ក្រុងបាងកក៖ ដោយមិនតក់ស្លុតទៅនឹងការរងសម្ពាធតាមផ្លូវច្បាប់ពីអាជ្ញាធរថៃ លោក Tanawat Wongchai ជាអ្នករៀបចំម្នាក់ក្នុងចំណោមអ្នករៀបចំប្រឆាំងរបបមួយនេះ «ដើម្បីទម្លាក់លោក ប្រាយុធ ចាន-អូចា» ដែលបានរៀបចំព្រឹត្តិការណ៍កាលពីថ្ងៃទី ១២ ខែមករា បានថ្លែងថា លោកនឹងបង្ហាញសកម្មភាពបែបនេះ រហូតដល់លោកសម្រេចបានគោលដៅរបស់លោកទើបសុខចិត្ត។
លោក Tanawat Wongchai បានបង្ហោះនៅលើគេហទំព័រសង្គមហ្វេសប៊ុករបស់លោកថា លោកត្រូវបានគេកោះហៅឲ្យទៅបំភ្លឺនៅប៉ុស្តិ៍ប៉ូលិសបាងស៊ឺកាលពីថ្ងៃចន្ទ ជុំវិញការរៀបចំការប្រមូលផ្តុំសាធារណជន ដោយគ្មានការជូនដំណឹងឲ្យប៉ូលិសដឹងជាមុន តម្រូវទៅតាមច្បាប់ប្រមូលផ្តុំជាសាធារណៈនោះ។
លោកបានអះអាងថា ក្រុមអ្នករៀបចំព្រឹត្តិការណ៍មិនមានកាតព្វកិច្ចដើម្បីសុំការអនុញ្ញាតពីប៉ូលិសនោះទេ ហើយដែលនេះជាករណីមួយនៃការប្រើប្រាស់ច្បាប់ ដើម្បីរំខានដល់អ្នកដែលរៀបចំព្រឹត្តិការណ៍សម្ដែងមតិខុសៗគ្នានោះដែរ។
ច្បាប់ប្រមូលផ្តុំសាធារណៈ តម្រូវឲ្យក្រុមអ្នករៀបចំការជួបជុំសាធារណជន ត្រូវជូនដំណឹងទៅប៉ូលិសឲ្យបានមុនយ៉ាងតិច ២៤ ម៉ោង ទោះបីជាយ៉ាងណាក៏ដោយ ច្បាប់មាត្រាទី ៣ បានចែងថា ច្បាប់នោះមិនត្រូវបានអនុញ្ញាតឲ្យលេងកីឡា ឬរៀបចំព្រឹត្តិការណ៍កម្សាន្តនៅទីសាធារណៈជាដាច់ខាត។
កាលពីថ្ងៃទី ១២ ខែមករា ក្រុមអ្នកគាំទ្រ និងក្រុមប្រឆាំងនាយករដ្ឋមន្ត្រី ប្រាយុធ ចាន-អូចា បានប្រមូលផ្តុំគ្នាយ៉ាងច្រើននៅក្នុងព្រឹត្តិការណ៍ដាច់ដោយឡែករបស់ពួកគេរៀងខ្លួន។
ការរៀបចំព្រឹត្តិកាណ៍ប្រឆាំងទម្លាក់រដ្ឋាភិបាល ប្រាយុធ ត្រូវបានរៀបចំធ្វើឡើងនៅឯសួនច្បាររថភ្លើង ឬនៅឧទ្យានវ៉ាជីរ៉ាប៊ីនចាតានៅក្នុងសង្កាត់ចាកតុចាក ក្រុងបាងកក។
ចំណែកឯមនុស្សបានប្រមូលផ្តុំគ្នា ដើម្បីបង្ហាញការគាំទ្រលោកឧត្តមសេនីយ៍ ប្រាយុធ ចាន-អូចា នៅកន្លែងព្រឹត្តិការណ៍ផ្សេងទៀតបានហៅថា «ពួកយើងជួបជុំគ្នា ដើម្បីគាំទ្រលោក ប្រាយុធ» នៅឧទ្យានលុមភីនី។
ជានិស្សិតម្នាក់នៅសាកលវិទ្យាល័យសេដ្ឋកិច្ចជុឡាឡុងកន លោក Tanawat គឺជាសកម្មជននយោបាយដ៏សកម្មម្នាក់។
លោកបានចេញមុខកាលពីថ្ងៃទី ៩ ខែ មេសា ឆ្នាំ ២០១៨ នៅពេលលោក និងក្រុមនិស្សិតផ្សេងទៀតបានជួយបិទប្រកាសសារនានាប្រឆាំងលោកឧត្តមសេនីយ៍ ប្រាយុធ ចាន-អូចា ដែលបានទៅទស្សនកិច្ចនៅសាកលវិទ្យាល័យ ដើម្បីធ្វើសុន្ទរកថាពិសេសមួយនៅទីនោះ។
កាលពីថ្ងៃទី ២ ខែ កុម្ភៈ ឆ្នាំ ២០១៩ លោក Tanawat បានប្រមូលផ្តុំសម្ដែងមតិនៅមុខវិមានរដ្ឋាភិបាល ហើយបានអានសេចក្តីថ្លែងការណ៍មួយ ទាមទារឲ្យនាយករដ្ឋមន្ត្រីចុះពីតំណែង៕ BKP/SK