ក្រុងសេអ៊ូលៈ ប្រព័ន្ធផ្សព្វផ្សាយរដ្ឋរបស់កូរ៉េខាងជើងបានស្តីបន្ទោសក្រុមប្រឆាំងនយោបាយរបស់លោក ដូណាល់ ត្រាំចំពោះការជាប់គាំងជុំវិញការលុបបំបាត់អាវុធនុយក្លេអ៊ែរកាលពីថ្ងៃសៅរ៍ ដោយបានជំរុញឲ្យប្រធានាធិបតីអាមេរិកធ្វើសកម្មភាពគួរឲ្យទុកចិត្តបាន ដើម្បីធ្វើឲ្យមានការរីកចម្រើនលើបញ្ហាដ៏ស្មុគស្មាញមួយនេះ។
លោកត្រាំ និងមេដឹកនាំកូរ៉េខាងជើងលោក គីម ជុងអ៊ុនបានរៀបចំជំនួបមួយនៅក្នុងប្រទេសសិង្ហបុរី កាលពីខែមិថុនា ដែលមេដឹកនាំអាមេរិករូបនេះបានប្រកាសថា ជាការទម្លាយភាពទាល់ច្រក ជាប្រវត្តិសាស្ត្រមួយ។
នៅឯជំនួបនោះ មេដឹកនាំទាំង ២ រូប បានឈានដល់កិច្ចព្រមព្រៀងមិនច្បាស់លាស់មួយ ដើម្បីលុបបំបាត់អាវុធនុយក្លេអ៊ែរនៅលើឧបទ្វីបកូរ៉េ ប៉ុន្តែមានចលនាតិចតួច តាំងពីពេលនោះមក។
ទន្ទឹមគ្នានោះ កូរ៉េខាងជើងបានរិះគន់ក្រុងវ៉ាស៊ីនតោនចំពោះការទាមទារដូចក្មេងពាល និងជាឯកតោភាគីឲ្យបំផ្លាញចោលឃ្លាំងអាតូមិករបស់ក្រុងព្យុងយ៉ាងទាំងស្រុងអាចផ្ទៀងផ្ទាត់បាន និងមិនអាចកែប្រែបាន។
កាលពីថ្ងៃសៅរ៍ កាសែត Rodong Sinmun ជាកាសែតប្រចាំថ្ងៃដ៏ល្បីបំផុតរបស់កូរ៉េខាងជើង បានសរសើរលោកត្រាំចំពោះការប្រឹងប្រែងធ្វើឲ្យទំនាក់ទំនងអាមេរិក-កូរ៉េខាងជើងល្អប្រសើរឡើង និងឈានដល់សន្តិភាពពិភពលោក ដែលកាសែតនេះនិយាយថា វាគឺជាសមិទ្ធផលនៃសតវត្សរ៍នេះ។
សារព័ត៌មាននោះ បានឲ្យដឹងទៀតថា ទោះបីជាយ៉ាងណាក៏ដោយ ក៏លោកត្រាំត្រូវប្រឈមនឹងអ្នកប្រឆាំងជាច្រើនរាប់មិនអស់ ដោយបន្តថា គាំទ្របក្សប្រជាធិបតេយ្យ និងអ្នកគាំទ្រសាធារណរដ្ឋខ្លះរារាំងកិច្ចប្រឹងប្រែងរបស់លោកត្រាំដើម្បីផលប្រយោជន៍សម្រាប់បក្ស របស់ពួកគេ៕