Surachai ទីប្រឹក្សាច្បាប់បក្សថៃរក្សាជាតិដាក់លិខិតនៅ (EC)។ AFP
.jpg)
ក្រុងបាងកកៈ គណៈកម្មាធិការ រៀបចំការបោះឆ្នោត (EC) កាលពីថ្ងៃពុធ បានសម្រេចចិត្តស្នើឲ្យតុលាការរដ្ឋធម្មនុញ្ញត្រូវរំលាយគណបក្សថៃរក្សាជាតិ (TRC) ជុំវិញការតែងតាំងម្ចាស់ក្សត្រីថៃ Ubolratana ជាបេក្ខជននាយក រដ្ឋមន្ត្រីរបស់ខ្លួន។
អគ្គលេខាធិការ EC លោក Charungwit Phumma បានថ្លែងថា ទីភ្នាក់ងាររៀបចំការបោះឆ្នោត បានរកឃើញថា គណបក្ស ថៃរក្សាជាតិ បានបំពានច្បាប់មាត្រា៩២ ស្តីអំពីច្បាប់គណបក្សនយោបាយឆ្នាំ ២០១៨។
លោក បានថ្លែងថា៖ «ទង្វើនេះ ត្រូវបានគេចាត់ទុកថាផ្ទុយទៅនឹងច្បាប់រាជាធិបតេយ្យ អាស្រ័យធម្មនុញ្ញ»។
មាត្រា៩២ ចែងថា ក្រោយពីទទួលបានភ័ស្តុតាងដែលគួរឲ្យជឿទុកចិត្តបាននោះ គណបក្សមួយ បានប្រព្រឹត្តខុសច្បាប់យ៉ាងធ្ងន់ធ្ងរចំពោះរាជាធិបតេយ្យអាស្រ័យរដ្ឋធម្មនុញ្ញ EC ត្រូវតែប្តឹងទៅតុលាការរដ្ឋធម្មនុញ្ញឲ្យរំលាយគណបក្សថៃរក្សាជាតិនេះ។
ប្រធាន EC លោក Ittiporn Boonpracong ដែលបានបំពេញមុខងារជាអ្នកកាន់កាប់បញ្ជីឈ្មោះគណបក្សបានបញ្ជូនសំណុំរឿងនេះ ទៅតុលាការដើម្បីធ្វើការសម្រេចចិត្ត ឲ្យបានកាន់តែឆាប់តាមដែលអាចធ្វើទៅបាន។
តុលាការបាននិយាយថា ខ្លួននឹងសម្រេចចិត្តថា តើនឹងត្រូវទទួលយកសំណុំរឿងនេះដែរឬយ៉ាងណា?
មេដឹកនាំបក្សថៃរក្សាជាតិបានប្រាប់អ្នកសារព័ត៌មានថា៖ «យើងនឹងស្នើឲ្យតុលាការ ដើម្បីប្រើប្រាស់សិទ្ធិរបស់ពួកយើង ស្ថិតនៅក្រោមច្បាប់រដ្ឋធម្មនុញ្ញនៃប្រទេសនេះ»។
ពេលនេះមិនទាន់មានព័ត៌មានលម្អិតទាក់ទងនឹងការចោទប្រកាន់ ឬ ត្រូវដាក់ពាក្យសុំអ្វីខ្លះទៅតុលាការឡើយទេ។ អ្វីដែលយើងបានចាប់ផ្តើមធ្វើនេះ គឺជាចេតនាល្អៗ មិនមែនចេតនាអាក្រក់នោះទេ។
គណបក្សថៃរក្សាជាតិមានទំនាក់ទំនង ជាមួយអតីតនាយករដ្ឋមន្ត្រីនិរទេសខ្លួន ថាក់ស៊ីន ស៊ីណាវ៉ាត្រា។ ការរំលាយបក្សនេះអាចធ្វើឲ្យអ្នកគាំទ្រផ្ទុះកំហឹង៕ BKP/SK
