ក្រុងវ៉ារីៈ ក្រុមមន្ត្រីសន្តិសុខ និងប្រភពក្នុងតំបន់ បានឲ្យដឹងកាលពីថ្ងៃពុធថា មនុស្សរាប់សិបនាក់ បានស្លាប់នៅក្នុងរដ្ឋ ៤ នៃប្រទេសនីហ្សេរីយ៉ា ដោយបណ្តាលឲ្យចំនួនអ្នកស្លាប់ក្នុងការប៉ះទង្គិចរប៉េះរប៉ោះរយៈពេល មួយសប្តាហ៍ បានកើនឡើងដល់ជាង ១០០ នាក់។
អំពើហិង្សានោះ បានកើតឡើងស្របពេលជាមួយនឹងភាពអសន្តិសុខរ៉ាំរ៉ៃនៅភាគឦសានប្រទេស នីហ្សេរីយ៉ា ជាទីដែលមនុស្ស ២ ពាន់នាក់ ត្រូវបានគេជម្លៀសកាលពីថ្ងៃអង្គារ នៅមុនប្រតិបត្តិការរបស់រដ្ឋាភិបាល ដែលត្រូវបានគេជឿជាក់ថា ធ្វើឡើង ដើម្បីប្រឆាំងក្រុមជីហាដបូកូហារ៉ាម។
ប្រធានប្រចាំតំបន់ លោក Sunny Odum បានថ្លែងថា នៅរដ្ឋ Rivers ភាគអាគ្នេយ៍មនុស្ស ៨ នាក់ បានស្លាប់កាលពីព្រឹកថ្ងៃចន្ទ នៅពេលក្រុមជនប្រដាប់អាវុធ បានវាយប្រហារទៅលើភូមិ Emohua នៅក្នុងតំបន់ Ogoni។
អ្នកនាំពាក្យប៉ូលិសរដ្ឋ លោក Nnamdi Omoni បានថ្លែងថា ការវាយប្រហារនោះ គឺជា «ឧប្បត្តិហេតុទាក់ទងទៅនឹងវប្បធម៌» ជាសញ្ញាធម្មតារបស់ក្រុមជនអន្ធពាល ឬក្រុមឧក្រិដ្ឋជន ដែលត្រូវបានគេជួល ដើម្បីយកផលចំណេញនយោបាយ និងជាញឹកញាប់មានជំនឿខាងសាសនាលាយឡំគ្នា ឬគម្ពីមន្តអាគមអូមអាមនៅក្នុងការប្រតិបត្តិរបស់ពួកគេទាំងនោះ។
ប៉ូលិស បានថ្លែងថា នៅក្នុងរដ្ឋកាត់ស៊ីណាភាគខាងជើង មនុស្ស ១៤ នាក់ បានស្លាប់កាលពីថ្ងៃអាទិត្យ នៅក្នុងការប៉ះទង្គិចរវាងក្រុមចោរលួចគោក្របី និងក្រុមជីវពលស៊ីវិលប្រដាប់អាវុធរបស់រដ្ឋាភិបាលដែលគាំទ្រកងកម្លាំងសន្តិសុខនៅទីនោះ។
អ្នកនាំពាក្យប៉ូលិសនៅរដ្ឋកាត់ស៊ីណា លោក Gambo Isa បានថ្លែងថា ការប្រយុទ្ធគ្នានោះ បានកើតឡើងនៅក្រុងសាមីយ៉ាជីណូ៕ AFP/SK