ក្មេងៗសិស្សសាលា ដើរឆ្លងកាត់អគារដែលត្រូវបានបំផ្លាញនៅក្នុងក្រុងរ៉ាហ្គាភាគខាងជើង។
.jpg)
ក្រុងរ៉ាហ្គាៈ រយៈពេលពេញ ១ ថ្ងៃទូកតូចជាច្រើនគ្រឿងឆ្លងទន្លេអឺ ហ្រ្វេត (Euphrates) ដើម្បីចម្លងក្រុមអ្នកស្រុកចូលទៅក្រុងរ៉ាហ្គានៃប្រទេសស៊ីរី ជាទីដែលស្ពាន ផ្ទះសំបែង និងសាលារៀនជាច្រើននៅតែបិទទ្វារ ដោយសារតែការវាយប្រហារប្រឆាំងនឹងក្រុម រដ្ឋអ៊ិស្លាម។
ជាការពិតជាក់ស្តែង រយៈពេល ១ ឆ្នាំបានកន្លងទៅចាប់តាំងពីការវាយប្រហារគាំទ្រដោយអាមេរិកបានវាយបណ្តេញក្រុមជីហាដចេញពីបន្ទាយ រឹងមាំនៅស៊ីរី ប៉ុន្តែក្រុងរ៉ាហ្គាមានផ្លូវ និងស្ពានទៅកាន់ក្រុងនេះនៅតែខូចខាត។
ដើម្បីចូលទៅដល់ក្រុងនេះ លោក Abu Yazan មានវ័យ ៣៣ ឆ្នាំ និងគ្រួសាររបស់លោកបានឡើងជិះទូក ១ គ្រឿងនៅច្រាំងទន្លេភាគខាងត្បូងនៃទន្លេអឺ ហ្រ្វេតដែលនៅតាមបណ្តោយជាយក្រុងរ៉ាហ្គា។
ពួកគេបានលើកយានជំនិះ របស់ពួកគេដាក់លើទូកតូចៗដែលធ្វើដំណើរទៅភាគខាងជើងប្រហែលជា ២-៣ នាទីមុននឹងដាក់អ្នកដំណើរ និងយានជំនិះរបស់ពួកគេចុះនៅតំបន់ជាយក្រុងរបស់ក្រុងនេះ។
លោក Abu Yazan ដែលមានពុកចង្កាយ៉ាងច្រើន បាននិយាយថា វាពិតជាលំបាកណាស់ ក្មេងៗជានិច្ចកាលមានការភ័យខ្លាចចំពោះលទ្ធភាពនៃការលង់ទឹក។ «យើងចង់ឲ្យស្ពាននេះត្រូវបានគេជួសជុលឡើងវិញដោយសារវាមានសុវត្ថិភាពជាងការដឹកជញ្ជូនតាមផ្លូវទឹក»។
ពលរដ្ឋស៊ីរីឆ្លងពីក្រុងរ៉ាហ្គាទៅកាន់ភូមិនានានៅតំបន់ជនបទភាគខាងត្បូងនៃក្រុងនេះ។ AFP
បំណែកបាក់នៃស្ពានចាស់ដ៏ល្បីល្បាញនៅក្នុងក្រុងរ៉ាហ្គាស្ថិតនៅក្បែរសសរធំៗ ២ ដើមជាកំពូលនៃសំណង់តែត្រូវបានបំផ្លាញ។
ការប្រយុទ្ធគ្នាបានចប់កាលពីថ្ងៃទី ១៧ ខែតុលា ឆ្នាំ ២០១៧ នៅពេលក្រុងនេះ នៅទីបញ្ចប់បានធ្លាក់ចូលទៅក្នុងដៃរបស់កងកម្លាំងប្រជាធិបតេយ្យស៊ីរីដែលប្រគល់ក្រុងនេះ ទៅឲ្យក្រុមប្រឹក្សាស៊ីវិលក្រុងរ៉ាហ្គា (RCC) ដើម្បីគ្រប់គ្រង។
លោក Ahmad al-Khodr ជាសមាជិក RCC បាននិយាយថា ស្ពានចំនួន ៦០ នៅតែត្រូវបានបំផ្លាញនៅក្នុង និងនៅជុំវិញក្រុងនេះ។
លោកនិយាយថា៖ «ក្រុមចម្រុះ បានផ្តល់ឲ្យយើងនូវស្ពានដែកចំនួន ៨ ដើម្បីតភ្ជាប់ទៅតំបន់សំខាន់ៗនៅក្នុងតំបន់ជនបទនៃក្រុងនេះ»។
អង្គការ Amnesty International បានប៉ាន់ប្រមាណថា ៨០ ភាគរយនៃក្រុងរ៉ាហ្គាត្រូវបានបំផ្លាញដោយការប្រយុទ្ធគ្នានៅក្នុងនោះមានហេដ្ឋារចនាសម្ព័ន្ធធំៗដូចជាសាលារៀននិងមន្ទីរពេទ្យ៕
