លោក Trump (ឆ្វេង) និងលោក Biden ក្នុងអំឡុងការតស៊ូមតិចុងក្រោយ។ AFP
.jpg)
ប្រធានាធិបតីសហរដ្ឋអាមេរិក លោក Donald Trump បានប្រឈមមុខជាមួយនឹងបេក្ខជនមកពីបក្សប្រជាធិបតេយ្យលោក Joe Biden ក្នុងការតស៊ូមតិលើកចុងក្រោយ មុនការបោះឆ្នោតនៅខែវិច្ឆិកា ខាងមុខនេះ។
កាលពីថ្ងៃព្រហស្បតិ៍ ទី ២២ ខែតុលា ជាការតស៊ូមតិលើកចុងក្រោយ ដែលអាចនិយាយបានថា មានសណ្ដាប់ធ្នាប់ជាងការតស៊ូមតិលើកទី១ ដែលប្រព្រឹត្តទៅកាលពីខែកញ្ញា។ លើកទី១ ការតស៊ូមតិពោរពេញទៅដោយភាពរញ៉េរញ៉ៃ ការប្រមាថ និងនិយាយឡូឡាកាត់សម្ដីគ្នាទៅវិញទៅមក។
ចំពោះលើកចុងក្រោយនេះវិញ គណៈកម្មការបានរៀបចំការតស៊ូមតិដោយបានផ្លាស់ប្ដូរលក្ខខណ្ឌកំណត់ទុកពេលឱ្យត្រឹមតែ ២ នាទី សម្រាប់បេក្ខជននីមួយៗឆ្លើយនឹងសំណួរ របស់អ្នកសម្របសម្រួល និងបិទមីក្រូហ្វូនបេក្ខជន ក្នុងរយៈពេលដែលបេក្ខជនម្នាក់ទៀតកំពុងនិយាយ។
ជំនួសឱ្យការរំខានគ្នាឥតឈប់ឈរដូចក្នុងការតស៊ូមតិលើកទី១ បុរសទាំង ២ បានបង្ហាញអារម្មណ៍តាមរយៈការធ្វើសកម្មភាពដូចជា គ្រវីក្បាល ងក់ក្បាល ញញឹម សើច លើកដៃ និងគ្រវីម្រាមដៃ ជាដើម។
យ៉ាងណាក៏ដោយបើទោះបីជាមានការកែលក្ខខណ្ឌនៃការតស៊ូមតិក៏ដោយ ភាពតានតឹង ដែលកើតពីការវាយប្រហារផ្ទាល់ខ្លួន ការជំទាស់គ្នាលើគោលនយោបាយ និងការនិយាយមិនពិតនៅតែកើតមានក្នុងការតស៊ូមតិលើកនេះ។
ក្នុងការឆ្លើយសំណួរទី១ បេក្ខជនទាំង ២ បានប្រកាន់ជំហរផ្ទុយគ្នាទាក់ទងនឹងការរាតត្បាត COVID-19។ លោក Trump អះអាងដោយផ្ទុយពីការពិតថា ជំងឺនេះ កំពុងតែ «បាត់ទៅវិញ» និងនិយាយថា ៩៩% នៃប្រជាជនបានជាសះស្បើយពី COVID-19។
លោកក៏បានអះអាងថា ការឆ្លើយតបទៅនឹង COVID-19 របស់រដ្ឋបាលលោកគឺមានប្រសិទ្ធភាព ដោយលោកលើកឡើងថា ចំនួនមនុស្សស្លាប់ ២០០ ០០០ នាក់ គឺទាបជាងការ-ព្យាករថា ប្រជាជនអាមេរិក ២ លាននឹងស្លាប់ តែលោកមិនបានបញ្ជាក់អំពីប្រភពនៃការព្យាករ នេះទេ។ លោកបានបន្តទៀតថា អាមេរិកមានវ៉ាក់សាំងរួចជាស្រេច តែមកដល់សព្វថ្ងៃអាមេរិកមិនទាន់មានវ៉ាក់សាំងដែលមានការអនុញ្ញាតឱ្យប្រើប្រាស់ជាសាធារណៈទេ។
រីឯលោក Biden វិញបានទាមទារឱ្យរដ្ឋាភិបាលធ្វើសកម្មភាពកាន់តែខ្លាំង ដើម្បីត្រៀមសម្រាប់ «រដូវរងាងងឹត» ខាងមុខនេះ ដែលអាចនឹងមានការរីករាលដាល COVID-19 កាន់តែខ្លាំង និងមានមនុស្សស្លាប់កាន់តែច្រើន។
ក្រៅពីនេះ លោក Biden បានវាយប្រហារបក្សសាធារណរដ្ឋ ដោយបានចោទថា រដ្ឋដែលដឹកនាំដោយអភិបាលមកពីបក្សសាធារណរដ្ឋ គឺមានការឆ្លង COVID-19 ច្រើនខ្លាំង។
លោកនិយាយថា៖ «ក្រឡេកទៅមើលរដ្ឋដែលមានការកើនឡើងករណី COVID-19 យ៉ាងខ្លាំង។ ពួកគេជារដ្ឋក្រហម ពួកគេគឺជារដ្ឋនៅតំបន់មជ្ឈិមពាយព្យ ពួកគេ គឺជារដ្ឋនៅតំបន់មជ្ឈិមពាយព្យលើ។ នោះហើយ គឺជាកន្លែងដែលមានការកើនឡើងយ៉ាងខ្លាំង»។
ការវាយប្រហារនេះ គឺមានភាពមិនពិត ដោយសារសព្វថ្ងៃការរាលដាល COVID-19 គឺកំពុងកើនឡើងនៅគ្រប់រដ្ឋនៃសហរដ្ឋអាមេរិក ដោយមិនគិតថា តើរដ្ឋទាំងនោះ គឺគ្រប់គ្រងដោយបក្សប្រជាធិបតេយ្យ ឬបក្សសាធារណរដ្ឋ។
បន្ទាប់ពីអ្នកសម្របសម្រួលបានធ្វើការផ្លាស់ប្ដូរទៅប្រធានបទសន្តិសុខជាតិ លោក Trump បានវាយប្រហារលោក Hunter Biden ដែលជាកូនរបស់លោក Biden ថា ក្រុមហ៊ុនរបស់លោកបានទទួលប្រាក់ ៣,៥ លានដុល្លារ ពីអតីតអភិបាលក្រុងម៉ូស្គូ ចំពេលឪពុកធ្វើជាអនុប្រធានាធិបតីអាមេរិក។
លោក Trump ក៏បានចោទលោក Biden ថាបានទទួលប្រាក់កុំមីស្យុងពីអាជីវកម្មរបស់លោក Hunter Biden ផងដែរ។ ការអះអាងរបស់លោក Trump គឺផ្អែកលើរបាយការណ៍របស់សមាជិកព្រឹទ្ធសភាមកពីបក្សសាធារណរដ្ឋ តែរបាយការណ៍នេះ គឺមិនបានបង្ហាញភ័ស្តុតាងច្បាស់លាស់ដែលបញ្ជាក់ថា លោក Hunter Biden ពិតជាបានទទួលប្រាក់នោះមែនទេ។
ជុំវិញការចោទប្រកាន់នេះលោក Biden បានឆ្លើយតបនឹងលោក Trump វិញដោយបាននិយាយថា លោកមិនដែលយកប្រាក់ ១ សេនពីប្រភពបរទេសណាមួយទេក្នុងជីវិតរបស់លោក។ ភ្ជាប់ជាមួយការឆ្លើយតបនេះលោកបានវាយប្រហារបកទៅលោក Trump វិញអំពីការបើកគណនីធនាគារនៅប្រទេសចិន និងបានបង់ពន្ធនៅចិនច្រើនជាងនៅសហរដ្ឋអាមេរិក។ ការចោទប្រកាន់របស់លោក Biden គឺផ្អែកលើការរាយការណ៍របស់កាសែត The New York Times ដែលបានអះអាងថា ពួកគេមានឯកសារប្រកាសពន្ធរបស់លោក Trump។
ក្រៅពីនេះលោក Biden បានហៅលោក Trump ថាជាមនុស្សគ្មានសីលធម៌ ជាមេដឹកនាំធ្វើឱ្យមានជម្លោះ ដែលបានរំខានដល់ការឆ្លើយតបរបស់រដ្ឋាភិបាលទៅនឹងវិបត្តិ COVID-19។
យ៉ាងណាមិញ អ្នកវិភាគខ្លះបានគិតថា ការតស៊ូមតិនេះប្រហែលជារៀបចំយឺតពេលហើយ និងមានឥទ្ធិពលតិចតួចទៅលើការបោះឆ្នោតខាងមុខនេះ ដោយគិតត្រឹមពេលនេះប្រជាជនប្រមាណជាង ៥០ លាននាក់ បានបោះឆ្នោតរួចហើយតាមរយៈការបោះឆ្នោតតាមប្រអប់សំបុត្រ។
ដើមឡើយការតស៊ូមតិប្រធានាធិបតីនេះ គឺធ្វើឡើងក្នុងចំណោមការតស៊ូមតិប្រធានាធិបតីចំនួន ៣ លើក ដែលការតស៊ូមតិប្រធានាធិបតីលើកទី១ ប្រព្រឹត្តនៅថ្ងៃទី ២៩ ខែកញ្ញា និងលើកទី២ នៅថ្ងៃទី ១៥ ខែតុលា។ តែការតស៊ូមតិលើកទី២ នៅថ្ងៃទី ១៥ ខែតុលា ត្រូវបានលុបចោល ក្រោយពីលោក Trump និងភរិយារបស់លោកបានឆ្លង COVID-19 ដែលតម្រូវឱ្យរៀបចំការតស៊ូមតិតាមរយៈវីដេអូ ប៉ុន្តែលោកTrump បានបដិសេធមិនចូលរួម៕
