ទាហានឥណ្ឌាឈរជើងនៅព្រំដែន ពេលប៉ះទង្គិចជាមួយចិននាពេលកន្លងមក។ រូបថត AFP
.jpg)
ក្រុងប៉េកាំងៈ ក្រសួងការបរទេសចិនបានថ្លែងថាកងទ័ពចិន និងឥណ្ឌា បានបញ្ចប់ការពាក់ព័ន្ធនៅផ្នែកភាគច្រើននៃព្រំដែនដែលមានជម្លោះរវាងប្រទេសទាំង ២ ក្រោយការប៉ះទង្គិចហិង្សាបានកើតឡើងកាលពីដើមឆ្នាំនេះ។
ភាពតានតឹងបានកើនឡើងរវាងប្រទេសមានច្រើនបំផុតទាំង ២ នៅក្នុងពិភពលោកនៅក្នុងខែមិថុនា ក្រោយពីការប្រយុទ្ធគ្នាបណ្តាលឲ្យមនុស្សស្លាប់ច្រើនបានផ្ទុះឡើងរវាងទាហានឥណ្ឌា និងចិន នៅព្រំដែនភ្នំហិម៉ាល័យ។
អ្នកនាំពាក្យការបរទេស លោក វ៉ាង វេនប៊ីន បានថ្លែងនៅសន្និសីទកាសែតថា៖ «ស្ថានភាពជាក់ស្តែងបន្តថយចុះនិងថយកម្តៅ»។
លោកបានថ្លែងប្រាប់ក្រុមកាសែតនៅក្នុងក្រុងប៉េកាំងថា៖ «ទាហានព្រំដែនជួរមុខរបស់ប្រទេសទាំង ២ បានបញ្ចប់ការពាក់ព័ន្ធនៅតាមកន្លែងភាគច្រើន»។
លោក វ៉ាង បានថ្លែងថាភាគីទាំង ២ កំពុងត្រៀមធ្វើការចរចាជុំទី៥ មួយទៀតរវាងមេបញ្ជាការយោធាដែលកាលបរិច្ឆេទមិនបានកំណត់នៅឡើយទេ។
ក្រោយការប៉ះទង្គិចកាលពីថ្ងៃទី ១៥ ខែមិថុនា មន្ត្រីចិន និងឥណ្ឌា បានជួបនិងព្រមព្រៀងចាត់វិធានការ ដើម្បីធ្វើឲ្យស្ថានការណ៍នេះថយកម្តៅ៕ PSA
