ប៉ូលិសនៅក្នុងប្រទេសប៉ាគីស្ថាន បាននិយាយ ថា ក្រុមស្តាំនិយម ១ ក្រុម បានចាប់បុគ្គលិកសន្តិសុខ ៦ នាក់ ជាចំណាប់ខ្មាំងនៅស្នងការដ្ឋានរបស់ពួកគេនៅទីក្រុងឡាហ័រ កាលពីថ្ងៃអាទិត្យ ក្រោយពីការប៉ះទង្គិចដោយហិង្សា បន្ទាប់ពីចាប់ខ្លួនមេដឹកនាំរបស់ក្រុមនេះ។
រដ្ឋាភិបាលប៉ាគីស្ថាន បានហាមក្រុម Tehreek-e-Labbaik (TLP) Pakistan កាលពីដើមសប្តាហ៍មុន ក្រោយពីក្រុមអ្នកគាំទ្ររបស់ពួកគេ បានឡើងទៅតាមដងផ្លូវនានា ដើម្បីតវ៉ាប្រឆាំងការចាប់ខ្លួនរបស់ពួកគេ គឺបញ្ញវន្តមូស្លីមឈ្មោះ Saad Rizvi។
សេចក្តីថ្លែងការណ៍មួយចេញពីប៉ូលិសខេត្តពុនចាប បានឱ្យដឹងថា៖ «កាលពីព្រឹកមិញនេះ (ព្រឹកថ្ងៃអាទិត្យ) ក្រុមអ្នកលើ្មសច្បាប់បានវាយប្រហារទៅលើស្នងការដ្ឋានប៉ូលិសជាទីដែលទាហានប៉ារ៉ា និងមន្ត្រីប៉ូលិស ត្រូវបានឡោមព័ទ្ធជាប់នៅក្នុងស្នងការដ្ឋានប៉ូលិស និងស្នងការរងប៉ូលិសម្នាក់ត្រូវបានគេចាប់ជំរិត»។
សេចក្តីថ្លែងការណ៍ដដែលនោះបានឱ្យដឹងទៀតថា អ្នកវាយប្រហារទាំងនោះប្រដាប់ដោយគ្រាប់បែកសាំង និងបានលួចរថយន្តដឹកប្រេងមួយគ្រឿង ដែលដឹកប្រេង ៥ ម៉ឺនលីត្រ។
អ្នកនាំពាក្យប៉ូលិសទីក្រុងឡាហ័រលោក Arif Rana បានថ្លែងប្រាប់ទីភ្នាក់ងារសារព័ត៌មាន Reuters ថា មន្ត្រីប៉ូលិសជាន់ខ្ពស់ម្នាក់ និងទាហានប៉ារ៉ា ២ នាក់ ស្ថិតនៅក្នុងចំណោមមនុស្សដែលត្រូវបានចាប់ខ្លួនដោយក្រុមអ្នកគាំទ្រ TLP។
ប៉ូលិសបាននិយាយថា ពួកគេបានចាប់ផ្តើមកិច្ចប្រតិបត្តិការសន្តិសុខប្រឆាំងក្រុមនោះ ជាការឆ្លើយតបនឹងការវាយប្រហារនោះ។
បណ្តាញសារព័ត៌មានប៉ាគីស្ថានត្រូវបានរារាំងមិនឱ្យតាមយកព័ត៌មានអំពីក្រុមនេះទេ ចាប់តាំងពីក្រុមនេះត្រូវបានហាម ហើយកាលពីថ្ងៃអាទិត្យសេវាទូរស័ព្ទ និងអ៊ីនធឺណិតយឺតនៅក្នុងតំបន់ ដែលការប៉ះទង្គិចបានកើតឡើង។
ដោយថ្លែងទៅកាន់ប្រព័ន្ធផ្សព្វផ្សាយនៅក្នុងរដ្ឋធានីអ៊ីស្លាម៉ាបាដ លោករដ្ឋមន្ត្រីមហាផ្ទៃ Sheikh Rasheed បាននិយាយថា ស្ថានភាពនៅក្នុងទីក្រុងឡាហ័រ តានតឹងយ៉ាងខ្លាំង ដោយកិច្ចប្រតិបត្តិការផ្តោតទៅលើផ្លូវប្រសព្វ Yateem Khana មានចម្ងាយប្រហែល ១ គីឡូម៉ែត្រពីអគារទីស្នាក់ការក្នុងតំបន់របស់ TLP។
ក្រុមអ្នកគាំទ្រ TLP បានចែករំលែកវីដេអូនៅលើបណ្តាញសង្គមនៃអ្វី ដែលពួកគេបាននិយាយថា គឺជាការប៉ះទង្គិចជាមួយប៉ូលិសកាលពីថ្ងៃអាទិត្យ។
វីដេអូទាំងអស់ដែលសារព័ត៌មាន Reuters មិនអាចផ្ទៀងផ្ទាត់បានដោយឯករាជ្យ បានបង្ហាញឱ្យឃើញអ្នកតវ៉ារាប់ពាន់នាក់ប៉ះទង្គិចជាមួយប៉ូលិស ខណៈដែលដុំផ្សែងឧស្ម័នបង្ហូរទឹកភ្នែកហោះទៅលើអាកាស និងសំឡេងកាំភ្លើងជាច្រើនគ្រាប់ ត្រូវបានគេឮ។
អ្នកនាំពាក្យ TLP លោក Shafiq Amini បានថ្លែងប្រាប់សារព័ត៌មាន Reuters ថា អ្នកគាំទ្រ ៤ នាក់បានស្លាប់ និងជាច្រើននាក់ផ្សេងទៀត រងរបួសនៅក្នុងអំពើហិង្សានោះ។
មនុស្យយ៉ាងតិច ៤ នាក់បានស្លាប់រាប់រយនាក់បានរងរបួស និងរាប់ពាន់នាក់ត្រូវបានចាប់ខ្លួន ចាប់តាំងពីលោក Rizvi ត្រូវបានចាប់ខ្លួន៕