនង ហើយអតិថិជននៅទីក្រុងភ្នំពេញនៅតែអាចទទួលបានការដឹកជញ្ជូនកាតវីសារដោយឥតគិតថ្លៃ។
ដើម្បីឆ្លើយតបទៅនឹងការរីករាលដាលនៃជំងឺរាតត្បាត យើងក៏បានផ្ដល់នូវសេវាអតិថិជនក្នុងការទទួលបានព័ត៌មានដែលអាចទុកចិត្តបានតាមរយៈបណ្តាញសង្គម ទន្ទឹមនឹងនេះ ធនាគារភ៊ីភ៊ីស៊ីប៊ែងក៏បានបង្កើតមជ្ឈមណ្ឌលសេវាកម្មអតិថិជន ២៤/៧ ដែលមានតាមរយៈលេខទូរស័ព្ទក៏ដូចជាការជជែកផ្ទាល់តាមរយៈបណ្ដាញសង្គមហ្វេសប៊ុក ឬគេហទំព័ររបស់ធនាគារ ឬសេវាធនាគារចល័ត និងសេវាធនាគារអាជីវកម្មរបស់ខ្លួនគឺ smartBiz។
«ក្នុងឆ្នាំនេះ ធនាគារភ៊ីភ៊ីស៊ីប៊ែង មានគម្រោងខិតឲ្យកាន់តែជិតស្និទ្ធជាមួយអតិថិជនរបស់ខ្លួន ដោយសារតែជំងឺរាតត្បាតមួយនេះ គឺយើងត្រូវរក្សា “គម្លាតសង្គម” ដើម្បីសុវត្ថិភាព»។
លោកបន្ថែមថា៖ «ធនាគារក៏បានយល់យ៉ាងឆាប់រហ័សថា វាមានសារៈសំខាន់ប៉ុណ្ណាសម្រាប់អតិថិជន ដើម្បីឲ្យពួកគេមានជម្រើសច្រើនក្នុងការគ្រប់គ្រងហិរញ្ញវត្ថុរបស់ពួកគេ ដោយមិនចាំបាច់មកដល់សាខាធនាគារដោយផ្ទាល់»។
ជាមួយនឹងការរីករាលដាលនៃជំងឺរាតត្បាតកាន់តែខ្លាំងឡើងៗ ធ្វើឱ្យការឆ្លងដែនមានការលំបាក ធនាគារភ៊ីភ៊ីស៊ីប៊ែង បានបើកដំណើរការវេទិកាអនឡាញផ្សេងៗ ដើម្បីបម្រើអតិថិជនអន្តរជាតិរបស់ខ្លួន ដែលភាគច្រើនមកពីប្រទេសកូរ៉េខាងត្បូង ជប៉ុន និងប្រទេសចិន។
ដើម្បីផ្តល់ព័ត៌មានទាន់ពេលវេលា ធនាគារមានផ្នែក “ការិយាល័យជប៉ុន” ដែលត្រូវបានបង្កើតឡើង ដើម្បីឱ្យអតិថិជនជប៉ុនអាចទទួលបានព័ត៌មានលម្អិត។ ខណៈគេហទំព័រជាភាសាកូរ៉េ និងភាសាចិនក៏នឹងត្រូវដាក់ឱ្យប្រើប្រាស់ក្នុងពេលឆាប់ៗ។
«ខណៈជំងឺរាតត្បាតនៅតែបន្តមានធនាគារភ៊ីភ៊ីស៊ីប៊ែង យល់ឃើញថា ប្រជាជននៅតែជ្រើសរើសការទទួលបានព័ត៌មានពីសេវាធនាគារពីចម្ងាយ ដូច្នេះយើងបានបង្កើតគេហទំព័រដែលមានទាំងភាសាខ្មែរ និងអង់គ្លេស»។
«នៅធនាគារភ៊ីភ៊ីស៊ីប៊ែង វាពិតជាឆ្នាំដ៏មមាញឹក ប៉ុន្តែជាឆ្នាំដែលមានផលិតភាពខ្ពស់។ យើងសូមជូនពរអ្នកទាំងអស់គ្នាឲ្យជួបតែសេចក្តីសុខក្នុងឆ្នាំថ្មី ហើយយើងសង្ឃឹមថាឆ្នាំ ២០២១ គឺជាឆ្នាំដ៏ល្អប្រសើរសម្រាប់យើងទាំងអស់គ្នា។ ខណៈវ៉ាក់សាំងត្រូវបានអនុម័តជាបណ្តើរៗនៅជុំវិញពិភពលោក យើងទាំងអស់គ្នានឹងអាចចាប់ផ្តើមមើលឃើញភាពស្រស់បំព្រងឡើងវិញ បន្ទាប់ពីជួបភាពអាប់អ៊ួមួយរយៈកន្លងមក៕